Köln (dpa/SN). Ličby branše online-hrow pokazuja na spomaleny rozrost. 2021 powjetši so ličba games-předewzaćow wo 20 procentow na 749, 2023 wu­činješe plus hišće 15 procentow (na 908). Wo­srjedź lěta 2024 bě jich 948 a tak štyri procenty wjace hač hišće lěto do toho. Přistajenych je pola wuwiwanskich studijow a wudawaćelow tuchwilu 12 048 ludźi, štož je tři procenty wjace hač hišće loni. Samsny čas loni wučini rata rozrosta hišće sydom procentow. Wosebje mjeńše studija poněčim zawru. Wjetše zawody su tohorunja potrjechene, ale dawno nic tak jara kaž njewotwisne mjeńše firmy. Cyłkownje pak branša ­online-hrow dale rozrosće: Techniske móžnosće bywaja dale a lěpše a naprašowanje stupa. Ale wunoški lětsa ­prěni raz spaduja. Za čas korony pak su čim razantnišo stupali. Na mjezynarodnych ­wikach maja němske předewzaća jenož mały podźěl. Online-hry, kotrež so w Němskej programěruja, docpěwaja ­ně­hdźe pjeć procentow globalnych wu­noškow. Wot tutych pjeć procentow profituja mjezynarodne firmy ze sydłom w Němskej najbóle.

Korčmarjej z Mannheima njebě wědome, zo je hósć hišće na nuzniku hosćenca. Tuž hosćenc po swjatoku na zwučene wašnje zamkny. Muž, kiž bě wjace hač štwórć hodźiny na hajzlu sedźał, dyrbješe potom hišće wjace hač hodźinu w hosćencu wutrać, policija zdźěli. Dokelž sej žaneje rady njewědźeše, wón nuzowe čisło zazwoni. Přez wokno jeho zastojnicy wuchowachu. Korčmar policistam slubi, zo budźe w přichodźe před zawrjenjom nuzniki přepruwować.

Maće stres w pruwowanskej fazy? Studenća w porynsko-pfalcowskim Koblenzu maja nětko naprawu, z pomocu kotrejež hodźi so stres přewinyć. „Little Joe“ – pedagogiski psyk je specielnje wukubłany. Z nim móža so studowacy zaběrać, hrajkać a jeho wězo tež majkać. Žónka Little Joe zdobom při wažnych terminach přewodźa a wotpinanje zaruča.

Vatikan (B/SN). Swjaty wótc je na zetkanju z afghanskimi wosadami w Italskej teror w jich ródnym kraju a Pakistanje wótrje zasudźił. „W mjenje Boha njesmě so hida, namóc a zacpěwanje ludźi zawinować. Nabožina nima so instrumentalizować. W tutej situaciji je nabožina runja konfrontaciji, kotraž wjedźe k namócnym njeskutkam.“

Miliony pokradnyli

Luxemburg (dpa/SN). Po tym zo běchu Caritu w Luxemburgu wo miliony eurow zjebali, žada sej arcybiskop Jean-Claude Hollerich nětko dospołne wuswětlenje pada. Cyłkownje jedna so wo 61 milionow eurow, kotrež běchu njeznaći z kontow pomocneho skutka pokradnyli. Wóndano zarjadowany krizowy wuběrk biskopstwa ma nětko z justicu zhromadnje pad rozrisać.

Nowy posoł

Berlin (dpa/SN). Načolni politikarjo CDU kritizuja postupowanje amploweje koalicije nastupajo financowanje pomocy za Ukrainu. „To njesmě poslednje słowo być. Dyrbimy Ukrainu podpěrać“, měni sewjerorynsko-westfalski ministerski prezident Hendrik Wüst na prěnim wuradźowanju gremijow CDU po lětnjej přestawce w Berlinje. Hladajo na napjate etatowe poło­ženje njeje jasne, kelko pjenjez Němska klětu Ukrainje přewostaji. Zwjazkowy financny minister Christian Lindner (FDP) chce jenož pjenjezy k dispoziciji stajić, jelizo je financowanje w etaće zaručene.

Njewjedra wohenje zawinili

Athen (dpa/SN). Njewjedra na zapadźe a sewjeru Grjekskeje su w minjenych 24 hodźinach lěsne wohenje zawinili. Cyłkownje je 44 wohenjow wudyriło. Znajmjeńša dźesać je błysk zawinił, zdźěli minister za škit wobydlerjow a klimy ­Vassilis Kikilias na platformje X. Situacija je ekstremna, fachowcy wobkrućeja. Po jich słowach je změna klimy přičina ekstremnych wjedrowych podawkow.

„Přiměr je poslednja šansa“