To a tamne (03.09.21)
Hodźiny dołho do wopačneho směra jěł je 92lětny muž z hessenskeho Bad Hersfelda a je skónčnje do Rostocka nad Baltiskim morjom dojěł. Poprawom chcyše wón do 130 kilometrow zdaleneho Nidderauwa. Syn muža bě policiju informował, dokelž njebě rentnar na šulski zachod wnučki přijěł. Policija pytaše z dowolnosću sudnika za mobilnym telefonom muža a zwěsći, zo je 92lětny w 550 kilometrow zdalenym Rostocku. Prawdźepodobnje bě wón wopačnu adresu do nawija zapodał.
Manipulacije wólbnych plakatow dla ma Greifswaldska zapósłanča Zelenych Katharina Horn wulke mjerzanje z policiju. Zastojnicy běchu ju lepili, jako přelěpješe wólbne plakaty zapósłanca CDU Michaela Sacka z nalěpkami „koruptny“. 23lětna Horn je so pola Sacka mjeztym telefonisce zamołwiła.
Róčnicu nadpada wopominali
Drježdźany/Podstupim (dpa/SN). W Sakskej a Braniborskej su wčera 82. róčnicu nadpada hitlerskeje Němskeje na Pólsku wopominali. Zastupujo ministerskeho ministra Michaela Kretschmera staj statna ministerka Barbara Klepsch (wobaj CDU) a jednaćel sakskeje załožby za wopomnišća dr. Markus Pieper na katolskim kěrchowje w Drježdźanach wěnc połožiłoj. W ćichej swjatočnosći wopominaštaj wonaj 1942 wot nacionalsocialistow wotprawjenych čłonow pólskeje spjećowanskeje skupiny Čorna legija. Přitomny bě tež wulkopósłanc Pólskeje w Němskej dr. Andrzej Przyłębski.
W Podstupimje je braniborski ministerski prezident Dietmar Woidke (SPD) namołwjał, spočatk Druheje swětoweje wójny před 82 lětami jako „wěčny zawjazk wobhladować so za měr, swobodu a demokratiju zasadźeć“. W nowinskej zdźělence wón praji: „Štož je so 1. septembra 1939 ze złóstniskim nadpadom hitlerskeje Němskeje na Pólsku započało, wjedźeše k milionam mortwych, k holocaustej a k njewólnistwu cyłych ludow. Demokratija, swoboda a měr tuž wusko hromadźe słušeja.“
Poskitk železnicy wotpokazał
Berlin (dpa/SN). Předsyda Dźěłarnistwa němskich lokomotiwnikow (GDL) Klaus Weselsky je poskitk železnicy w tarifowej zwadźe wotpokazał. „Mam špatnu powěsć za pućowacych: Stawk dale traje“, rjekny wón dźensa w rańšim magacinje ARD. Poskitk železnicy njeje „wobsahowje akceptabelny“. Železnica bě koronapremiju 600 eurow a skrótšenje doby tarifoweho zrěčenja wot 40 na 36 měsacow poskićiła. GDL stawkuje wot dźensnišeho tež we wosobowym wobchadźe.
Bouffier: Wšitcy za Laschetom
Wiesbaden (dpa/SN). Hessenski ministerki prezident Volker Bouffier namołwja, w boju k wólbam zwjazkoweho sejma přezjednosć pokazać. „Wažne je, zo zhromadnosć jasnje pokazamy, zo njemóže nichtó na tym dwělować, zo kruće za Arminom Laschetom stejimy“, rjekny městopředsyda CDU Frankfurtskim nowinarjam. Tež bayerski ministerski prezident Markus Söder (CSU) swoju zwjazanosć z Laschetom stajnje zaso potwjerdźa.
Wulke zliwki a zapławjenja
Čłonojo indigenych ludow w Brazilskej demonstruja tuchwilu we ...
Wo wuwiću w Afghanistanje
Kranj (dpa/SN). Wonkowni a zakitowanscy ministrojo krajow Europskeje unije su dźensa w Słowjenskej wo tym wuradźowali, kak z nowymi mócnarjemi a wuwićom w Afghanistanje wobchadźeć. Nimo toho dźěše wo to, kak móhło mjezynarodne zjednoćenstwo statow potrěbnym ludźom w Afghanistanje pomhać. Zakitowanscy ministrojo rozjimachu prašenje, kajke wojerske konsekwency z najnowšeho wuwića nastanu.
Z wida społnomócnjeneho EU za wonkowne naležnosće Josepa Borrella pokazuje wuwiće w Afghanistanje jasnje na to, zo trjeba Europska unija swójsku jednotku za spěšne zasahnjenje. Tajku móhli derje trjebać, zo by EU tež po cofnjenju wojakow USA z Afghanistana ewakuowanje ludźi z afghaniskeje stolicy Kabula zaručiła. Nimo toho rěčachu dźensa wo pospytach Běłoruskeje, migrantow jako bróń přećiwo EU znjewužiwać.
Steinmeier w Słowakskej
GEW: Sakska njeje dosć přihotowana
Dwojotřěšnik ma zaso křidła
To a tamne (02.09.21)
Z překwapjenjom je so wčerawši rekordny pospyt w Zwickauwje skónčił: Na wšě 20 sportowčow město planowanych 19 je so do Trabanta 601 tłóčiło. Runje tři a poł mjeńšiny młode žony trjebachu, zo bychu do nutřkowneje a kófroweje rumnosće zalězli, tak zo móžachu durje awta začinić, kaž sej to předpisy žadaja. Rekord je tuž nětko zaso w Zwickauwje.
Z rekordnymi 305 km/h bě 23lětny na ilegalnym wubědźowanju awtow na awtodróze w Düsseldorfje po puću a je so při tym hišće sam filmował. Tam je spěšnosć poprawom na 120 km/h wobmjezowana. Filmowy material, z kotrymž běchu so wobdźělnicy wubědźowanja w interneće hordźili, je policija mjeztym zawěsćiła. Awtomatiske kamery awtodróhi su to tohorunja dokumentowali. 23lětnemu hrozytej pokuta 700 eurow a sćazanje jězbneje dowolnosće na tři měsacy.
Biden chce ze zmylkow wuknyć
Washington (dpa/SN). Po cofnjenju wojakow z Afghanistana je prezident USA Joe Biden daloko sahace konsekwency za přichodne wojerske zasadźenja připowědźił. „Dyrbimy ze swojich zmylkow wuknyć“, rjekny Biden w Běłym domje. „Doba wulkich wojerskich operacijow, přerjadować druhe kraje, je nimo.“ Přichodne zasadźenja měli jasne a docpějomne zaměry měć a so na „zasadne narodne wěstotne zajimy“ USA koncentrować.
Heil: Wosobinske daty škitać
Berlin (dpa/SN). Zwjazkowy minister za dźěło Hubertus Heil (SPD) so přećiwo tomu wupraja, zo smědźa so dźěłodawarjo swojich přistajenych prašeć, hač su přećiwo koronawirusej šćěpjeni. To dźěłowe prawo njedowola, praji Heil w dźensnišim rańšim magacinje telewizije ARD. „Je drje wažne, zo njestanu so zawody ze žórłami infekcijow. Njeńdźe pak, wosobinske daty wo strowotniskim stawje wšitkim spřistupnić.“ Zawody měli skerje pragmatiske rozrisanja nańć.
Wohenje dale cychnuja
