Doha (dpa/SN). Němska so wo to prócuje, tež po přewzaću mocy přez militantnych islamistiskich talibanow pod wěsty­mi wuměnjenjemi diplomatiske zastupnistwo w stolicy Kabulu zarjadować. „Je-li­ to politisce móžno a wěstotne po­łoženje to dowola, potom měła Němska w Kabulu zaso swoje wulkopósłanstwo měć“, rjekny Maas (SPD) na swojim wčerawšim wopyće w katarskim hłownym měsće Doha. Tuchwilu so Němska w tym­le prašenju wusko ze swojimi europskimi partnerami wothłosuje, kaž Maas zdźěli. Katar ma wuske styki k talibanam. Maas zdobom potwjerdźi, zo njeby diplomatiske zastupnistwo w Kabulu žane připó­znaće knježerstwa talibanow woznamjenjało. „Njeńdźe wo ludoprawniske připó­znaće. Dźe wo rozrisanje cyle praktiskich problemow.“ Zwjazkowe knježerstwo bě po přewzaću mocy přez talibanow wulkopósłanstwo w Kabulu zawrěło. Wšitcy diplomaća su kraj wopušćili. Wulko­pósłanc Markus Potzel jedna tuchwilu w Kataru z talibanami wo wupućowanju za škitom pytacych Afghaničanow z kraja.

19 žonow w jednym Trabanće 601 – tónle nowy rekord chcychu dźensa w Zwi­ckauwje nastajić. 1976 bě w tele­wizijnym wusyłanju „Außenseiter – Spitzenreiter“ 17 wosobow do tajkeho awta zalězło. 18 žonow rejwanskeho towarstwa w braniborskim Altlandsbergu je rekord z lěta 2019 přetrjechiło. Mjetarki Zwickauskeho mustwa BSV chcychu jón dźensa do domizny Trabanta wróćić. Akciju­ chcedźa filmisce dokumentować a Institutej za rekordy předpołožić.

Zo by morjenje třoch ludźi přiznał, je muž na samym wuchodźe Ruskeje cyły tydźeń na přichodnu policajsku stražu nóžkował, dokelž njebě tam žanych busowych abo železniskich zwiskow. We wsy Ochotsku wón policistam rjekny, zo je pjany najprjedy znateho a po tym dwě žo­­nje zatřělił. Muža, kiž dźěła na dospołnje wotležanej farmje w lěsu, nablaku zajachu.

Berlin/Róžant (SN/JaW). Wjacore pro­jekty za změnu struktury w Hornjej Łu­žicy su dalši zadźěwk přewinyli. Z cyłkownje 54 projektow, kotrež je Zwjazk nětko w Berlinje přizwolił, je 17 direktnje z Hornjej Łužicu zwjazanych.

Berlin (dpa/SN). Zwjazkowy strowotniski minister Jens Spahn móhł sej předstajić, dźěłodawarjam prawo dać so při­staje­nych prašeć, hač su přećiwo koronawirusej šćěpjeni. W tymle prašenju wón runje ze sobu wojuje, rjekny Spahn wčera wječor w sćelaku ARD. W hosćencach wšak to hižo činja, wón zwurazni. Zwjazkowe zjednoćenstwo dźěłodawarjow Němskeje bě Spahna k tomu namołwjało, zo móhli firmy wotpowědne škitne naprawy w zawodach organizować.

Lindner čaka na poskitk

Berlin (dpa/SN). Předsyda FDP Christian Lindner ma knježerstwowy zwjazk z SPD a Zelenymi po wólbach za „teoretisku konstrukciju, wo kotrejž so wjele rěči“. Wón widźi „lědma praktiske zhromad­nosće z SPD a Zelenymi“, rjekny Lindner dźensa w sćelaku RTL. Hladajo na kanclerskeju kandidatow SPD Olafa Scholza a Zelenych Annalenu Baerbock wón praji:­ „Pobrachuje mi fantazija, što chcyłoj Scholz a Baerbock FDP poskićić.“ Zhro­madnosće z kandidatom unije Arminom Laschetom su „najwjetše“.

Dźěło Greenpeace wuzběhnyła