Słowa kaž worjech?
To a tamne (03.09.24)
Powostanki sławneje łódźe „Titanic“ rozpaduja. Tole dokumentuja wobrazy najnowšeje ekspedicije slědźerjow k podnurjenej łódźi w Atlantiskim oceanje. Tak je dźěl prědnjeho kónca łódźe wotpadnył. Dopokaz to přiběraceho rozpadowanja wocla w „njepřećelskej mórskej wokolinje“. „Titanic“ bě so 1912 po zražce z lodowcom podnuriła. Po dołhim pytanju běchu wrak 1985 něhdźe 3 800 metrow hłuboko w morju namakali.
Swój dotalny swětowy rekord při póžěranju hotdogow přetrjechił je Joey Chestnut z USA. Na wšěch 83 kołbaskow w całće je 40lětny w běhu dźesać mjeńšin w Las Vegasu zjědł. Dotalny rekord wučinješe 76 hotdogow. Jeho konkurent Takeru Kobayashi z Japanskeje je swój dotalny rekord tohorunja polěpšił, docpě pak „jenož“ 66 kołbaskow. Dobyćer móžeše myto 100 000 dolarow sobu domoj wzać.
Wola naslědnika Weselskeho
Berlin (dpa/SN). Najwyši organ Dźěłarnistwa lokomotiwnikow Němskeje GdL, tak mjenowana generalna zhromadźizna, je so dźensa w Drježdźanach zešła, zo by naslědnika wjelelětneho předsydy dźěłarnistwa Clausa Weselskeho wuzwoliła. Po 16 lětach na čole zastupnistwa lokomotiwnikow a mnohich dołhich tarifowych rozestajenjach woteńdźe 65lětny na wuměnk. Móžny naslědnik je dotalny městopředsyda Mario Reiß. Tón pochadźe runje tak kaž Weselsky ze Sakskeje.
Bamž na dołhu jězbu so podał
Rom (dpa/SN). Na najdlěšu wukrajnu jězbu swojeho zastojnstwa je so bamž Franciskus dźensa podał. 87lětna hłowa katolskeje cyrkwje chce přichodnych dwanaće dnjow štyri kraje juhowuchodneje Aziskeje a Oceaniskeje wopytać. K zahajenju wočakuja jeho w Indoneziskej, z wjace hač 240 milionami muslimow na wobydlerjach najbohatši muslimski kraj swěta. Dalše stacije su Papua-Nowa Guinea, Wuchodny Timor a Singapur.
Tež druhim popłatki skrótšić
Protestowacy sej dojednanjez Hamas žadaja
Tel Aviv/Gaza (dpa/SN). W Israelu statysacy ludźi protestowachu a sej žadachu, zo ma knježerstwo hnydom zrěčenje z islamistiskej Hamas wobzamknyć. Protesty su wot zahajenja wójny w Gazaskim pasmje drje najwjetše. Přičina toho su namakane ćěła šěsć zastajencow. Třěšny zwjazk dźěłarnistwow je dźensa ludźi ke generalnemu stawkej namołwjał, zo móhli wjace ćišća na šefa israelskeho knježerstwa Benjamina Netanjahuwa wukonjeć.
Při protestach w Tel Avivje a druhich městach kraja su wobdźělnicy z policistami wojowali. Kaž medije w Israelu rozprawjeja, su zastojnicy wjele ludźi zajeli. Dale organizatorojo zdźěla, je so jeničce w Tel Avivje 300 000 ludźi zešło. Oficialnych ličbow tuchwilu žanych njeje.
Zranjeni po ruskich nadpadach
Kijew/Moskwa (dpa/SN). Ruska je minjenu nóc znowa susodnu Ukrainu z trutami a raketami nadběhowała. W stolicy Kijewje staj so wobydlerjej zraniłoj, měšćanosta Witalij Kličko zdźěli. Na zapadźe města su wjacore wohenje wudyrili. Rakety su mjez druhim staciju podzemskeje železnicy wobškodźili.
Hórje trjechiło je město Sumy njedaloko ruskeje mjezy. Tam zličichu 18 zranjenych po ruskim raketowym nadpadźe. Rakety su wjacore bydlenske domy kaž tež kubłanišćo trjechili.
