To a tamne (24.03.17)
Hrajkowa pistola w šuli je wčera wulke zasadźenje policije zawiniła. Wjacore dźesatki zastojnikow, tež z wosebitych jednotkow, so wobdźělichu. Swědka bě policiju informowała, dokelž bě widźała, kak wosoba z pistolu do šule w bayerskim Gunzenhausenje dźe. Šulske nawodnistwo bu informowane a wšitcy dyrbjachu twarjenje wopušić. Při přepytanju šule napadny zastojnikam 15lětny hólc, kotrehož zajachu. Kaž so wukopa, měješe wón hrajkowu pistolu při sebi. Za čo ju trjebaše ze zdźělenki njewuchadźa.
Podchłódźeneho nukla je policija w delnjosakskim Stadthagenje wuchowała. Zastojnicy wuhladachu skoćatko w nocy na puću. Dokelž wone po wšěm zdaću chětro zymu mrěješe, sadźichu je na motorowu hawbu, hdźež móžeše so zhrěć. Nukl wostanje nětko w zwěrjatowni, doniž so jeho wobsedźer njepřizjewi.
Po cyłej Němskej pytać
Berlin (dpa/SN). Zwjazkowy sejm je dźensa zakoń wobzamknył, w kotrymž su kriterije za kónčne składźišćo atomowych wotpadkow formulowane. Tež wotběh za wuběr stejnišća hač do lěta 2031 zakoń rjaduje. Pytać ma so po cyłej Němskej. Srjedź lětstotka je potom předwidźane w Němskej produkowane atomowe wotpadki na stejnišću składować. Zakoń běchu politikarjo, wobswětoškitarjo, zastupjerjo energijoweje branše, wědomostnicy a zajimowani wobydlerjo přez lěta zhromadnje zdźěłali.
Piše zaso čorne ličby
Berlin (dpa/SN). Němska železnica je loni po dlěšim času zaso čorne ličby pisała. Tak bilancowaše zwjazkowe předewzaće 726 milionow eurow, po minusu 1,3 miliardow eurow w lěće 2015. Tole zdźěli dźensa nawoda předsydstwa Richard Lutz w Berlinje. Wobrot je so wo 0,3 procenty na 40,6 miliardow eurow stopnjował. „Smy změnu docpěli“, Lutz wuzběhny. Lětsa liči Němska železnica z wobrotom 41,5 miliardow eurow.
Sakske firmy na wuchodźe
Atentat w Londonje po mustru druhich
London (dpa/K/SN). Po wčerawšim žałostnym teroristiskim atentaće w Londonje ze znajmjeńša štyrjomi smjertnymi woporami a 40 zranjenymi přepytuje policija z połnej paru wobkruh skućićela a wšě móžne dalše wobstejnosće. Sydom wosobow je wona dotal zajała. Do toho běchu zastojnicy w Londonje, Birminghamje a dalšich městach šěsć bydlenjow přepytali.
W Brüsselu mjeńšinowe temy rozjimali
Brüssel/Flensburg (SN/JaW). Zastupjerjo Federalistiskeje unije europskich narodnych mjeńšin (FUEN) zetkachu so tele dny w Brüsselu ze zastupnikami komisije EU. Kaž z Flensburgskeho generalneho sekretariata FUEN zdźěleja, rozjimachu tam předewšěm wobydlersku iniciatiwu k skrućenju a škitej mjeńšinowych prawow a rěčow w Europje Minority Safepack. EU-komisija běše ju w lěće 2013 wotpokazała. Přećiwo tomu bě FUEN wuspěšnje na Europskim sudnistwje w Luxemburgu skoržiła. Po wusudźe Luxemburgskich juristow pak dyrbi so EU-komisija nětkole z naležnosću znowa zaběrać. K tomu bě zwjazk mjeńšin roz- mołwu poskićił. K wuslědkam nochcychu so zamołwići hišće wuprajić. „Chcemy najprjedy załožićelow a tak hłownych zamołwitych iniciatiwy, tak mjenowany wobydlerski komitej, kotremuž přisłušeja wjacore znate wosobiny z europskeje politiki, wo rozmołwje informować a sej dalše postupowanje w naležnosći dorěčeć“, rjekny generalna sekretarka FUEN Susann Šenkec na naprašowanje našeho wječornika.
