Pěstujmy přećelstwo
To a tamne (11.02.22)
Smorčenje muža je minjenu nóc w Drježdźanach zasadźenje wohnjoweje wobory wuwabiło. Něchtó bě so w zasadźenskej centrali přez nuzowe čisło přizjewił a wo mužu rozprawjał, kiž je epileptikar a kiž je we wulkim straše. Z wosebitym gratom móžachu pomocnicy durje bydlenja wočinić a namakachu měrnje spjaceho muža, kiž njebě w žanym času w straše. Hary na schodźe dla tukachu wobydlerjo na padustwo a wołachu policiju. Njedorozumjenje bě spěšnje wujasnjene.
Nabóčne wobhrodźenje zwjazkoweje dróhi přerězałoj staj mužej w Hornjej Pfalcy a měještaj za to kuriozne wopodstatnjenje: Pječa bě jeju wětřik z dróhi stłóčił. Na to běštaj podłu B85 dale jěłoj a njemóžeštaj skónčnje wjace dale. Tuž staj pjeć metrow dołhi kónčk wobhrodźenja z mašinu přerězałoj. Wobeju wočakuje nětko chłostanje.
Přichodnje měrja so na pačenje w towaršnosći
Přednoški wo tak mjenowanych reichsbürgerach běchu w nachilacym so semestrje Sakskeje krajneje centrale za politiske kubłanje hromadźe z ludowej uniwersitu derje wopytane. Nětko přihotuja nowy rjad, kotryž ma wid na prěkimyslerjow a dalšich rozšěrić.
Drježdźany/Budyšin (SN/at). Něšto wjace hač 40 webinaristow je wuwjedźenja na temu „Izolowani w rajchu – hibanje reichsbürgerow w Sakskej“ Drježdźanskeho politologi Sebastiana Trepta předwčerawšim doma na swojej wobrazowce sćěhowało. Kaž hižo často do toho, běchu mjez nimi mnozy, kotřiž dźěłaja w komunalnych zarjadnistwach. Tute su najbóle wot direktnych počinanjow reichsbürgerow potrjechene.
Wojerski manewer zahajeny
Minsk (dpa/SN). Najebać kritiku zapada je Běłoruska dźensa wojerski manewer z ruskimi jednotkami zahajiła. Zwučowanje na juhu bywšeje sowjetskeje republiki njedaloko mjezy k Ukrainje ma dźesać dnjow trać. Zwučować chcedźa „wotwobaranje wonkowneje agresije“, zakitowanskej ministerstwje wobeju krajow zdźělatej. Po informacijach Krjemla maja so ruscy wojacy po zakónčenju manewra zaso do swojich kasernow wróćić.
Wopory wopominała
Jerusalem (dpa/SN). Wonkowna ministerka Annalena Baerbock (Zeleni) je dźensa we wopomnišću holocausta Jad Vashem wot němskich nacionalsocialistow morjenych šěsć milionow Židow wopominała. Zdobom namołwješe wona do konsekwentneho boja přećiwo antisemitizmej. W hali wopominanja je Baerbock wěnc połožiła. Bě to zazběh jeje wopyta na Bliskim wuchodźe. W běhu dnja wočakowaštaj ju wonkowny minister Jair Lapid a ministerski prezident Naftali Bennett.
Wjace pomocy potrěbnym
Kanadiska stolica Ottawa je kruće w rukach šoferow nakładnych ...
CDU šćěpjenja dla hišće waha
Kasy so spjećuja
2G bórze po wšej Němskej nimo?
Magdeburg (dpa/SN). Prawidło „2G“ we wobchodach, po kotrymž smědźa jenož šćěpjeni a wotchorjeni nakupować, móhło hižo bórze wuběžeć. Wjacore zwjazkowe kraje su připowědźili, zo chcedźa na přichodnych wuradźowanjach koronawirusa dla cyłoněmske wotstronjenje tutoho prawidła přesadźić. Mjez nimi su Saksko-Anhaltska, Sewjerorynsko-Westfalska a Porynsko-Pfalca. W mnohich krajach prawidło 2G na zakładźe sudniskich wusudow wjace njepłaći, dalše kraje chcedźa je přichodne dny wotstronić. Ministerski prezident Saksko-Anhaltskeje Reiner Haseloff (CDU) je připowědźił, zo chcyło krajne knježerstwo wotstronjenje 2G přichodnu wutoru wobzamknyć.
Braniborscy wobchodnicy so nadźijeja, zo so połoženje w drobnowikowanju spěšnje zaso polěpši. Tam smědźa wot wčerawšeho tež nješćěpjeni we wšitkich wobchodach nakupować. Krajne knježerstwo bě to předwčerawšim, wutoru, wobzamknyło. Na městnach z wjele ludźimi pak dyrbja ludźo dale nahubnik FFP2 wužiwać. To płaći hač do 23. februara.
A serbske pomniki?
Zeleni za dróše parkowanje
Berlin (dpa/SN) Zeleni w Berlinje žadaja sej spěšne zběhnjenje popłatka za parkowanje. W koaliciskim zrěčenju mjez SPD, Zelenymi a Lěwicu dojednane podróšenje popłatka za parkowanje wobydlerjow wot dźesać na 120 eurow wob lěto a nowe tarify za parkowanje na krótki čas měli so hišće lětsa přesadźić, žada sej rěčnik Zelenych za modernu mobilitu Werner Graf.
Zdobom wón potwjerdźi, zo móhła to z jeho wida jenož prěnja kročel być. „Za nas Zelenych dyrbi potom dale hić“, Graf rjekny. Zaměr je wuwiće diferencowaneho systema popłatkow, kotryž tež socialne a ekologiske faktory wobkedźbuje. Wón mysli na to, wulkosć awta wobkedźbować. Wažne jemu je, zo wotměwa so wšitko njeběrokratisce.
Frakciska předsydka Zelenych Antje Kapek na to skedźbnja, zo płaći wobchadna změna z wutwarom zjawneho bliskowobchada miliardy eurow. Tuž je nimo předawanja jězdźenkow a statnych přiražkow třeći financny stołp trěbny. K instrumentam, kotrež chcedźa za to wuwić, słuša zawjazowacy hóstny tiket za turistow a kaž w koaliciskim zrěčenju zakótwjene, wyši popłatk za parkowanje.
