SPD zhubi wažneho wojowarja
Matthias Miersch ma wotstupjeneho Kevina Kühnerta narunać
Berlin (dpa/SN). Dobre lěto do wólbow zwjazkoweho sejma wón wjace njemóže: Ze strowotnych přičin Kevin Kühnert jako generalny sekretar SPD wotstupi. Jenož hodźiny pozdźišo je jeho naslědnik postajeny: Energijowy a klimowy politikar Matthias Miersch. Kaž Kühnert je tež wón lěwicar. Při organizowanju wólbneho boja pak trjeba wón pomoc.
Kühnert bě swój rozsud nastupajo wotstup w zjawnym lisće čłonam strony a zjawnosći wozjewił. We wólbnym boju dyrbjał kóždy wosobinsce wšitko dać. „Tole pak wokomiknje činić njemóžu, dokelž njejsym bohužel strowy“, Kühnert piše. Energiju, kotruž sej zastojnstwo a wólbny bój žadatej, trjeba Kühnert drje dlěši čas, zo by so zaso wustrowił, 35lětny piše. Po informacijach powěsćernje dpa njejedna so wo ćělne, ale wo mentalne problemy. „Tohodla ćahnu konsekwency“, Kühnert rozłoži.
Ruske jednotki w Torjecku
Toreck (dpa/SN). Na wuchodźe Ukrainy su so ruske jednotki do wuchodneho dźěla Torjecka zadobyli, wo kotrež běchu dołho wojowali. W měsće wojuja nětko wo kóždy dom, rěčnica zamołwiteje wojerskeje skupiny zdźěli. W hórniskim měsće njedaloko Donjecka bydleše do wójny něhdźe 30 000 ludźi. Najebać wojowanja je w měsće hišće wjele ciwilistow. Ukrainske jednotki su tam přiběrajcy we wuskosćach. Tež na druhich wotrězkach fronty dyrbja so Ukrainjenjo wobarać.
Netanjahu optimistiski
Tel Aviv (dpa/SN). Lěto po masakru 7. oktobra wěri israelski ministerski prezident Benjamin Netanjahu kruće do dobyća swojeho wójska. „Zhromadnje wojujemy a zhromadnje – z Božej pomocu – tež dobudźemy“, rjekny Netanjahu we widejowym poselstwje. Israel dyrbi so tuchwilu nadpadam Hamas, Hissbollah a Jemena wobarać. Israelske wojerske lětadła bombarduja objekty wosebje w Libanonje. Tam su při tym pječa dalšeho wysokeho komandera Hisbollah morili.
Trump zacpěwa migrantow
Za Palestinu demonstrowali
Zelenskyj žada sej wjace brónjow
Borrell: Róla EU tragedija
Strasbourg (dpa/SN). Społnomócnjeny EU za wonkowne naležnosće Josep Borrell je w narěči k róčnicy teroroweho nadpada Hamas na Israel wobžarował, zo su čłonske staty Europskeje unije nastupajo Bliski wuchod pačene a zo njemóže EU tohodla w diplomatiskich iniciatiwach sobu skutkować. Zo njeje Europa w tutym konflikće přitomna, je „tragedija“, Borrell wčera wječor w Europskim parlamenće rjekny. Europa je za to zamołwita, so nastanje zaso nadźija na měr na Bliskim wuchodźe, wón rjekny.
Borrell zakitowaše znowa jasnje poziciju čłonskich krajow EU kaž Španiskeje, Irskeje a Belgiskeje, kotrež kritizuja reakciju Israela na terorowy nadpad jako přehnatu a kiž žadaja sej wot knježerstwa ministerskeho prezidenta Benjamina Netanjahuwa hnydomne rozmołwy na dobro rozrisanja dweju statow.
Šefdiplomat EU kritizowaše „tragedije a zmylki“, kotrež su so po 7. oktobru 2023 stali, kaž wojersku interwenciju Israela w Gazaskim pasmje. Při tym je wjace hač 40 000 Palestinjanow zahinyło.
Muzej njeje „projekt“
Bus do transportera zrazył
Twarstwo w předpisach zamurjowane
Mnichow (dpa/SN). Składnostnje wotewrjenja Mnichowskich imobilijowych wikow ExpoReal je sej šef předsydstwa bydlenskeho koncerna Vonovia, Rolf Bruch, nowu politiku nastupajo twarstwo žadał. „Smy so zamurjowali w předpisach a zakonjach“, wón rjekny, Zwjazk, kraje a komuny měli so tomu wěnować. Tež prezident zwjazka twarskeje industrije Peter Hübner kritizuje „wysoke směrnicy a nadregulowanje“, žadajo sej změnu mentality. „Twarjenje dyrbi zaso zapłaćomne być.“ Jako přikładny mjenuje wón předpisy za hrajkanišća, za škit před haru a za městna za wotstajenje awtow.
Zamołwići měli tež wobkedźbować, zo so nowe twarske maćizny poněčim přesadźa. Beton přichodnje z nowym materialom narunaja. Drjewo firmy „ekstremnych předpisow dla“ wjace rady njebjeru.
To a tamne (08.10.24)
Hłódny paduch je so do pěstowarnje w hessenskim Gernsheimje zadobył. Tam warješe nudle a pražeše sej jeja. Policija nima žane pokazki na to, zo je 24lětny muž něšto pokradnył. Skućićel bě so z woknom namócnje do twarjenja zadobył. Alarmowa připrawa informowaše policiju. Ta 24lětneho na městnje zaja. Přećiwo njemu přepytuja nětko wosebje ćežkeho padustwa dla.
Roboter-dirigent ma přichodnu njedźelu Drježdźanskich sinfonikarjow nawjedować. Projekt „Roboter.Sinfonie“ zbudźa hižo nětko wulku kedźbnosć. Mjezynarodnje zestajeny ansambl hudźbnikow načasneje hudźby nawjeduje spočatnje Magnus Loddgart z Nowergskeje. Po přestawce chce wón nawod orchestra robotarce „MAiRA Pro S“ přewostajić. Trenowali su njewšědnu dirigentku w Drježdźanskej techniskej uniwersiće.
Njespušća wulku wiziju najebać aktualne ćeže
Lubin (SN/mb). Prěni raz Domowina lětsa zastupjerjow politiki a towaršnosće Sakskeje a Braniborskeje na přijeće přeprošuje. Dobry tydźeń do spočatka adwenta chcedźa so na hrodźe w Lubinje zetkać. Město je sydło krajnoradneho zarjada wokrjesa Dubja-Błóta, kotryž je ze spěchowacym čłonom třěšneho zwjazka Serbow. Nimo wuměny nazhonjenjow a prezentacije serbskeje rěče a kultury steji wulki zaměr w srjedźišću zarjadowanja: zo budźe w lěće 2100 po cyłej Łužicy znajmjeńša sto tysac serbowacych ludźi.
Tuchwilu maja drje w Delnjej a srjedźnej Łužicy cyle hinaše problemy: docyła ludźi za gremije narodneje organizacije namakać, kotřiž serbsce móža. Kaž regionalna rěčnica Domowiny w Choćebuzu, Heike Apeltowa, našemu wječornikej praješe, je wobknježenje serbšćiny najwjetše wužadanje při namakanju kandidatow za klětuše wólby župneho předsydstwa w Delnjej Łužicy a zwjazkoweho předsydstwa na hłownej zhromadźiznje třěšneho zwjazka.
