Drježdźany (dpa/SN). Sakski ministerski prezident Michael Kretschmer (CDU) je zadźerženje unije na zwjazkowej runinje po wólbach zwjazkoweho sejma kritizował. „Wólbny wuslědk bě zemjerženje a je jasnu změnu nalady přećiwo CDU pokazał“, rjekny wón dźensa rano w sćelaku MDR. Tole dyrbjała strona jasnje přiznać. Tuž njemóže sej wón nastajenje w Berlinskim Adenauerowym domje rozkłasć, hdźež rěča wo nadawku k wutworjenju knježerstwa. „Tole wotpowěduje dotalnemu kursej, kotryž je k wulkim stratam unije wjedł a njeje hižo přichoda kmany“, tak Kretschmer. Kanclerski kandidat CDU Armin Laschet bě wčera rjekł, zo ma wólbny wuslědk za nadawk k wutworjenju knježerstwa, byrnjež jeho strona ze 24,1 procentom historisce spadnyła.

Wólbny wuslědk AfD w Sakskej připisuje Kretschmer zmylkam zwjazkoweje politiki předewšěm we wobchadźe z koronawirusom. Sakska je ludźom bliska była a so přećiwo zawrjenju šulow a pěstowarnjow wuprajiła. Tutón puć pak w Berlinje z nuzowym borzdźidłom skónčichu.

Z 867 kilogramow ćežkim kirbsom je plahowar na mišterstwach w braniborskim Klaistowje prěnje myto dobył. Na Berlinsko-braniborskim wubědźowanju bě so wčera po informacijach zarjadowarja 87 plahowarjow a zahrodkarjow z 95 kirbsami wobdźěliło. Nimale 900 kilogramow ćežki kirbs plahowarja Olivera Gräfeho z wokrjesa Łobjo-Halštrow wuznamjenichu z mytom „Atlantic Giant“.

45 000 eurow škody zawinował je 82lětny šofer wosoboweho awta z Berlina, po tym zo bě pedalej płuna a borzdźidła zaměnił. Kaž policija informuje, dyrbi rentnar nětko z tym ličić, zo jeho kmanosć wodźenja awta přepruwuja. Muž bě na Rujanach w Binzu z parkowanskeho domu přijěł. Dokelž dawaše přewjele płuna, zrazy do na dróze parkowaceho awta. Swědcy wobkedźbowachu, zo rentnar po zražce přeco hišće płun dawaše.

Drježdźany (SN). Předsyda Rady za serbske naležnosće w Sakskej Marko Suchy je zastojnstwo srjedu złožił a da swoje čłonstwo w gremiju wotpočować. To bu na prěnim posedźenju rady po lěćnej přestawce wčera w rumnosćach krajneho sejma w Drježdźanach znate, kotrež nawjedowaše městopředsyda Marko Kliman, Chróšćanski wjesnjanosta. Wón předčita přitomnym radźićelam a zapósłancam list Sucheho, hdźež mjenuje předewšěm pobrachowacu podpěru dźěławosće serbskeje rady přez wotpowědne personelne a financne srědki. Tak po jeho słowach wuměnjenja za wuspěšne čestnohamtske dźěło gremija date njejsu. Marko Kliman nawodnistwo serbskeje rady nachwilnje přewozmje.

We wobsahowym dźělu rozłoži direktor Załožby za serbski lud Jan Budar aktualny staw kołowokoło strukturnych srědkow Zwjazka, kotrež maja wot klětušeho serbske projekty we wobłuku změny strukturow zmóžnić. Proces wobdźělenja zjawnosće ma so bórze zahajić.

Berlin/Zhorjelc (SN). Nadźija na bórzomny wutwar a elektrifikaciju železniskeju zwiskow Drježdźany–Budyšin–Zhorjelc a Berlin–Choćebuz–Běła Woda–Zhorjelc za­so přiběra. K tomu stej zwjazkowe ministerstwo za wobchad a digitalnu infrastrukturu a Swobodny stat Sakska wčera wozjewjenje wotpohlada podpisałoj. Wobaj projektaj železniskeho wobchada matej nowy, bóle realistiski projektowy format dóstać, zdźěli łužiski zapósłanc zwjazkoweho sejma Thomas Jurk (SPD). Zdobom dawa dokument wuhlady na zwjazkowe srědki za financowanje čary Drježdźany–Budyšin–Zhorjelc.

Tež rozšěrjenje awtodróhi A 4 na wosom resp. šěsć jězdnjow wot Nossena hač k pólskej mjezy je tam zakótwjene.