Stejišća braniborskich wokrjesow a komunow nětko předleža

Podstupim/Zły Komorow (SN/BŠe). Hižo něšto lět je rěč wo wokrjesnej reformje w Braniborskej a rozsud so bliži. Hač do zańdźeneho pjatka mějachu wokrjesy a bjezwokrjesne města móžnosć swoje stejišćo nutřkownemu ministerstwu kraja­ předpołožić. Tež wokrjes Hornje Błóta-Łužica je na swojim wurjadnym posedźenju 2. měrca tajke stejišćo wobzamknył. Jeho radźićeljo wotpokazuja namjet, tuchwilu wobstejacy wokrjes z wokrjesami Delnja Łužica, Łobjo-Halštrow, Sprjewja-Nysa a z městom Choćebuzom zjednoćić. Ma-li so wotpohlad přiwšěm přesadźić, wobstawaja radźićeljo na tym, zo Zły Komorow w nowym wokrjesu centralnu rólu dóstanje. Žadanja su we wotpowědnym spisu konkretnje sformulowali. Krajny rada Siegurd Heinze (njestronjan) nimo toho wo tym rozmysluje, hač přećiwo wutworjenju wulkowokrjesa skorži abo nic.

Wo Božu pomoc za Donalda Trumpa prosył je sobotu farar w klóštrje karmelitow bayerskeho Straubinga. Tak prošeše wón na Božej mši wo to, zo ma nowy prezident USA dobrych poradźowarjow a zo twori rozsudy, kotrež cyłemu swětej tyja. Žona z wosady bě kemše pola fararja za pjeć­ eurow skazała w nadźiji, „zo by so wšitko derje stało“.

Policiji twochnyć chcyše 74lětny wuměnkar w Aachenje. Najebać znamjenja policije a módru swěcu, zo ma zastać, wón z awtom dale jědźeše a zajědźe do napřećiwneho wobchada. Njeda pak so mylić a ćekny přez mjezu do Nižozemskeje, hdźež po dalšim přesćěhanju policije skónčnje zasta. Tam so wurěčowaše, zo hubjenje słyši, zo policiju scyła widźał njeje a zo je jězbnu dowolnosć doma zabył. Kaž so pozdźišo wukopa, wón hižo pjeć lět žane papjery nima.

Düsseldorf (dpa/SN). Po nadpadźe ze sekeru wčera wječor na Düsseldorfskim hłownym dwórnišću je dźewjeć wosobow zranjenych, štyri z nich ćežko. Strach, zo móhł nichtó na sćěhi nadpada zemrěć, pak njewobsteji. 36lětny skućićel je z Kosowa a bydli tuchwilu we Wuppertalu, zdźěli dźensa policija. Mjeztym wona­ z toho wuchadźa, zo je psychisce chory.­ Wčera bě 36lětny najprjedy w ćahu a po tym na dwórnišću wólnje pa­santow ze sekeru nadběhował.

Zeleni sadźeja na ekotemy

Berlin (dpa/SN). Hłowna tema boja strony Zwjazka 90/Zelenych za lětuše wólby zwjazkoweho sejma je škit klimy a wobswěta. Tak wobjednawaja brunicu runje tak kaž přetworjenje awtomobiloweje branše a přirodoznjesliwe ratarstwo. „Ekoprašenje je prašenje eksistency“, zwurazni dźensa w Berlinje načolny kandidat Cem Özdemir. Wón předstaji naćisk wólbneho programa, kotrež chcedźa na zjězdźe w juniju wobzamknyć.

Wuskutki tež w Sakskej