Praha (dpa/K/SN). Po dotwarje awtodróhi Drježdźany–Praha zaměrjatej so Čěska a Sakska na železniski zwisk wysokeje spěšnosće. Njesmě być, zo nakładne awta­ awtodróhu zatykaja, praji sakski ministerski prezident Stanisław Tilich (CDU) wčera na wopyće w Praze. Zwjazkowy minister za wobchad Alexander Dobrindt (CDU) je jemu připrajił, hišće lětsa hospodarsku wužitnosć wysokospěšneje čary Drježdźany–Praha dać přepruwować. Tilich a čěski ministerski prezident Bohuslav Sobotka mataj zahajenje twara tajkeje čary w lěće 2035 za móžne. Dotal jězdźa wšitke ćahi přez idylisku dolinu Łobja a Čěsko-Saksku Šwicu.

Dalša tema zetkanja Tilicha a Sobotki bě kriminalita w pohraničnych kónčinach a zaměrny bój přećiwo njej. „W tym nastupanju je widźomnych postupow“, sakski premier zwurazni. Na přikład njekradnu hižo telko awtow. Dźensa je Tilich w sewjernych Čechach wotnožki wjacorych sakskich firmow wopytał.

Njeje ničo nowe, zo so ze swojimi programami a koncertami, wšelakimi přehladkami a dalšimi zajimawymi poskitkami tež we wulkokupnicach prezen­tujemy. Je tuž derje, zo předstajamy serbsku drastu k móžnym a serioznym přiležnosćam we Wojerowskim Łužiskim centeru runje tak kaž w Budyskim Centeru na Žitnych wikach. To je składnosć, zo nas ludźo lěpje zeznawaja. Ze swójskich nazhonjenjow wěm, zo so wosebje turisća rady prašeja, štó a zwotkel smy, a so potom často dźi­waja, zo w našich swójbach, kubłanišćach a hdźežkuli tež maćeršćinu pěstujemy. Njetrjebamy so wěsteho komerca bojeć, nawopak. Měli tajke prezentacije jara chutnje brać a so wjeselić, hdyž nam zmóžnjeja­ so na nakupowanskej etaži wosrjedź wobchodow z kulturnym programom předstajić. Tole su tež institucije kaž SLA spóznali a su kupnicam za napra­šowanja dźakowne. Měrćin Weclich

Chětro bolostnje do ruki kusnył je w bayerskim Landshuće paduch­ wobchodowemu detektiwej. Tón bě 34lětneho wobkedźbował, jako wjacore zamróžene pizzy kradnješe. Při durjach 56lětny podhladneho narěča. Na to dóńdźe k rozestajenju, při čimž paduch detektiwej tak jara do ruki kusny, zo dyrbjachu ranu w chorowni lěkować.

Po dwěmaj měsacomaj je policija w Mni­chowje zhubjene awto namakała. Kaž prezidij zdźěli, bě 55lětna žona z Du­rinskeje 11. decembra awto njedaloko hłowneho dwórnišća parkowała, pozdźišo pak je wjace njenańdźe. Zdźěliwši policiji, zo je wóz pokradnjeny, jědźeše z ćahom domoj. Nětko je policistam w starym měsće dospołnje zanjerodźene awto napadnyło, zhubjeny wóz z Durin- skeje. Žonu su mjeztym informowali.

Berlin (B/SN). Zwjazkowy nutřkowny minister Thomas de Maizière (CDU) měni, migraciska kriza a rozestajenje z islamizmom měłoj „nam přičina być, wo tym rěčeć, štó smy, što chcemy być, što nas wjedźe?“. Tydźenikej Die Zeit pokaza de Maizière na swoju zwjazanosć z křesćanstwom: „Widźiće křiž w mojej dźěłarni. Nimam wotmysł jón wotpójsnyć.“

Pomhać, hdźež je nuza

Mnichow/Berlin (B/SN). Zwjazkowy minister za financy Wolfgang Schäuble (CDU) a wulke cyrkwje wobroćeja so přećiwo wuwićowej swobodźe za staty, kotrež hižo žanych ćěkancow wróćo njebjeru. „Srědki skrótšić je kontraproduktiwne a wopačny signal“, rjekny prelat Martin Dutzmann, ewangelski předsyda Zhromadneje konferency Cyrkej a wuwiće, w Berlinje. Sćěh toho by była destabilizacija wotpowědnych statow a hišće wjetša migracija. Dutzmann warnowaše před přiběracymi socialnymi proble­mami we wuwićowych krajach, jeli so pomoc skrótši. „Jako křesćanske cyrkwje žadamy sej tam pomhać, hdźež je nuza najwjetša.“

Za fairny dialog ze stronu AfD