Ćěkancow interněrować
Budapest (dpa/SN). Madźarski parlament je dźensa w Budapesće za to hłosował, ćěkancow interněrować. Tole předwidźi wotpowědny naćisk zakonja knježerstwa. Tak njesmědźa ćěkancy přichodnje wosebite transitne pasmo wopušćić, doniž njeje jich jednanje wo azyl wotzamknjene.
„Obamacare“ ma zańć
Washington (dpa/K/SN). Republikanojo dadźa so do toho, wotstronić zaso strowotnisku reformu něhdyšeho prezidenta USA Baracka Obamy. Wčera předpołožichu woni naćisk zakonja, z kotrymž ma so tak mjenowane „Obamacare“ jako jedne z najwjetšich wudobyćow Baracka Obamoweho prezidentstwa zaso cofnyć a tak spjelnić jedne z wólbnych přilubjenjow nětčišeho prezidenta Donalda Trumpa. Naćisk pak zbudźa tež mjez republikanami kritiku, dokelž su miliony Američanow pokazani na strowotniske zastaranje přez „Obamacare“.
Chce časowy plan nastajić
Prěni sakski proces přećiwo terorizmej
Přećiwo wizumej
Zaměry sejma maja čłowjekej rozumne być
Slepo (SN/at). Rada starostow je na swojim prěnim zetkanju minjeny pjatk w Slepjanskim Serbskim kulturnym centrumje fyzikarja dr. Hartmuta Leipnera z Choćebuza jednohłósnje za delnjoserbskeho rěčnika wuzwoliła. Městno hornjoserbskeho rěčnika je hišće njejasne, dokelž njeje so dosć radźićelow z Hornjeje Łužicy wobdźěliło. Jeho chcedźa na přichodnym wuradźowanju w Njebjelčicach wuzwolić, rjekny Leipner w rozmołwje z našim wjerčornikom. Rěčnikaj koordinujetaj dźěławosć rady.
Gremij „sam ma so za wobydlerski forum, přewodźacy proces wutworjenja Serbskeho sejma“, rěka w nowinskej informaciji rady starostow. Čłonojo su jednanski porjad wobzamknyli a prašenja legitimacije rady starostow kaž tež Serbskeho sejma rozjimali. Rada chce wšěm Serbam wotewrjena być a wobhladuje so jako dohladowanski gremij po puću k sejmej.
Wjace podpismow, hač trěbnych było
Podstupim (dpa/K/SN). Přećiwnicy wo- krjesneje reformy w Braniborskej su nadosć podpismow za ludowu iniciatiwu nazběrali. Krajny wólbny nawoda wčera wobkrući, zo předleži tójšto wjace podpismow hač trěbnych 20 000. „Kworum je docpěty“, praji rěčnica wólbneho nawody Bettina Cain. „Wjac hač 40 000 ze zapodatych něhdźe 130 000 podpismow smy přepruwowali. Přibližnje 34 000 z nich bě dospołnje w porjadku“, wona přispomni. Tuž njeje trjeba zbytne hišće přepruwować.
Nimo toho ma parlamentariska poradźowanska słužba ludowu iniciatiwu za legalnu. Spomnjeny gremij we wčera wozjewjenym neutralnym posudku zwěsća, zo je ludowa iniciatiwa prawnisce tohorunja dowolena. Posudk bu na próstwu hłowneho wuběrka zdźěłany, dokelž běštej SPD a Lěwica na prawnosći ludoweje iniciatiwy dwělowałoj.
To a tamne (07.03.17)
Ze žołdka nopawy su skótni lěkarjo w Thailandskej nimale 1 000 twjerdych pjenjez wuoperowali. Tajke mjetaja tam ludźo do hatow, štož ma zbožo a dołhe žiwjenje přinjesć. Kaž uniwersitna klinika Chulalongkorn w Bangkoku zdźěli, je pjeć skótnych lěkarjow w běhu šěsćhodźinskeje operacije z 59 kilogramow ćežkeho zwěrjeća cyłkownje 915 twjerdych pjenjez wuwzało. Po tym zo běchu pjenjezy ze žołdka won, móže nopawa nětko zaso wjele lěpje dychać.
