Wobydlerjo lěsneho protestneho campa njedaloko zawoda awtotwarca ...
Krajny rada wotstupi
Kandidatka žada sej zastojnstwo
Přepytowanja tež w Mnichowje
Mnichow (dpa/SN). W zwisku z racijemi po zakazu Hamburgskeho islamskeho centruma su tež w Mnichowje rumnosće přepytowali. Něhdźe 30 policistow je so dźensa rano do twarjenja podało, w kotrymž je Bayerske islamske zjednoćenstwo zaměstnjene, powěsćernja dpa rozprawja. Policisća sćazachu zamóženstwo zjednoćenstwa a dalše dopokazy skutkowanja. Při tym měrjachu so w prěnim rjedźe na nošaki datow.
Hamburgski islamski centrum a toho wotnožki su dźensa zakazali. W tym zwisku su policisća srjedźišćo zjednoćenstwa w Hamburgu wobsadźili a mošeju, kotraž je znata jako „módra mošeja“, zawrěli. Centrum běchu kónc lońšeho lěta zhromadnje z 54 dalšimi objektami hižo raz přepytowali. Přeslědźili běchu objekty tež w Bayerskej, Berlinje, Hessenskej a Sewjerorynsko-Westfalskej.
Islamski centrum je wažne srjedźišćo propagandy iranskeho režima w Europje. Hamburgski zarjad za wustawoškit jón hižo wjele lěta wobkedźbuje. Stajnje zaso jewja so žadanja, centrum zawrěć.
Biden chce cofnjenje rozkłasć
Wiceprezidentka USA Kamala Harris prěnju jězbu wólbneho boja zahajiła
Washington (dpa/SN). Prezident USA Joe Biden chce přichodnu nóc w narěči ameriskemu ludej rozkłasć, čehodla je so wón z boja wo zastojnstwo prezidenta w USA wróćo sćahnył. Tole je 81lětny demokrat na swojej internetnej stronje připowědźił. Jeho naměstnica Kamala Harris, kotraž wojuje nětko město swojeho šefa wo prezidentstwo, dóstawa za swój wólbny bój wjele podpěry.
Narěč Bidena w běrowje Oval Office Běłeho domu planuja w 2 hodź. srjedźoeuropskeho časa. 81lětny pisa, zo chcył rozkłasć, što ma nětko předwidźane a kak chce swoje zastojnstwo zakónčić. Wčera bě so demokrat po infekciji z koronawirusom ze swojeho priwatneho domu w Rehoboth Beach stata Delaware do stolicy USA, Washingtona wróćił.
Strózby stawiznopis
Přewjele mortwych wjelkow
Berlin (dpa/SN). Ličba namakanych mortwych wjelkow w Němskej je mjeztym tak wulka, zo móža jenož hišće kóžde druhe zwěrjo wobšěrnje přepytować. Hač do spočatka meje je kóždy mortwy wjelk do kompjuteroweho tomografa a na secěrowanske blido přišoł, zdźěla Leibnitzowy institut za přepytowanje coologiskich a dźiwich zwěrjatow w Berlinje. Nětko to hladajo na wjace hač sto mortwych wjelkow wob lěto wjace njezdokonjeja.
Njedawno su w instituće 1000. mortweho wjelka přepytowali. Něhdźe tři štwórćiny tutych wjelkow je při wobchadnych njezbožach zahinyło. Kóžde dźesate zwěrjo su ilegalnje třělili, byrnjež wjelki w Němskej jako kruće škitane zwěrjo wot hońtwy wuwzate byli. Wot lěta 1990 su 17 wjelkow legalnje zatřělili.
To a tamne (24.07.24)
Balony wotpadkow ze Sewjerneje Koreje su na ležownosći prezidentskeho palasta w južnokorejskej stolicy Seoulu přizemili. Po informacijach wěstotneje słužby njewobsteji strach kontaminacije. Je to druhi króć, zo sćele Pjöngjang wotpadki do Južneje Koreje. Pječa reaguja na južnokorejskich aktiwistow, kotřiž sćelu z balonami lětaki do komunistiskeho kraja. Seoul nětko zaso z wótřerěčakami podłu mjezy swojeho susoda agituje.
Kölnsko-Bonnske lětanišćo zlemili su klimowi aktiwisća dźensa rano. Pjeć ludźi je so na čarje přilěpiło, kotrež wužiwaja lětadła, zo bychu čaru wotlěta a přizemjenja docpěli. Lětanišćo dyrbješe dźěło najprjedy raz přetorhnyć. Aktiwisća běchu groćany płót lětanišća přerězali. Demonstranća skupiny Poslednja generacija žadaja sej kónc fosilnych energijowych nošakow hač do lěta 2030.
Palestinjenjo so wujednali
Ramallah (dpa/SN). Lěta dołho znjepřećelenej skupinje Palestinjanow Fatah a militantno-islamistiska Hamas stej so pozdatnje wujednałoj. Po informacijach chinskich statnych medijow stej so wobě stronje w zhromadnej deklaraciji na to dojednałoj, pačenje přewinyć a jednotu Palestinjanow sylnić. Moderatna organizacija Fatah prezidenta Mahmuda Abbasa kontroluje awtonomnu kónčinu w kraju zapadnje Jordana. Hamas bě 2007 móc w Gazaskim pasmje přewzała.
Borrell bojkotuje Madźarsku
Brüssel (dpa/SN). Społnomócnjeny EU za wonkowne prašenja Josep Borrell je jězbow madźarskeho ministerskeho prezidenta Viktora Orbána dla připowědźił, zo wot Madźarskeje planowane zetkanje wonkownych ministrow w Budapesće bojkotuje. Wón chcył město toho po dowolowej přestawce na tajke zetkanje do Brüssela přeprosyć. Borrell je so ze swojim rozsudom přećiwo woli Němskeje, Španiskeje a Luxemburga přesadźił.
Pjenjezy Zwjazka za personal