Mjeztym Ruska ze swojej ofensiwu w kónčinje wuchodneho ukrainskeho Donjecka dale pokročuje. Po informacijach ruskeho zakitowanskeho ministerstwa w Moskwje su ruske jednotki wjes Wyjimka na sewjeru Donbasa zdobyli. Ukrainski generalny stab wojowanja wokoło wsy wobkrući. Nadběhi su pak pječa wotwobarali. Wyši rozkazowar ukrainskeho wójska Olexander Syrskyj přizna, zo je połoženje na fronće wobćežne, dokelž su ruske jednotki po ličbje wojakow a po mnóstwje wojerskeho materiala sylniše.
Strony amploweje koalicije słabe
Wólby krajneju sejmow w Sakskej a Durinskej nowe połoženje wunjesli
Drježdźany (dpa/SN). Po wólbach krajneho sejma pytaja w Sakskej nětko nowe nošne knježerstwo za přichodnych pjeć lět. Ministerski prezident Michael Kretschmer, ze swojej CDU najsylniša móc w kraju, při tym koaliciju ze Zwjazkom Sahry Wagenknecht (BSW) njewuzamkuje. „Njejsym sej to přał, ale dyrbju realitu na wědomje brać“, rjekny politikar CDU dźensa rano w rozhłosu.
Sobupředsydka BSW, Amira Mohamed Ali, widźi samo zhromadnosće ze sakskej CDU z Michaelom Kretschmerom. Nastupajo prašenje dodawanja brónjow za Ukrainu a wotpokazanja nastajenja nowych raketow USA w Němskej je wona „podobne signale Kretschmera słyšała“.
Kretschmer so jej znajmjeńša w tutym prašenju spřećiwja, pokazujo na wěstotne zajimy Europy.
Mandat za změnu
impresum
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238
tel.: 03591 / 577 232 faks: 03591 / 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Serwis za abonentow: 577 263
Předań nawěškow: Jadwiga Šołćic 577 220 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (02.09.24)
Kwasna bijeńca je we Wuppertalu zasadźenje policije zawinowała. Při tym so pjeć policistow zrani. Hosćo do zastojnikow bijachu, kopachu a jich kusachu. Policiju běchu sobotu wječor wołali, po tym zo by k namócnosćam mjez hosćimi dóšło. Po prěnich dopóznaćach běchu so ludźo ze škleńcami a blešemi do so dali. Jako zastojnicy dojědźechu, jich kwasarjo nadběhowachu. Policisća zasadźichu popjerjowy spray a elektriske šokowaki.
Technikarja dajił a jemu ze smjerću hrozył je sobudźěłaćer wobchoda žiwidłow w Starnbergu pola Mnichowa. 27lětny fachowc za klimowe nastroje chcyše defektny zamróžak porjedźeć. Sobudźěłaćer wobchoda njebě pak z toho dźěłom spokojom a hrožeše, zo jeho mori, hdyž chłódničku nablaku njeporjedźi. Policija je přepytowanja přećiwo 26lětnemu přistajenemu zahajiła.
Wočakuje wyše přinoški
Berlin (dpa/SN). Zwjazkowy minister za strowotnistwo Karl Lauterbach (SPD) wočakuje spočatk přichodneho lěta stupace přinoški za chorobne a hladanske zawěsćenje. Minister wopodstatni tole z pobrachowacymi wažnymi reformami zašłeho časa. „Nětko dyrbimy inwestować, tež ze srědkami płaćerjow přinoškow“, wón rjekny. Jenož tak so trěbne reformy strukturow poradźa. Wo kelko so přinoški zwyša, njemóžeše minister rjec.
Barbu na Wagenknecht pryskał
Erfurt (dpa/SN). Załožerku strony BSW Sahru Wagenknecht su na wólbnym bojowym zarjadowanju w Erfurće z barbu napryskali. Na to dyrbješe wona swój wustup krótkodobnje přetorhnyć a jewišćo wopušćić. Skućićel bě čerwjenu barbu na Wagenknecht ćisnył a ju trjechił. Rjadowarjo muža wotwjedźechu. Wagenknecht wosta njezranjena, wuńdźe pak „ze stróželemi“, kaž wona rjekny.