Mnozy Frauke Petry słyšeć chcyli
Budyšin (CS/SN). Městna na žurli Budyskeho hotela Residence njedosahachu wčera za wšitkich zajimcow, kotřiž chcychu wot zwjazkoweje rěčnicy AfD Frauke Petry nadrobnosće wo programje strony k lětušim wólbam zwjazkoweho sejma zhonić. Tohodla su ludźo zarjadowanje tež na widejowej sćěnje w pódlanskej rumnosći sćěhowali.
Do wustupa Frauke Petry předstaji so direktny kandidat AfD za wólbny wokrjes 156 (Budyšin 1) Karsten Hilse. Policajski zastojnik rozłoži, zo budźe so w padźe wuzwolenja w zwjazkowym sejmje předewšěm wo wěstotnopolitiske prašenja starać. Energijowy přewrót je jeho dalša tema. Tón so ideologisce znjewužiwa, wohroža we Łužicy znajmjeńša 35 000 dźěłowych městnow kaž tež wěstotu zastaranja a zawinuje wyšu płaćiznu za milinu. Tak so strach powjetša, zo dalši ludźo Łužicu wopušća.
To a tamne (23.03.17)
Swojeje lubosće k słódkosćam dla ma paduch w Tokiju nětko z chłostanjom ličić. Wón je so do něhdźe 40 běrowow w měsće a wokolinje zadobył. Nimo pjenjez pytaše mjez druhim tež za šokolodu, lodom, pudingom a brěčkami. Dokelž pak je so při zadobywanju zranił, nańdźe policija jeho slědy. Na cholesterin bohata krej jeho skónčnje přeradźi.
Z chětro rozmjerzanej maćerju njeje paduch w bayerskim Nördlingenje zawěsće ličił. Něšto dnjow po tym zo běchu jeje jědnaćelětnemu synej mountainbike pokradnyli, wuhlada wona 18lětneho z nim w conje za pěškow. Žona na městnje reagowaše, hrabny jeho a dowjedźe młodostneho na policajski rewěr. Tam młodostny padustwo přizna. „Mać jědnaćelětneho bě po wšěm zdaću chětro přeswědčiwje jednała, zo je paduch dobro- wólnje sobu šoł“, policija zdźěli.
Ministerstwo požadane stejišća wočaknje
Podstupim (SN/at). Minimalna ličba dwanaće šulerjow na rěčnu skupinu we wučbje serbšćiny abo Witaj-wučbje w Braniborskej je definitiwje z blida. To wobkrući nowinski rěčnik braniborskeho ministerstwa za kubłanje, młodźinu a sport Ralph Kotsch našemu wječornikej. Referatna nawodnica dr. Katrin Düring bě to na posedźenju Rady za naležnosće Serbow při Krajnym sejmje Braniborskeje wčera w Podstupimje wozjewiła. Hinašu ličbu pak njeje mjenowała, kaž wobdźělnicy rozprawjeja. Předsyda Domowiny Dawid Statnik wobkrući knjeni Düring jara taktiske wustupowanje, byrnjež so na połoženju cyłkownje ničo njezměniło. „Ze serbskeje strony je wšitko prajene, nětko měło so ministerstwo k tomu wuprajić“, rjekny wón na naprašowanje. Ministerstwo wočaknje zapodaće požadanych stejišćow k naćiskej noweho serbskeho šulskeho postajenja, prjedy hač dale postupuje. Termin je 7. apryl.
Trump budźe pódla
Washington (dpa/K/SN). Prezident USA Donald Trump, tuchwilu mócnje pod ćišćom wopačnych twjerdźenjow dla, budźe na zetkanju šefow statow a knježerstwow krajow NATO kónc meje w Brüsselu pódla. Do toho zeńdźe so wón 12. apryla we Washingtonje z generalnym sekretarom aliancy Jensom Stoltenbergom. Trump bě so naposledk k NATO wuznał, swoje žadanja za sylnišim financnym wobdźělenjom tamnych partnerow pak stajnje wospjetował.
Přichodnje skala A do G
Brüssel (dpa/K/SN). Přetrjebarjo měli hnydom spóznać, kotre nastroje wosebje wjele energije zalutuja. Europska unija chce tohodla zašmjatowace woznamjenjenja płokawow, chłódźakow a telewizorow z labelemi A+++ wotstronić a z jednorej skalu A do G narunać. Doniž so nowe labele we wobchodach njejewja, móžetej pak hišće dobrej dwě lěće zańć. Z labelom A budu potom milinu lutowace marki na wikach wupokazane, G-modelam wuswědča, zo jara wjele energije spóžěraja.
Noweho šefa postajili
