Özdemir nastupi
Stuttgart (dpa/SN). Zwjazkowy ratarski minister Cem Özdemir (Zeleni) chce jako načolny kandidat Zelenych na wólbach krajneho sejma w Badensko-Württembergskej nalěto 2026 nastupić. „Chcu wobydlerjam jako ministerski prezident Badensko-Württembergskeje słužić“, piše Özdemir w lisće wobydlerkam a wobydlerjam zwjazkoweho kraja. Po słowach rěčnicy chce Özdemir zastojnstwo jako zwjazkowy ratarski minister dale wukonjeć.
58lětny běše hižo dlěje kandidat z najwjace wuhladami za načolnu kandidaturu. Tuchwilny ministerski prezident kraja Winfried Kretschmann (Zeleni) nochce hišće raz při wólbach nastupić. Jenož Özdemir je podobnje znaty kaž Kretschmann. Nimo toho móže zwjazkowy ratarski minister na dołhe politiske nazhonjenje zhladować a je pragmatiski, runje tak kaž Kretschmann. Nimi Özdemira ma najwjac wuhladow na zastojnstwo předsyda CDU kraja a frakciski předsyda Manuel Hagel.
To a tamne (28.10.24)
Kónčki wukurjenych cigaretow chowa sej moderatorka Sandra Maischberger jako dopomnjenku na posledni telewizijny interview z bywšim zwjazkowym kanclerom Helmutom Schmidtom. Jedna so wo cyły popjelnik ze zbytkami cigaretow notoriskeho kurjaka. Helmut Schmidt (SPD, 1918–2015) bě za to znaty, zo so wo zakazy kurjenja njestara. Tak dyrbjachu so w telewizijnych studijach stajnje zaso na to nastajić, zo sej Schmidt jednu cigaretu po druhej zapali. Cigareta bě jemu sobu „najwažniši žiwjenski stimulus“.
Atrapa ručneje granaty je w Mišnu zasadźenje policije zawiniła. Njeznaći běchu mału plastowu blešu tak změnili, zo wupadaše kaž ručna granata. Atrapu połožichu před zachod towarstwa „Pisane Mišno“. Zastojnicy atrapu zrumowachu. Nětko pruwuja, hač jedna so wo žort abo hač wobsteji politiski pozadk.
Kak jutrowne jejka a dalše objekty serbskeho herbstwa online ...
Na cyłoněmskim zeńdźenju rěčachu wužiwarjo platformy museum-digital mjez druhim wo wužadanju digitalizacije třidimensionalnych objektow.
Na druhim cyłoněmskim online zeńdźenju wužiwarjow muzejoweje platformy museum-digital tydźenja předstaji Marleen Schindler, wědomostnica Serbskeho instituta, kak je jutrowne jejka jako třidimensionalne modele za digitalnu platformu zapřimnyła a wobdźěłała. Prěni raz tematizowaše so na forumje serbska tema z wužadanjom třidimensionalnych objektow. Prezentacija zbudźi dobry wothłós. Wobdźělnikow zajimowaše wosebje dźěłowy proces, kotryž ma so na blogu jako zjawny přinošk wozjewić.
Sakska ma mjenje dochodow
Drježdźany (dpa/SN). Swobodny stat Sakska dyrbi lětsa a přichodnej lěće z jasnje mjenje dawkowymi dochodami hač w meji wočakowane wuńć. Po informacijach financneho ministerstwa je wuslědk dawkoweho trochowanja z oktobra, zo budźe to lětsa něhdźe jenož 19,1 miliarda eurow a tuž 350 milionow eurow mjenje dochodow. Za 2025 a 2026 budźe to najskerje stajnje 150 milionow eurow mjenje. Komuny móža wotpowědnje noweje prognozy ze snadnje wyšimi dawkowymi dochodami ličić. Hłowna přičina je pozitiwne wuwiće přemysłoweho dawka w mnohich městach a gmejnach.
Scholz chce spěšne rezultaty
New Delhi (dpa/SN). Zwjazkowy kancler Olaf Scholz (SPD) chce spěšnje zrěčenje Europskeje unije z Indiskej wo swobodnym wikowanju přesadźić. K zazběhej swojeho wopyta w New Delhiju žadaše sej na hospodarskej konferency spěšne postupy rozmołwow, kotrež su w lěće 2007 zahajili. Jednanja běchu w lěće 2013 přetorhnyli a před dwěmaj lětomaj zaso zahajili. Předewšěm wysoke indiske cła na awta, škit duchowneho swójstwa farmacijoweje branše a wotewrjenje wikow ratarskeho sektora su ćežišća diskusijow.
