Köln/Düsseldorf (dpa/SN). W porynskich kónčinach su dźensa w 11.11 hodź. nadróžny karnewal zahajili – koronapandemije dla hinak hač zwučene. Sewjerorynsko-Westfalska je městam dowoliła, tak mjenowane nałožkowe pasma zarjadować. Tam smědźa póstnicarjo pod prawidłom 2G+ swjećić.

W Kölnje wočakowachu tysacy wobdźělnikow: Tamniše měšćanske zarjadnistwo bě cyłe město jako „nałožkowe pasmo“ deklarowało. Tak płaći za karnewalistow po cyłym měsće 2G+: To rěka, zo dyrbja wotchorjeni abo dwójce šćěpjeni być a zo trjebaja přidatny negatiwny test, chiba třeće šćěpjenje.

W korčmach dyrbja trójce šćěpjeni hišće aktualny spěšnotest předpołožić. Porjadowy zarjad chce dodźerženje z městnami kontrolować a w padźe ranjenja bolostne pokuty wukazać. Winowatosć, pod hołym njebjom nahubnik wužiwać, je Köln zběhnył, tež w hosćencu njetrjebaja ludźo za čas póstnic škit před hubu a nosom wužiwać. Přiwšěm su namołwjeni kedźbować.

Wójsko słowjanskeho kraja nadpaduje dalši słowjanski kraj. Na postupowanje imperialnych mocow dopominacu politiku Wladimira Putina raznje zasudźam. To prosće žadyn wuraz swětopolitiskeje zamołwitosće njeje. Grawoćiwy krok Putina přesłapja wšěch tych, kotřiž njejsu Rusku na zakładźe swójskich stawiznow – Wótčinskeje wójny přećiwo Napoleonej a Wulkeje wótčinskeje wójny přećiwo němskim fašistam – kmanu za agresorku měli. Napjatosće na swěće, a tym je zapadne wojerske zwjazkarstwo w minjenych třiceci lětach bjezdwěla polěkowało, njehodźa z wójnu rozrisać. Rěčeć z njepřećelom na jednej runinje, k tomu bohužel dóšło njeje. Zapad móže z wulkej „spokojnosću“ na Rusku pokazować, dokelž je so to stało, štož bě prezident USA Biden wobstajnje wěšćił. Za někotružkuli spokojnosć pak nětko chwile njeje. Z konfliktom dyrbja tak chětře kaž móžno přestać. Problemy rozrisać rěka so w pozicijach zbližić. To pak je nětko ćim ćešo. Axel Arlt

Bratislava (dpa/SN). Štyri lěta po zamordowanju wotkrywanskeho žurnalista Jána Kuciaka a jeho slubjeneje Martiny Kušníroveje chcedźa w Słowakskej přećiwo pozdatnemu nadawkidawarjej znowa sudnisce jednać. Kaž rěčnica sudnistwa Katarina Kudjáková powěsćerni dpa po­twjerdźi, zahaja nowy proces přećiwo milionarej Mariánej Kočnerej a sobuskućićelce přichodnu póndźelu na wosebitym sudnistwje za organizowanu kriminalitu w Pezinoku wuchodnje Bratislavy.

Tehdy 27lětny inwestigatiwny žurnalist a jeho slubjena buštaj 21. februara 2018 w swojim domje we wsy Vel’ká Mača zatřělenaj. Hakle po jeho smjerći wozjewjene reportaže žurnalista wo splećenju politiki a hospodarstwa zbudźichu masowe protesty, na čož dyrbješe słowakske knježerstwo wotstupić. W procesu přećiwo mordarjej Kuciaka běchu Kočnera a jeho komplicowku Alenu Zsuzsovu pobrachowacych dopokazow dla wuwinowali, štož je mjezynarodnje wulke rozhorjenje wuskutkowało. Nětko dyrbitaj Kočner a Zsuzsová, kotrajž druhich njeskutkow w jastwje sedźitaj, znowa před sudnistwo.

Kaž bychu sej to dorěčeli: Předwčerawšim, 22. februara 2022, je we woběmaj uniwersitnymaj chorownjomaj Sakskeje dokładnje 22 dźěći na swět přišło, jěd­naće w Lipšćanskej uniwersitnej klinice a jědnaće w Drježdźanskej. Tak bě druha palencowa ličba woblubowaniša hač prěnja 2.2.22. Tón dźeń bě so w Lipšćanskej klince pjeć ćěšenkow narodźiło, w Drježdźanskej wosom.

Wikowarja falšowanych šćěpjenskich wupokazow je policija w Berlinje lepiła. 19lětny bě z bydlenja swojeju staršeju w měšćanskim dźělu Kreuzberg z wopačnymi dokumentami wikował. Wón bě wupokazy z nalěpkami, lěkarskim kołkom a podpismom w interneće poskićał. Jako chcyše štyri tajke šćěpjenske wupokazy na Dieffenbachowej přepodać, jeho zastojnikaj zaještaj. W bydlenju namakaštaj na to kołki a nalěpki.