Berlin (dpa/SN). Nowowuzwolenemu Němskemu zwjazkowemu sejmej hrozy dźensa na konstituowacym posedźenju w Berlinje rozestajenje. Na dnjowym porjedźe steja wólby prezidija. Dotalny financny minister Wolfgang Schäuble (CDU) ma so z prezidentom zwjazkoweho sejma stać. Jako jeho zastupjerja je strona AfD swojeho kandidata Albrechta Glasera namjetowała. Hižo do posedźenja su wšitke tamne frakcije sejma signalizowali, zo to njepodpěruja.

Financy tema wuradźowanjow

Berlin (dpa/SN). Unija, FDP a Zeleni chcedźa na zhromadnym wuradźowanju prěni raz wo łoskoćiwych temach, kaž su to dawki, financy a etat, diskutować. Jasne je, zo nochcedźa wšitke tři strony žane nowe zadołženje Zwjazka. Wo tym, kak móhli to docpěć, su předstawy chětro rozdźělne. Po financach rozjimaja zastupjerjo stron europsku politiku.

Zahaja rozmołwy

Na wosebitym prózdninskim projekće „Hudźić móže kóždy“ wobdźěla so něhdźe dźesać zajimcow z Choćebuskeho młodźinskeho­ kluba „Dose 08“, Knorawskeje wyšeje šule kaž tež młodźinskeju zetkawanišćow „KELLA“ a „ESSOH“ tele dny w SOS-dźěćacej wsy Łužica na Poznańskej dróze delnjołužiskeje metropole. Pod nawodom Tina Wacha zestajeja woni hač do štwórtka­ hudźbny program z předmjetami wšědneho dnja. Wuslědk projekta tež zjawnje předstaja. Foto: Michael Helbig

Rom (dpa/SN). Nastupajo dwaj ludowej rozsudaj za wjetšu awtonomiju dweju regionow­ na sewjeru Italskeje widźitej wobě potrjechenej knježerstwje dobyće. W hospodarsce sylnymaj regionomaj Veneciskej­ a Lombardiskej je njedźelu wjetšina ludźi za wjac samostatnosće hłosowała. Wobaj regionaj žadatej sej wot knježerstwa w Romje wjac kompetencow. Wosebje dźe wo to, wjace swojich dawkow w regionje zdźeržeć směć. Njewotwisnosć wot centralneho stata – tak kaž sej to Katalonska žada – njeje předwidźana. Referendumaj běštej porno katalanskemu ludowemu wothłosowanju legalnej.

W Lombardiskej z hospodarskej metropolu Mailand su 95,3 procenty ludźi za wjetšu awtonomiju hłosowali. We Veneciskej z městomaj Venedig a Verona je samo 98,1 procent wobydlerjow za wjac samostatnosće. We woběmaj regionomaj knježi prawa strona Lega sewjer, kotraž je sej ludowy rozsud žadała.

Zhorjelc (dpa/SN). Šef dźěłarnistwa IG metal we wuchodnej Sakskej Jan Otto zasadźa so za bórzomny spočatk rozmołwow nastupajo přichod stejnišća kanadiskeho koncerna Bombardier w Zhorjelcu. „Termin prěnjeho poskitka wo rozmołwu z němskim šefom předewzaća Michaelom Fohrerom je so minył, byrnjež hižo w juniju jasne připrajenje za tajke dóstali“, zdźěli dźěłarnik Jan Otto powěsćerni dpa. Hłownje měješe wo přichod personala hić, kotryž hižo wjele lět w zawodźe dźěła. Dalšej temje běštej wudźěłk přewodźace zhotowjenje kaž tež zawěsćenje dalšich inwesticijow Zhorjelskeho stejnišća. „Dyrbimy zahe dosć jednać, tak zo zawod hišće po lěće 2020 eksistuje“, Otto wuzběhny. Kanadiski koncern ma w regionje wosebitu zamołwitosć. Hižo nětko ma město z dwanaće procentami wjele bjezdźěłnych. „Što pak so stanje, hdyž hišće wjac k tomu přińdźe?“, so dźěłarnik praša, tłóčo na nowowusměrjenje a specializaciju zawoda.