Berlin (dpa/SN). Zwjazkowy kancler Olaf Scholz (SPD) je dźensa hosćićel wjerš­koweho zetkanja z balkanskimi statami Albanskej, Bosniskej-Hercegowinu, Kosowom, Sewjernej Makedonskej, Čornohórskej a Serbiskej. Wšitke šěsć krajow prócuje so wo přistup k EU, su pak w rozdźělnych fazach přibliženja. Na wjeršku wobdźěleja so tež načolnicy Europskeje unije a knježerstwowi šefojo wjacorych statow EU.

Inflacija w Turkowskej wysoka

Ankara (dpa/SN). Wysoka inflacija w Turkowskej je so dale přiwótřiła. W oktobrje běchu płaćizny přetrjebarjow wo 85,5 procentow wyše hač lěto do toho, kaž narodny statistiski zarjad dźensa w Ankarje zdźěli. W předchadźacym měsacu je po­dróšenje 83,4 procentow wučiniło. W Němskej běchu statistikarjo w oktobru stupanje płaćiznow přetrjebarjow wo 10,4 procenty zwěsćili.

Temperatura spěšnišo stupa

Moskwa (dpa/SN). Po wusadźenju zrěčenja wo transportowanju žita po Čornym morju z Ukrainy dowoli Ruska nětko zaso eksport. To zdźěli ruske zakitowanske ministerstwo wčera w Moskwje. Dźakowano posrědkowanju Turkowskeje je Ukraina přilubiła, zo mórski koridor za wojerske jednanja přećiwo Ruskej njewužiwa. Ukraina dyrbješe wěstotu zarjadowaneho humanitarneho koridora a přistawow garantować, kotrež so za wuwožowanje zežiwidłow wužiwaja. Z transportom po morju su nětko dale pokročowali, rjekny turkowski prezident Recep Tayyip Erdoğan. Předewšěm su žiwidła za chudše kraje postajene. Němska wonkowna ministerka Annalena Baerbock (Zeleni) mjenowaše znowazahajenje „wuraz toho, kak sylna je mjezynarodna zwjazanosć“. Ruska je znowa spytała, „hłód jako bróń zasadźić“.

Ruska bě po trutowych nadpadach na połkupje Krim zrěčenje wo transporće ukrainskeho žita z čornomórskich přistawow minjenu sobotu njejapcy wusadźiła. Přičina běchu po informacijach zakitowanskeho ministerstwa w Moskwje „teroristiske nadpady“ na čornomórsku flotu w Sewastopolu.

Derje zo su so Zwjazk a kraje wčera na podpěru za přetrjebarjow płuna dojednali a wolóženje připowědźili. Tola nimo płuna su tež hišće wužiwarjo hinašich tepjenskich systemow, kotřiž maja so z wysokimi płaćiznami surowiznow bědźić. Njewotwisnje wot tepjenskeho systema měł Zwjazk tuž kóšty w podobnym wobjimje wobmjezować kaž pola płuna. Hladajo na drjewjane pelety je płaćizna mjeztym hižo trójce tak wysoka kaž loni. Płaćizna za tepjenski wolij je aktualnje něhdźe dwójce tak wysoka kaž před lětom. Tež mějićeljo wolijowych a peletowych tepjenjow trjebaja financielnu podpěru! Tohorunja měł Zwjazk do regulacije płaćiznow ćěriwa a tepjenskeho wolija zapřimnyć. Situacija mjez płunom a wolijom je rozdźělna. Mjenje abo bóle zda so być, zo wolijowe koncerny z energijoweje krizy profituja. Tole wotbłyšćuja runje tak minjene dny wozjewjene bilancy koncernow. Jedyn přikład je BP, kotryž měješe dobytk we wobjimje miliardow eurow. Bianka Šeferowa

Politikarjo chcedźa potrjechenych wulkomyslnje podpěrać

Berlin (dpa/SN). Zwjazk a kraje su swoju zwadu wo financowanju planowanych wotćeženskich naprawow w zwisku ­z energijowej krizu a wysokej inflaciju rozrisali. Na wuradźowanjach ministerskich prezidentow krajow ze zwjazkowym kanclerom Olafom Scholzom (SPD) wčera w kanclerskim zarjedźe su tež prašenja hladajo na financowanje w zwisku z bydlenskim pjenjezom a při zaměstnjenju ćěkancow wujasnili kaž tež so na přidatne financielne naprawy za ćežke pady, na přikład nastupajo strowotniski a kulturny wobłuk dojednali.

„Problemy našeho kraja zhromadnje rozrisamy“, Scholz po wuradźowanjach podšmórny. Dorozumjenje k financo­wanju naprawow bu swědomiće přihotowane, tak zo móžachu so wšitcy spěšnje dorozumić. Předsyda konferency ministerskich prezidentow, delnjosakski šef knježerstwa Stephan Weil (SPD) wuzbě­hny, zo su temy wo kotrychž běchu měsacy dołho diskutowali, skónčnje rozrisali.