Nowe sebjewědomje wuchoda
Zwjazkowy prezident Frank-Walter Steinmeier Saksku wopytał
Drježdźany (dpa/SN). Wuchodna Němska móže po měnjenju zwjazkoweho prezidenta Franka-Waltera Steinmeiera horda na wuwiće minjenych lět być. „Je načasu za nowe sebjewědomje we wuchodnej Němskej“, rjekny wón wčera na wopyće w nowej tworni za połwodźakowe elementy firmy Bosch w Drježdźanach. Wuchodna Němska je dźensa w mnohich technologijach we wodźacej poziciji w Němskej. Wuspěšny puć digitalizacije, elektronizacije a awtomatizacije njeje bjez wuchodoněmskich zawodow dźensa wjace móžna, Steinmeier wuzběhny. Fachowcy drje to dawno wědźa, zjawnosći pak to dosć znate njeje. Tohodla je wón we wuchodoněmskich zawodach po puću, zo by pokazał, zo su tam swětłownje moderneje industrije nastali.
Za reformu NATO
Koordinowaca fararka zapokazana
To a tamne (24.08.21)
Wjace hač 600 eurow pokuty płaćić dyrbi kóždy z 30 wěriwych, kotřiž běchu so najebać płaćiwe wobmjezowanja koronawirusa dla w awstralskim Sydneyju na Božej słužbje wobdźělili. Cyrkwi běchu pokutu 3 000 eurow napołožili. Awstralska je korony dla wot měrca 2020 w dalokej měrje izolowana. W městach kaž Sydneyju knježi kruty lockdown. Protesty ludźi pak mjeztym přiběraja.
W stajnej alarmowej hotowosći je wobsedźerka alpaki Geronima, po tym zo je sudnistwo doskónčnje wukazało zwěrjo morić. Geronimo je dwójce na natykliwu tuberkulozu testowany. Jeho wobsedźerka Helen Macdonald pak testam njewěri a ma Geronima za stroweho. Dyrbjało-li „komando mordarjow“ na jeje statok přińć, nochce so wona zakonjej spjećować. „Potom pak móže cyły swět bjezzmyslnemu morjenju přihladować.“
Ćěkancam lěpje pomhać
Aachen/Berlin (B/SN). Katolski pomocny skutk missio starosći so wo sylnje wohroženych němskich staćanow a něhdyšich domoródnych pomocnikow němskeho wójska a jich přistajenych w Afghanistanje. Wosebje wohrožene su tež žony a křesćanske mjeńšiny po přewzaću mocy přez radikalnych islamistiskich talibanow. „Hnydomna pomoc a podpěra ćěkancam ma so čujomnje zwyšić, ale tež susodne kraje maja so sylnišo podpěrać, dokelž přichadźeja jim dźeń a wjace ćěkancow. Wosebje Indiska budźe prawdźepodobnje wulke syły ćěkancow z Hindukuša přijimać“, praji missio.
Nabožina wažna za towaršnosć
Njewjedra sej wopory žadali
Nashville (dpa/SN). Njewjedra a zapławjenja su sej minjeny kónc tydźenja w USA znajmjeńša 21 smjertnych woporow žadali. Za 20 ludźimi hišće pytaja. Wosebje potrjecheny bě zwjazkowy stat Tennessee. Telewizijne wobrazy pokazuja wulke škody, wotpławjene awta a zničene domy. Zliwki běchu rekordne mnóstwa wody w běhu krótkeho časa wunjesli.
Dźěći w šuli šćěpić
Tel Aviv (dpa/SN). Ze spočatkom noweho šulskeho lěta 1. septembra chcedźa w Israelu šulerjow wosrjedź šulskeho časa přećiwo koronawirusej šćěpić. Za to trjebaja jenož dowolnosć staršeju, zdźěla koronowy kabinet w Israelu. Tam šćěpja wšitke dźěći wot dwanaće lět. W kraju z 9,4 milionami wobydlerjow spytaja so tuchwilu z masiwnej kampanju šćěpjenja přiběracym ličbam nowych infekcijow wobarać. Dotal je tam 59 procentow wobydlerjow dwójce šćěpjenych.
Smědźa do Sicilskeje přijěć
