Brüssel (dpa/SN). Nawodni politikarjo Europskeje unije chcedźa tomu zadźěwać, zo stanje so europakritikar Ted R. Malloch z nowym wulkopósłancom USA při EU w Brüsselu. Z listom sej frakciski šef Europskeje ludoweje strony (EVP) Manfred Weber a předsyda frakcije liberalnych Guy Verhofstadt žadataj, dowěrnikej prezidenta USA Donalda Trumpa akreditowanje zapowědźić. List, kotryž powěsćerni dpa předleži, su prezidentej komisije EU Jeanej-Claudej Junckerej a pre­zidentej Rady EU Donaldej Tuskej pósłali. Malloch bě so w rozmołwje ze sćelakom BBC jasnje přećiwo EU wuprajił a hrozył, so za to zasadźić, zo wona rozpadnje. Zdobom Malloch wočakuje, zo euro w přichodnych 18 měsacach zwrěšći.

Washington/Budapest (dpa/SN). USA su „agresiwne zadźerženje“ Ruskeje w konflikće na wuchodźe Ukrainy zasudźeja a žadaja sej, zo Ruska anektowanu kupu Krim Ukrainje wróći. Dołhož so tole njestanje, dyrbjeli sankcije přećiwo Ruskej dale wobstać. Z tymile wuprajenjemi je nowa wulkopósłanča USA pola UNO, Nikki Haley, na swojim prěnim posedźenju w Bjezstrašnostnej radźe UNO w New Yorku wčera chětro překwapiła. USA su drje zasadnje za lěpše poćahi k Ruskej, tola połoženje na Ukrainje sej „bohužel jasne a sylne zasudźenje Ruskeje žada“, wona rjekny.

We wólbnym boju bě prezident USA Donald Trump připowědźił, poměr k Ruskej zasadnje polěpšić a wukazane sankcije zaso zběhnyć. Tomu móhł tež nowy wonkowny minister USA Rex Tillerson přinošować, kiž ma jako bywši šef wolijoweho koncerna ExxonMobil dobre styki do Ruskeje a k prezidentej Putinej wosobinsce.

Njedopominam so na wšitke filmy, kotrež sym hdy w kinje widźała. Tola „Mephisto“ (1981) z Rolfom Hoppe jako Hermann Göring je mi w pomjatku wostał. Z njepřirunajomnym wašnjom hraća a swojoraznym hłosom wotkry wón grawoćiwosć systema­ a ducha nacijow. Hoppe słuša do rjadu najsławnišich mimow Němskeje do a po měrliwej rewoluciji. Wón hraješe tež w filmach, dótkace so łužiskeje, haj samo serbskeje tematiki. Tak je 1998 był dźěd Findeisen we wjacedźělnym filmje „Klemperer – Ein Leben in Deutschland“ a 1985/87 w „Sachsen Glanz und Preußens Gloria“ kurwjerch August III. W błótowskim krimiju „Eine tödliche Legende“ (2012) rěči jako zamyleny starc tež někotre słowa serbsce. Mjezynarodny renomej njeje jeho wotdźeržał, w domiznje wostać a so za nju zasadźeć. Je derje, zo mytuja jeho dźensa w Drježdźanach z rjadom swjateho Jurja. Milenka Rječcyna

Wobsedźer złoćaneho pokłada, kotryž běchu dźěći w delnjej Bayerskej při hrajkanju w lěsu našli, je so přizjewił. Na zakładźe dokładnych znajomosćow wo schowje pokłada a jednotliwych pjenjezach móžeše dopokazać, zo pokład woprawdźe­ jemu słuša. Złoto je 250 000 eurow hódne. Muž bě je w lěsu zarył, dokelž boješe so paduchow w by­dlenju. Bankam wón njedowěrješe. Sprawnosć dźěći muž z darom mytowaše.

Na wšě 27 lět bjez jězbneje dowolnosće po puću běše 73lětny muž ze Šwabskeje. Nětko jeho njedaloko Augsburga na traktoru sedźo při wobchadnej kontroli lepichu. Policistam bě alkoholowa wón napadnyła. Test wunjese 1,9 promilow. Jězbnu dowolnosć pak sćazać njemóžachu. Tón běchu jemu podobneho delikta hižo před 27 lětami wotewzali.