Zelenskyj na fronće
Charkiw (dpa/SN). Ukrainski prezident Wolodymyr Zelenskyj je dźensa rozkazowanišćo ukrainskeje armeje njedaloko městačka Wowčanska při mjezy Ruskeje wopytał, hdźež tuchwilu wosebje zasakle wojuja. „Tutón wotrězk je sobu najstrašniši“, rjekny šef staba. Ruske jednotki běchu w meji mjezu pola Wowčanska na wuchodźe kraja překročili. Wot toho časa tam bitwa howri. W susodnej kónčinje wokoło Donjecka su ruske jednotki mjeztym dalšu wjes zdobyli.
Pistorius na mórskim manewrje
Honolulu (dpa/SN). Zakitowanski minister Boris Pistorius (SPD) je na wjace dny trajacu jězbu do indopacifiskeje kónčiny dolećał. Prěnja stacija bě dźensa zwjazkowy stat USA Hawaii, hdźež so němska marina na wot USA nawjedowanym mórskim manewru wobdźěli. Němska chce zhromadne dźěło z politiskimi partnerami w regionje wutwarić. Na mórskim manewru „Rimpac“ wobdźěla so wójnske łódźe ze 29 krajow. Němska sćele fregatu a zastaransku łódź.
Kable železnicy zapalili
W serbiskim Šabacu njedaloko stolicy Běłohroda su ludźo wčera ...
Israel: Turkowsku wuzamknyć
Tel Aviv (dpa/SN). Po hroženjach turkowskeho prezidenta Recepa Tayyipa Erdoğana přećiwo Israelej, je sej israelski wonkowny minister Israel Katz žadał, Turkowsku z Nato wuzamknyć. „Erdoğan je Turkowsku na čłona iranskeje wóski złeho přeměnił“, Katz wčera wječor rjekny. Turkowska po jeho słowach terorowu organizaciju Hamas hospoduje. Katz wšěch čłonow Nato namołwješe, „Turkowsku hnydom wuzamknyć“. Erdoğan bě Israelej wčera z wojerskim zasahnjenjom hrozył, podobnje kaž w Hórskim Karabachu abo w Libyskej. Israelej je tole dopokaz, zo Turkowska zasady Nato rani, wšako hrozy, zo do demokratiskeho kraja zaćehnje. „USA a wšón zapadny swět dyrbjeli Erdoğana zasudźić a jeho zahubne aktiwity skónčić“. Po spočatku wójny Israela přećiwo Hamas w Gazaskim pasmje běchu so poćahi mjez Israelom a Turkowskej raznje pohubjeńšili.
Wólbna reforma zdźěla zběhnjena
Karlsruhe (dpa/SN). Zwjazkowe wustawowe sudnistwo je dźensa reformu wólbneho prawa zwjazkoweho knježerstwa z lěta 2023 jako wustawu ranjacu zastopnjowało a zdźěla zaso zběhnyło.
Hłowny dypk bě zběhnjenje tak mjenowaneje klawsle zakładnych mandatow. Po njej smědźachu politiske strony tež potom do zwjazkoweho sejma zaćahnyć, hdyž při wólbach drje měnje hač pjeć procentow docpěchu, za to pak dyrbjeli we wólbnych wokrjesach znajmjeńša tři direktne mandaty zdobyć. Z tutoho zakonskeho rjadowanja lěta 2021 je Lěwica profitowała. Koalicija SPD, FDP a Zeleni chcychu z nowym rjadowanjom zwjazkowy sejm na jenož hišće 630 zapósłancow pomjeńšić.
Šmórnjenje klawsle zakładnych mandatow by wosebje CSU w Bayerskej trjechiło. Při wólbach 2021 bě sej CSU po wšej Němskej 5,2 procentow hłosow zdobyła. Wostanje-li CSU 2025 pod pjeć procentami, by wona ze zwjazkoweho sejma zlećała, byrnjež sej w Bayerskej najwjace direktnych mandatow zdobyła.
Namjet CDU žněje kritiku
Diskusija wo šmórnjenju wobydlerskeho pjenjeza za dźěła njezwólniwych
Berlin (dpa/SN). Generalny sekretar CDU Carsten Linnemann zbudźa ze swojim namjetom, tak mjenowanym totalnym zapowědźerjam dźěła wobydlerski pjenjez šmórnyć, dosć kritiki. Zeleni, Lěwica a socialne zwjazki wumjetuja Linnemannej populizm a našćuwanje ludu. FDP žada sej daloko sahace přiwótřenja. Mjeztym bu znate , zo zwjazkowe knježerstwo wobydlerski pjenjez klětu po wšěm zdaću njezwyši.
