EU chce škit wjelkow wosłabić
Brüssel (dpa/SN). Zastupnicy čłonskich krajow EU su z podpěru Němskeje zniženje škitneho statusa wjelkow nastorčili. Tole su wjacori diplomaća w Brüsselu nowinarjam wobkrućili. Zwjazkowe knježerstwo tak swój dotalny wid na problematiku wjelkow změni.
Předwidźane je, škitny schodźenk wjelkow wot „kruće škitane“ na jenož hišće „škitane“ znižić. Tak dyrbjało prawdźepodobnje lóšo być, wjelki třěleć. Nadrobnosće to nastupajo pak hišće znate njejsu.
Nětko slěduje dlěši proces wothłosowanja w Brüsselu. Dokument dyrbja wjacorym gremijam předpołožić, mjez druhim zamołwitym ministram wšitkich čłonskich krajow. Hakle potom móže EU formelnje wo to prosyć, škitny status wjelka znižić. Lěta 1979 wotzamknjena Bernska konwencija škita jako ludoprawnisce płaćiwe zrěčenje dźiwje rostliny a zwěrjata w Europje, mjez nimi tež wjelki.
Ze změnu dotalneho kursa reaguje zwjazkowe knježerstwo tež na diskusiju w Němskej, kotraž je hladajo na škody wjelkow dla přiběrajcy agresiwna.
Žadaja sej přiměr za diplomatiju
Skupina statow ze zhromadnej namołwu na Israel a Hisbollah
New York (dpa/SN). Ze žadanjom za 21 dnjow trajacym přiměrom na Bliskim wuchodźe zwyša skupina statow wokoło USA a Němskeje zhromadnje z wažnymi arabskimi krajemi ćišć na Israel a Hisbollah. Bojowa přestawka ma zakład być za diplomatiske rozrisanje konflikta mjez Israelom a milicu Hisbollah w Libanonje kaž tež mjeztym lěto trajaceje wójny w Gazaskim pasmje, rěka w zhromadnym stejišću skupiny dźesać krajow a EU.
Nichtó nima zajim na wjetšej regionalnej eskalaciji, ani ludźo w Israelu ani w Libanonje, dale rěka. Diplomatija njemóže wuspěšna być, hdyž so konflikt dale rozšěrja. Wšitke wobdźělene strony su namołwjene, namjetej za nachwilny přiměr přihłosować a diplomatiske dojednanje zmóžnić. Stejišćo spisali su USA, Němska, EU, Awstralska, Kanada, Francoska, Italska, Japanska, Sawdi-Arabska, Zjednoćene arabske emiraty a Katar.
To a tamne (26.09.24)
Nimale štyri kilogramy kokaina pokradnył je policist w Jendźelskej z aserwatoweje komory policije, a je drogi z pomocu dealera na dróze předawał. Zastojnik so přeradźi, jako titku z wopojnym jědom před šulu dźowki zhubi. Policista su mjeztym pušćili. Namakana titka wjedźeše zastojnikow do běrowa policista. W toho pisanskim blidźe ležachu dalše titki z kokainom. Na to kokain w składźe wažachu a zwěsćichu, zo retomas sćazaneho wopojneho jěda pobrachuje.
Tójšto stresa ma Berlinska policija připowědźeneho wopyta prezidenta USA Joewa Bidena dla. Planowanja běža hladajo na najwyši schodźenk wohroženja „z najwjetšim wotmachom“, policija zdźěla. Biden chce 10. oktobra krótko do zakónčenja zastojnstwa tři dny do Berlina přijěć. Dny do toho su wjacore demonstracije na dobro Israela a Palestiny planowane.