Ćežki tropiski wichor Trami je na Filipinach wulke škody ...
Šulerjo maja sami wuknyć
Drježdźany (dpa/SN). Kultusowe ministerstwo Sakskeje chce na 29 wuzwolenych šulach modelowy projekt za digitalne samowuknjenje zahajić. Program z mjenom „DISEL“ steji za wot „wučerja wodźene digitalne zepěranje samowuknjenja“ a ma po słowach ministerstwa wupad wučby redukować, nowe wuwučowanske a wuknjenske metody wuwiwać kaž tež digitalizaciju šulow pospěšić. Šulerki a šulerjo maja z tutym programom samostatnje w šuli abo wot doma nadawki wobdźěłać.
Přewodny material wuzwola wučerjo, kotřiž su tež za hódnoćenje nadawkow zamołwići. Asistencne mocy abo dobrowólni pomocnicy smědźa dohlad na městnje přewzać. Jelizo je projekt wuspěšny, chce kultusowe ministerstwo DISEL na wšitkich sakskich šulach zasadźić.
Bórze z kartku płaćić
Wojacy ze sewjerneje Koreje w Kursku
Kijew (dpa/SN). Po informacijach ukrainskeje tajneje słužby wójska HUR su prěni wojacy ze Sewjerneje Koreje do kónčiny Kursk dojěli. Jednotki běchu do toho na wuchodźe Ruskeje na wojerskich zwučowanišćach wukubłali, zdźěli tajna słužba w swojim kanalu na telegramje. Kónčinu ukrainske jednotki po swojej inwaziji spočatk awgusta hač do dźensnišeho wobsadźeja.
Dotal Ruska k tomu mjelči. Zawěsće šef Krjemla Wladimir Putin přitomnosć sewjerokorejskich jednotkow w Ruskej prěje. W Kursku móhli Sewjerokorejčenjo ruske jednotki w swojim boju podpěrać, region wot ukrainskich jednotkow wuswobodźić. Putin bě na zakónčenju wjerška statow Brics wčera w Kazanje wozjewił, zo stej Ruska a Sewjerna Koreja wobšěrne zrěčenje wo swojim strategiskim partnerstwje wotzamknyłoj, kotrež tež wojerske zhromadne dźěło wobsahuje. Dojednali su so tež na mjezsobnu pomoc za tón pad, jelizo so kraj nadpadnje.
Ukrainska tajna słužba wuchadźa z toho, zo je tuchwilu něhdźe 12 000 wojakow w Ruskej. USA běchu porno tomu rozprawjeli, zo maja dopóznaća wo 3 000 wojakach ze Sewjerneje Koreje w Ruskej.
Wo migraciji hišće njepřezjedni
Ministerscy prezidenća dźensa w Lipsku wuslědki posedźenja předstajili
Lipsk (dpa/SN). Ministerscy prezidenća zwjazkowych krajow pokročuja dźensa ze swojimi wuradźowanjemi w Lipsku. W srjedźišću lětneje konferency su přidatne naprawy hladajo na migracisku politiku a reformu zjawnoprawniskeho rozhłosa. Na spočatku posedźenja knježeše hišće njepřezjednosć. Dźensa připołdnju měještaj sakski ministerski prezident Michael Kretschmer (CDU) a jeho delnjosakski kolega Stephan Weil (SPD) wuslědki wuradźowanjow předstajić.
To a tamne (25.10.24)
Mjeńši transporter je nětko w Solingenje do nadróžneho mosta zajěł. Swědkojo po tym wobkedźbowachu, zo šofer jězdźidła do bliskeho parka ćekny. Policija je skónčnje 45lětneho pjaneho muža z ranami w mjezwoču blisko njezboža lepiła. Kaž so při kontroli wukopa, je wón alkohol pił, njezbožo zawinił pak wón po swojich słowach njeje. Porno tomu twjerdźeše, zo je 17lětny syn z transporterom jěł.
Nakładne awto je w nocy na wčera blisko Marburga we wuskej dróze wsy tčacy wostało. Wosom hodźin dołho je wuchowanje trało, policija zdźěli. Tak měješe nakładne awto žiwidła we wobjimje wjacorych tonow składowane. Kaž šofer twjerdźi, je so wón na nawigaciski nastroj spušćił a tuž do wuskeje dróhi zajěł.