Linnemann je so za to wuprajił, wjace hač 100 000 ludźom w Němskej wobydlerski pjenjez dospołnje šmórnyć. „Statistiska pokazuje, zo njejsu tući ludźo zasadnje zwólniwi na dźěło chodźić“, nowiny Linnemanna cituja. Stat dyrbi potom z toho wuchadźeć, zo njejsu tući ludźo potrěbni. Potom dyrbjeli jim zakładne zwěsćenje kompletnje šmórnyć.
Stajna kapka ...
To a tamne (30.07.24)
Hoberskeho afriskeho pytona namakał je psyk w Korutanskej, jako ze swojim wobsedźerjom so přechodźujo w lěsu čušleše. Wobsedźer natoči spěšnje hišće widejo, prjedy hač so had njedaloko Wörtherskeho jězora w lěsu zminy. Fachowča za hady sej widejo wobhladawši wobkrući, zo njeje had jědojty. Wotkal hoberski pyton pochadźa, njeje znate. Najebać to su wohnjowi wobornicy lěs přepytali a hada skónčnje popadnyli.
Wot wulkeje wody sobu storhnjene awto su po wosom lětach w Delnjej Bayerskej zaso namakali. Masy wody běchu jězdźidło 2016 sobu wzali. Awto wosta we wužłobinje tčacy, pěski rěki je poněčim pokrychu. Při twarskich dźěłach při awstriskej mjezy su je nětko namakali, pjeć metrow pod zemju. Papjery ležachu hišće w armaturowym fašku. Wobsedźer pak hižo w Němskej njebydli.
Serbja sylnje na putnikowanju zastupjeni
Wulka syła serbskich ministrantkow a ministrantow je so wčera na mjezynarodne putnikowanje do Roma podała. Tydźeń woni tam nětko přebywaja. Tež bamža chcedźa zetkać.
Róžant (SN/MG). Hołk a tołk knježeše wčera před putniskej cyrkwju w Róžeńće, jako podachu so serbscy ministranća a ministrantki na mjezynarodne putnikowanje do Roma. Dekan Wito Šćapan wužohnowaše jich na nyšporje, prjed hač so wšitcy do hižo čakacych pjeć busow nawalichu. Z biskopstwow Drježdźany-Mišno a Zhorjelc wobdźěła so dohromady 770 putnicow a putnikow. Mjez nimi je tež tójšto dorosćenych přewodnikow. Něhdźe 180 Serbowkow a Serbow so na putnikowanju wobdźěli. Putnikowanje wotměje so lětsa pod hesłom „Z tobu“. Wotpowědnu hymnu putnikowanja zaspěwachu serbscy putnicy hižo w Róžeńće. Prěnja stacija po puću do swjateho města běše Mnichow. Tu so wšitcy putnicy dweju biskopstwow prěni raz zetkachu. Při rowje swjateho biskopa Bena wužohnowaše jich Drježdźansko-Mišnjanski biskop Heinrich Timmerevers. 17 busow poda so po tym w kolonje dale na směr juh. Dźensa dopołdnja su wšitcy derje do hotela dojěli.
Mjezsobne nadpady
Kijew (dpa/SN). Ruske wojerske lětadła su Charkowsku kónčinu na wuchodźe Ukrainy znowa masiwnje nadběhowali. Při tym su wjes Wowčansk z pjeć wulkimi bombami trjechili. Nimo toho atakowachu ruske bojowe lětadła zepěranišća ukrainskeho wójska. Ukraina porno tomu je rusku wolijowu rafineriju něhdźe sto kilometrow w kraju z trutami trjechiła. Ruski powětrowy škit je ukrainske truty w druhich regionach kraja wotwobarał, samo w Pětrohródskej kónčinje.
Linnemann žněje kritiku
Berlin (dpa/SN). Generalny sekretar CDU Carsten Linnemann žněje ze swojim žadanjom, dźěło wotpokazowacym přijimarjam wobydlerskeho pjenjeza zakładne zawěsćenje dospołnje šmórnyć, kritiku ze swójskeje strony. Socialne křidło CDU kritizuje namjet Linnemanna jako njerealistiske. Linnemann bě sej w rozmołwje z nowinarjemi žadał, 10 000 ludźom wobydlerski pjenjez kompletnje šmórnyć, dokelž nochcedźa dźěłać.
Šěsć kandidatow za předsydu
