Tilich: „Smy žiwi w času změny“
Putin: Dźakza wašu starosć wo Rusku
Moskwa (dpa/SN). Z patriotiskim apelom je ruski prezident Wladimir Putin swój kraj na nowe lěto nastajił. „To najwažniše je, zo sami do sebje wěrimy, do swojich mocow, do swojeho kraja“, rjekny prezident w swojej nowolětnej narěči w Moskwje. Hladajo na nadpad w Turkowskej z nimale štyrceći mortwymi wčera rano přilubi wón Turkowskej podpěru w boju přećiwo terorizmej.
Putin dźeržeše swoju dobre tři mjeńšiny trajacu narěč krótko do połnocy pod wěžemi Krjemla. Toho něhdyši šef Leonid Brježnjew bě tule tradiciju nowolětneje narěče swój čas zahajił.
„2016 so nachila. Njebě to lochke lěto. Ćeže pak, na kotrež smy storčili, su nas jednoćili a pomhali hoberske rezerwy swojich móžnosćow mobilizować a doprědka přińć“, wuzběhny Putin w narěči, kotruž statna telewizija wusyłaše. „Chcu so wam wutrobnje dźakować za wašu sprawnu starosć wo Rusku.“
Lěto mnohich rozsudow
Wjacore wólby sejmow rozsudźa wo dalšim politiskim kursu w Němskej
Berlin (dpa/SN/MkWj). Lěto 2017 lubi na politiskej runinje tójšto napjatych podawkow. Fachowcy rěča mjeztym wo „super wólbnym lěće“ w Němskej, w kotrymž budu politiske wuhibki znowa stajene.
Zazběh budu 12. februara wólby noweho zwjazkoweho prezidenta. Zwjazkowa zhromadźizna ma naslědnika Joachima Gaucka wuzwolić.
Slěduja wólby třoch krajnych sejmow: 26. měrca wola nowy sejm w Posaarskej. Z toho dnja wočakuja mały zwjazkopolitiski signal, kotryž móhł so na dalše wólby wuskutkować. Dalšej rozsudaj wo přichodnym politiskim kursu padnjetej 7. meje w Schleswigsko-Holsteinskej a 14. meje w Sewjerorynsko-Westfalskej. W tymaj krajomaj móhła so dotalna knježaca konstelacija zasadnje změnić.
Šiman: Hidu wuhnać
Budyšin (SN/MkWj). Lěto 2016 bě lěto dobrych, ale tež špatnych powěsćow. Tole je wosobinska bilanca Marka Šimana, zapósłanca CDU w Sakskim krajnym sejmje. Za pozitiwne wón ma, zo su železniski móst nad Budyskej Zeppelinowej skónčnje twarić započeli. „Po dźesać lětach ćežkeho dźěła a wojowanjow“, Šiman Serbskim Nowinam rjekny. Tež wu-twar Budyskeje powołanskeje akademije je jemu wažna kročel, Budyšin jako atraktiwne kubłanišćo dale zesylnić.
Zrudźace podawki běchu porno tomu bijeńcy mjez požadarjemi azyla a prawicarskimi młodostnymi. To je zapósłancej wučba, zo měli zamołwići spěšnje a konsekwentnje reagować. „Štóž namóc nałožuje, nima w Budyšinje ničo pytać.“
W serbskich naležnosćach wočakuje Marko Šiman wjele dźěła předewšěm w kubłanskich prašenjach. Při tym je stajnje zaso wjesoły, hdyž móže z fachowcami problemy zrjadować. Za sobu najwjetše wužadanje 2017 ma wón polěpšenje komunikacije w towaršnosći, „zo bychmy hidu z njeje wuhnali“.
To a tamne (02.01.17)
Z ptakopawkom jako hodownej překwapjenku je muž w Braunschweigu pola swojeje přećelki porjadnje do črjopka stupił a krizu zawinił. Zwada wo njewitany dar so w silwesterskej nocy hišće přiwótři. Po tym zo bě so porik pawka dla zas a zaso wadźił, 39lětna jeho na přećela ćisny. Tón pak zawoła policiju, kotraž zwadu skónči a dowjeze pawka do zwěrjatownje.
Dźěło zhubił je dirigent w Italskej, dokelž bě eksistencu rumpodicha prěł. Hudźbnik bě na kóncu předstajenja „Lodowa kralowna“ dźěćom rjekł, zo rumpodicha scyła njedawa. Na to někotre z małych wopytowarjow zrudne płakachu, na čož so starši hóršachu. Zarjadowar koncerta nablaku reagowaše a dirigenta hnydom pušći. Pola staršich je so zamołwił a dźěćom přilubił, zo ma rumpodich hižo noweho dirigenta.
Morjeneho šofera pochowali
Szczecin (dpa/SN). Pólskeho šofera nakładneho awta, kiž bě jedyn z woporow teroroweho nadpada na dohodowne wiki w Berlinje, su dźensa w jeho domiznje pochowali. Na žarowanskej Božej mši we wsy Banie pola Szczecina so swójbni a přećeljo ze 37lětnym rozžohnowachu. Šoferojo-kolegojo wopokazachu jemu z konwojom nakładnych awtow poslednju česć. Atentatnik bě Łukasza Urbana zatřělił, na to z nakładnym awtom na hodowne wiki jěł a dwanaće ludźi morił.
Referendum wo wotpačenju
Banja Luka (dpa/SN). Nawoda bosniskich Serbow Milorad Dodik planuje klětu referendum wo wotpačenju swojeho dźěla kraja wot Bosniskeje-Hercegowiny. Tole je prezident „Republiki Srpskeje“ wčera w statnej telewiziji w Bani Luce připowědźił. Nadrobnosće wo prěnje połlěto planowanym ludowym wothłosowanju wón žane njezdźěli. Dodik bě z referendumom minjene lěta stajnje zaso hrozył. Južni Serbja wučinjeja něhdźe třećinu wobydlerstwa Bosniskeje-Hercegowiny.
Zymske poměry w Grjekskej
Z wotmachom hotuja so w Kölnje na jutřiši silwesterski swjedźeń. ...
Obama jako „kačka“ wusměšowany
Njedźiwajcy přiměra bomby padaja
Rjemjesło dožiwić
Drježdźany (SN). Rjemjeslniska komora Drježdźany chce ludźom wšelakorosć wuměłskeho rjemjesła na dožiwjenjowpołne wašnje zbližić a namołwja zajimcow, so wot 31. měrca do 2. apryla na Europskich dnjach wuměłskeho rjemjesła wobdźělić. Hač su to knihiwjazarjo, škleńcudujerjo abo kowarjo – wšitcy móža potom swoje dźěłarnje spřistupnić a ludźom pohlad za kulisy kreatiwneje sceny sposrědkować.
Drježdźanska rjemjeslniska komora organizuje wosebite dny w swojim komornym wokrjesu. Na internetnej stronje www.kunsthandwerkstage.de móža so zajimcy wobhonić a přizjewić. Dale podpěruje komora wobdźělnikow nastupajo zjawnostne dźěło, přewostaji jim tež plakaty a podobne wabjenske materialije. „Na Europskich dnjach wuměłskeho rjemjeslnistwa njemóža wopytowarjo jeno za kulisy dźěłarnjow pohladać. Tam změja składnosć so tohorunja wo wukubłanskich móžnosćach informować“, zdźěla hłowny jednaćel rjemjeslniskeje komory Andreas Brzezinski.
