Hdyž je so magacin „Spiegel“ 2017 ze zemrětym Helmutom Kohlom rozžohnował, su pisali, zo njeje jeho najwjetša zasłužba němska jednota, ale jednota Europy bjez hranicow. Tón proces je z ryzy idealizma a bjez narodneho egoizma doprědka ćěrił. A kak dźensa wupada? MinoritySafePack je ludowa iniciatiwa třěšneho zwjazka FUEN, kotrejež zaměry su w tutym europskim duchu sformulowane: spěchowanje rěčneje a kulturneje mnohotnosće njewotwisnje wot zajimow wulkich ludow, kotrež so jako „statny lud“ wupěraja. Najebać 1,2 milionaj podpismow Europska komisija hižo šěsć lět zwoprawdźenju iniciatiwy zadźěwa, doskónčny rozsud europskeho sudnistwa hišće njepředleži. Derje, zo FUEN mamy, zwjazk „europskich narodnosćow“, wšako njewobhladuja tež Serbja swój sydlenski rum jako twjerdźiznu w Němskej, ale jako dźěl rěčneho a kulturneho mosta do susodneju krajow. Tohodla přejemy FUEN składnostnje 75 lět wobstaća: „Sto lat, niech żyje nam!“ Marcel Brauman

Plauen (dpa/SN). Piwowe karany dujerskeje hudźby dla klepotaja. Za blidami sedźa ludźo w drastach po bayerskim wašnju, w šatach a kožanych cholowach: Oktoberske swjedźenje abo „Wiesn“ po přikładźe Bayerskeje maja tež w Sakskej dale a wjace přiwisnikow. „Naš swjedźeń je minjene tři lěta widźomnje rozrostł a ma hišće tójšto potenciala“, rjekny ­Thomas Münzer, marketingowy nawoda piwarnje Sternquell w Plauenje. Ze zarjadowanjom „Sternquell Wiesn“ je přede­wzaće jako jedne z prěnich w Sakskej do noweje sezony startowało. Při prěnim zarjadowanju tutoho razu před třomi lěta su wjacore tysac hosći zličili. Loni bě jich hižo wokoło 20 000. „Dokelž sej žadyn ­zastup nježadamy, móžemy ličbu wopytowarjow jenož trochować.“

Piwarnja přeco hišće najwjetši dźěl swojeho kóždolětneho wobrota we wobchodach nadźěła, marketingowy šef rjekny. „Oktoberski swjedźeń pak wužiwamy, zo bychmy swoje piwo jako dźěl vogtlandskeje domizny prezentowali a emocionalnje powyšili.“

Powěsć je ludźi šokowała: Hotelowy a kongresowy dom Lindner w Choćebuzu kónc lěta swoje durje zawrje. Něhdźe 50 sobudźěłaćerjow dźěło zhubi. Nawodnistwo domu chce jim pomhać, w druhich hotelach nowe dźěło namakać, kaž zdźělichu. Wyši měšćanosta Tobias Schick rozsud nawodnistwa hotela wobžaruje. Wón njeznjese so z inwesticijemi w druhich hotelach a tež nic z rozmachom w zwisku ze strukturnej změnu, kotryž Choćebuz po jeho słowach tuchwilu dožiwja. Nimo toho haći zawrjeny dom prócowanja města wo dobru městnosć wikow, kongresow a wulkich zarjadowanjow. Hotel ma 189 stwow a wjacore kongresowe žurle. Foto: Michael Helbig

Na powjazu Bosporus přeprěčił je ekstremny sportowc Jaan Roose z Estniskeje. 32lětny balansowaše 47 mjeńšin dołho 165 metrow wysoko nad mórskej wužinu pola Istanbula. Roose je prěni čłowjek, kiž je přirodny zadźěwk na tute wašnje přewinył. Na wobrazach bě widźeć, kak so sportowc při wětřiku z dołhej žerdźu w ruce bědźi. Hłowny sponsor zarjadowanja je napojowe předewzaće Redbull. Roose bě přewšo zbožowny, wšako je „do stawiznow zašoł“, wón rjekny.

Na wšěch 143 000 pašowanych cigaretow namakali so cłownicy na němsko-pólskej mjezy w awće. Zastojnicy kontrolowachu awto na pomjeznym přechodźe Küstrin-Kietz, zwjazkowa policija zdźěli. 40lětny šofer bě po puću do Berlina. W kófrowej rumnosći awta cigarety ležachu. Přećiwo šoferej su sudniske jednanje cłowneho přeńdźenja dla zahajili.