Poskitk za radu
Njebjelčicy/Budyšin (SN). Serbski sejm je so wólbow Rady za serbske naležnosće Sakskeje dla na předsydu Domowiny a zwjazkowe předsydstwo třěšneho zwjazka wobroćił. W lisće Měrćina Krawca, kotryž našemu wječornikej předleži, su sejmarjo Domowinje zdźělili, zo budu zhromadnje ze spěchowanskim towarstwom Smy z.t. sakskemu krajnemu sejmej dr. Tomaša Wornarja z Drježdźan jako kandidata za serbsku radu namjetować. Sakski parlament ma po Serbskim zakonju wo kandidatach serbskich zwjazkow a towarstwow za serbsku radu wothłosować.
Zo njebychu na kóncu Němcy wo zestawje serbskeje rady rozsudźili, poruča Serbski sejm zwjazkowemu předsydstwu Domowiny, na posedźenju pjatk w Slepom nic štyrjoch – kaž je planowane –, ale jenož třoch kandidatow wuzwolić. Wšo dohromady ma serbska rada pjeć radźićelow. Za pjate městno pomjenuje Sakski zwjazk městow a wsow na zakładźe wotuma gmejnow serbskeho sydlenskeho ruma kandidata.
Biden přińdźe do Němskeje
Washington (dpa/SN). Prezident USA Joe Biden přińdźe tři měsacy do skónčenja swojeho zastojnstwa 10. oktobra tři dny do Němskeje. Zaměr wopyta je, „wuski zwisk mjez zjednoćenymi statami a Němskej jako zwjazkarjom a přećelom dale sylnić a ćežišća wothłosować“, Běły dom we Washingtonje zdźěli. W tym zwisku wočakuja, zo so Biden ze zwjazkowym kanclerom Olafom Scholzom (SPD) a zwjazkowym prezidentom Frankom-Walterom Steinmeierom zetka.
Zelenskyj chce Rusku nuzować
New York (dpa/SN). Ukrainski prezident Wolodymyr Zelenskyj je swojich zwjazkarjow w bojowniskej narěči před Bjezstrašnostnej radu UNO naležnje pohonjował, Rusku na bitwišću do kolen nuzować. Wójna njehodźi so z rozmołwami změrować, rjekny Zelenskyj na posedźenju gremija. „Dyrbimy jednać“, wón rjekny. Putin je telko mjezynarodnych zakonjow a prawidłow ranił, zo drje sam z tym njepřestanje. Ruska dyrbjała so k měrej nuzować, Zelenskyj potwjerdźi.
Baerbock: Žana nowa wójna
Přistajeni awtotwarca Volkswagen su dźensa do zahajenja tarifowych ...
Kontrole mjezy njewunošne
Žane němske wudaće SN
Israel bombarduje znowa Libanon
Beirut (dpa/SN). Israelske wojerske lětadła su minjenu nóc znowa objekty islamistiskeje Hisbollah w Libanonje nadběhowali. Bombardowali su mjez druhim składy brónjow, startowe rampy raketow a wojowarjow wot Irana podpěrowaneje milicy, israelske wójsko zdźěla. Detonacije na to pokazuja, zo běchu tam wulke mnóstwa brónjow a municije składowane.
W israelskej pobrjóžnej metropoli Tel Aviv su dźensa rano prěni króć po kóncu meje zaso powětrowy alarm wukazali. W Libanonje startowana raketa bě so hač do wulkoměsta předrěła. Tam bu wona wot israelskeho wójska wottřělena.
Hisbollah zdźěli, zo chcyše z raketu hłowne rozkazowanišćo israelskeje tajneje słužby Mossad zničić. Mossad je po měnjenju Hisbollah hłownje zamołwity za zamordowanje wjacorych wodźacych čłonow milicy a wočiwidnje tež za koordinowane masowe rozbuchnjenje mnohich škričkowych aparatow w Libanonje minjeny tydźeń. Při tym bě so nimale 3 000 ludźi zraniło. Wjace hač dźesać ludźi bě žiwjenje přisadźiło. Dotal njeje jasne, kak je so Israelej poradźiło, w nastrojach rozbuchlinu zatwarić.
