Berlin (dpa/SN). Zwjazkowy sejm je dźensa dopołdnja wo wažnych zakonskich předewzaćach amploweje koalicije wot­hłosował. SPD, Zeleni a FDP mějachu wotpohlad, planowany wobydlerski pjenjez wobzamknyć. Dotalny system Hartz IV ma so z tym kónc lěta narunać. Dalše temy wothłosowanja běchu nowe hra­nicy dochodoweho dawka, z kotrymiž maja so wuskutki wysokeje inflacije wurunać a reforma bydlenskeho pjenjeza.

Widźi hišće šansu na wjetšinu

Washington (dpa/SN). Prezident USA Joe ­Biden je wuzběhnył, zo móhli jeho demokraća wjetšinu w Domje reprezentantow přeco hišće zakitować. Za wjetšinu w parlamentowej komorje US-kongresa je 218 městnow trěbnych. Po dźensa ­dopołdnja předležacych wuslědkach abo prognozach ležachu republikanojo z 206 městnami prědku, demokraća ličachu 187 městnow. Z tutymi wuslědkami wob­rysuje so snadna wjetšina 220 hłosow za republikanow.

Chcedźa wróćodobywanje haćić

Berlin (dpa/SN). Swójby dóstanu klětu wjace dźěćacych pjenjez hač dotal planowane. Frakcije amploweje koalicije wobzamknychu wčera w financnym wuběrku zwjazkoweho sejma, statnu podpěru wot 1. januara na jednotnje 250 eurow měsačnje powyšić. Tež unija je po informacijach powěsćernje dpa tomu přihłosowała. „Wjeselu so, zo je so poradźiło, swójby jasnje sylnišo wolóžić a dźěćacy pjenjez hišće raz zwyšić“, wuzběhny zwjazkowa swójbna ministerka Lisa Paus (Zeleni). Zwjazkowy sejm ma dźensa ­nowym sadźbam přihłosować. Wysoke płaćizny za žiwidła, podruž a energiju su swójbam z mało dochodami wulke wužadanje. Za swoje žiwjenske wudawki dyrbja wjace pjenjez nałožować hač domjacnosće bjez dźěći.

Za prěnjej dźěsći dóstanje swójba měsačnje přichodnje stajnje 31 eurow wjace hač dotal. Za třeće dźěćo je to 25 eurow. Sadźba za štwórte dźěćo so njezměni, wšako leži hižo pola 250 eurow.

Dotal bě planowane, dźěćacy pjenjez wysokeje inflacije a energijoweje krizy dla zwyšić. Tola bě rěč wo 237 eurach za prěnje tři dźěći.