Wulka nakup mineralneje wody je 22lětnemu w badensko-württembergskim Laupheimje pjenježne chłostanje načiniła Ze šěsćstow połdraliterskimi blešemi a hišće dwěmaj sobujěducymaj bě jeho awto prosće přećežke. Policija pak jeho zadźerža a napołoži jemu chłostanku. Wodu bě młody muž tunjeho poskitka dla kupił.
Přirunanje zbudźa rozhorjenosć
Istanbul/Berlin (dpa/K/SN). Po tym zo bě turkowski prezident Recep Tayyip Erdoğan Němskej nacistiske metody wumjetował, je rozhorjenje wulke. Zwjazkowy justicny minister Heiko Maas (SPD) mjenowaše wumjetowanja „infamne, abstrusne a njeakceptabelne“. Generalny sekretar CSU Andreas Scheuer woznamjeni je jako „žałostne misnjenje Bosporuskeho despota“ a žada sej zamołwjenje. Němske komuny běchu turkowskim ministram wotprajili přewjesć wólbnobojowe zarjadowanja, hłownje z wěstotnych přičin.
Wjac rezerwow wutworili
Berlin (dpa/SN). Zakonske chorobne kasy Němskeje su po dotalnych ličbach z lěta 2016 nadbytk něhdźe 1,38 miliardow eurow docpěli. Rezerwy postupichu tak na wjac hač 15,9 miliardow eurow. Tole zdźěli dźensa zwjazkowe strowotne ministerstwo w Berlinje. Přiwšěm wostanje financna situacija jednotliwych kasow jara rozdźělna.
Talibanojo proša wo pomoc
Opel nětko francoski
Zeleni a liberalni kandidatow wuběrali
Drježdźany (dpa/K/SN). Zeleni su na stronskim zjězdźe sobotu w Drježdźanach nominowali kandidatow za nazymske wólby zwjazkoweho sejma. 1. městno na wólbnej lisćinje dowěri přitomnych něhdźe 100 delegatow 49lětnej Lipšćance Monice Lazar, kotraž dósta 76,8 procentow hłosow. Za njej wobsadźi Drježdźanjan Stephan Kühn (39) druhe městno před Kamjeničanskej studentku Meike Roden (25).
W Mittweidźe je na zhromadźiznje zastupnikow strony z cyłeho kraja sakska FDP swojeho generalneho sekretara Torstena Herbsta jako načolneho kandidata postajiła. 43lětny překupc bě so hižo w prěnim wólbnym přechodźe ze 125 hłosami porno dwěmaj riwalomaj přesadźił.
Tónkróć na zjawnym słyšenju
Marja Michałkowa za zastupjerjow serbskich zajimow rěčała
Drježdźany (SN/MiR). Skrótka a jadriwje rysowaše předsydka Rady za serbske naležnosće Sakskeje a čłonka zwjazkoweho sejma Marja Michałkowa (CDU) stejišćo gremija k sakskemu šulskemu zakonjej. Pjatk bě wona jedna z třinaće wěcywustojnych, kotřiž su so na zjawnym słyšenju wuběrka za šule a sport słowa jimali. Mjez nimi běchu předsydźa zwjazkow, zastupjerjo wučerjow, šulerjow a staršich. Swoje stejišćo zwuraznili su dale šulscy nawodźa wšelakich šulskich formow kubłanišćow w nošerstwje stata kaž tež tych w swobodnym nošerstwje.
Potrjebu na změny widźachu wěcywustojni mjez druhim na polu zaručenja wuknjenskich srědkow, socialneho šulskeho dźěła a inkluzije. Zastupjerjej Zwjazka sakskich městow a gmejnow kaž tež zwjazka sakskich wokrjesow kritizowaštaj, zo dóstawaja města a wokrjesy wot stata wjace nadawkow, nic pak personalne a financne srědki. Zasadnje pak zwuraznichu přitomni spokojnosć nastupajo změny zakonja po prěnim naćisku.
