Drježdźany/Zhorjelc (dpa/SN). Katolska cyrkej je loni w Sakskej 2 986 sobustawow zhubiła, zdźěli wčera Němska konferenca biskopow ze sydłom w Bonnje, kotraž je statistiku krajow wozjewiła. Ličba je mjeńša hač lěto do toho, hdźež ­statistikarjo 3 862 wosobow zličichu. Kaž z wuhódnoćenjow dale wuchadźa, pak mějachu w Drježdźansko-Mišnjanskim biskopstwje mjenje křćiznow a wosobow, kotřiž su prěni raz swjate woprawjenje přijimali. Ewangelska krajna cyrkej je hižo spočatk měrca swoje ličby wozjewiła. Tam je 10 407 wosobow ze cyrkwje wustupiło. To je nimale samsna suma, kaž lěto do toho.

Brüssel (dpa/SN). Europska unija je ­z Ukrainu hladajo na wójnu Ruskeje dojednanje nastupajo wěstotnu kooperaciju a dołhodobnu podpěru wotzamknyła. Dokument su ukrainski prezident Wolodymyr Zelenskyj, prezidentka komisije EU Ursula von der Leyen a społnomócnjeny EU za wonkowne naležnosće ­Charles Michel wčera na wjerškowym zetkanju EU w Brüsselu podpisali.

Zwjazkowy kancler Olaf Scholz (SPD) mjenowaše zrěčenje z Ukrainu „znamjo solidarity w ćežkich časach“. Zelenskyj so dźakowaše, prošeše pak zdobom wo dalšu pomoc krajow EU za spěšne dodawanje bróni a municije.

W dojednanju rěka: „Europska unija je rozsudźena, Ukrainje a jeje wobydlerjam dale tak dołho a intensiwnje kaž je trjeba, politisce, financnje, hospodarsce, humanitarnje, wojersce a diplomatisce pomhać.“ Brüssel chce Ukrainje přilubjenu pomoc 50 miliardow eurow tak spěšnje kaž móžno přewostajić.

Wósliki Aloisa Rappa z Ochsenhausena su chětro małke a mjez wopytowarjemi dwora wulkosće dla chětro woblubowane. Na cyłkownje 3 000 kwadratnych metrow wulkej pastwje je dosć a nadosć městna za 15 wóslikow, kiž docpěja wulkosć maksimalnje 86 centimetrow. Jelizo su skoćata wosebje małke mjenuja je ­fachowcy mikro-wósliki. Swójsku heju pak maja tež najmjeńše eksemplary a sej majkanje samo wunuzuja.

Fanojo britiskeho koparskeho narodneho mustwa maja so kónc tydźenja zaso do Gelsenkirchena nawróćić. To je za nje hubjeny wusud, wšako njejsu wo měsće zahorjeni, tak znajmjeńša twjerdźi to žurnalist a fan Paul Brown, kiž rěčeše wo „mazanej dźěrje“. Wyša měšćanostka ­Karin Welge Gelsnekrichena prosy fanow nětko wo spokojnosć a ma wuprajenja Browna za ataku.

„Pace e bene – skromnje žiwy być z Klaru a Francom“ je hesło lětušich nabožnych dnjow. Dźěći a młodostni ze serbskich wosadow putnikowachu wčera do Róžeńčanskeje hnadowneje cyrkwje.

Róžant (mj/SN). „Dźěćom, na wjesołe wašnje a w zhromadnosći wěru dale dać, je mi wulke wjeselo“, praji Anastasia Rawerec přewodnica Ralbičanskich dźěći. Wjeršk tutoho tydźenja je kóždolětne putnikowanje do Róžanta, do hnadowneje cyrkwje. Najdlěši procesion, 157 dźěći, bě sej wčera z Chrósćic do swjatnicy katolskich Serbow doběžał, najkrótši, 22 dźěći, z Baćonja. Tak běchu krótko po dźesaćich dołhe rynki dźěći a młodostnych wot sydom do 15 lět z daloka widźeć. Budyscy dźěći su jako prěnje Róžant docpěli, jako posledni přińdźechu Pančanscy. Cyrkej běše hač na poslednje městno wobsadźena. Na Božej mši knježeše wjesoła atmosfera. Spěwy je kapała z Chróšćanskeje wosady přewodźała.