Ministrej problemy rozłožić móhli
Budyšin (SN/MkWj). Zapósłancej CDU w Sakskim krajnym sejmje Markej Šimanej z Budyšina so njedawno něšto poradźi, wo čož bě wón dołho wojował: wosobinska rozmołwa ze zwjazkowym ministrom za hospodarstwo Peterom Altmaierom (CDU) w naležnosći strukturneje změny we Łužicy w zwisku ze skónčenjom zmilinjenja brunicy. Wo tym je Budyšan wčera na nowinarskej rozmołwje informował. Nastała bě myslička so zetkać na tak wysokej runinje w Hornjołužiskej předewzaćelskej iniciatiwje, kotraž eksistuje wot lěta 2018.
Laschet pola Macrona w Francoskej
Düsseldorf/Paris (dpa/SN). Połtřeća tydźenja do wólbow zwjazkoweho sejma je francoski statny prezident Emmanuel Macron dźensa kanclerskeho kandidata CDU/CSU Armina Lascheta k wosobinskej rozmołwje přijał. Předwčerawšim, póndźelu, bě hižo kanclerski kandidat SPD Olaf Scholz z hosćom pola Macrona w Pariskim Élyséejowym palasće. Ministerski prezident Sewjerorynsko-Westfalskeje Laschet bě so w oficialnej funkciji jako społnomócnjeny zwjazkoweho knježerstwa za němsko-francoske kulturne poćahi do francoskeje stolicy podał. Macron a Laschet staj so hižo wospjet zetkałoj. Dźensniše bilateralne zetkanje pak bě prěnje po nominaciji premiera za kanclerskeho kandidata unije. Kandidatka Zelenych Annalena Baerbock je so porno tomu toho wzdała, Macrona hišće do wólbow 26. septembra wopytać.
Hladajo na špatne wuslědki woprašowanjow steji Laschet pod wosebje wulkim ćišćom. SPD je CDU/CSU w naprašowanjach přesćahnyła. Unija ma runje hišće 20 procentow hłosow.
Z wobskorženymi so solidarizowali
To a tamne (08.09.21)
Njewšědnu namakanku su archeologojo w Lübecku wuslědźili: 79 lět po bombardowanju města přez lětadła antihitlerskich zwjazkarjow nańdźechu woni w pincy tehdy zničeneho domu derje zdźeržanu tortu. Prěnje přepytowanja su wunjesli, zo jedna so wo worješkowu tortu z krokantowej kromu. Z glazuru a ornamentami wudebjene pječwo bě w bywšej kuchni domu pod rozwalinami zasypane a je tak wšitke lěta přetrało.
Přistojny paduch je so w sewjerorynsko-westfalskim Gevelsbergu pola wobsedźerki bydlenja zamołwił – a bjez rubizny ćeknył. Njeje wědźał, zo je něchtó doma, rjekny wón zadźiwanej wobydlerce, kotraž jeho nadobo w koridorje zetka. Na to so spěšnje zminy. Do toho bě so do bydlenja w pjatym poschodźe wjaceswójbneho domu zadobył a je při tym najskerje kusk přewótře był.
Dale a mjenje ludźi za CSU
Mnichow (dpa/SN). Bayerska CSU je so po najnowšim naprašowanju do wólbow zwjazkoweho sejma pod hódnotu 30 procentow sunyła. Po informacijach telewizije Sat. 1 rjekny jenož hišće 29 procentow ludźi w swobodnym staće, zo bychu k wólbam za CSU hłosowali. W juliju bě jich hišće 35 procentow było. Zeleni maja 18 procentow w Bayerskej, SPD je so wot dźewjeć na 15 procentow polěpšiła, FDP by 13 proc. hłosow dóstała, AfD dźesać a Swobodni wolerjo šěsć proc.
Altmaierej so zaso derje dźe
Berlin (dpa/SN). Zwjazkowy hospodarski minister Peter Altmaier (CDU) je po swójskich informacijach na puću polěpšenja. Jemu so „zaso jara derje“ dźe, pisaše wón dźensa rano na Twitteru. Peter Altmaiera běchu wčera wječor po informacijach powěsćernje dpa z nuzowym lěkarjom do jedneje z Berlinskich chorownjow dowjezli. Wón bě so do toho na zhromadnej wječeri hospodarskeho wuběrka zwjazkoweho sejma w hotelu w Berlinje wobdźělił.
Poněčim zaso po planje jězdźa
Zwjazkowe kraje maja same rozsudźić
Berlin (dpa/SN). Koronapandemija a dalše přiwótřenje połoženja w nazymje a zymje běštej dźensa tema w zwjazkowym sejmje. Hišće krótko do wólbow su zapósłancy nowe rjadowanja wobzamknyli. Jako najwažniše měritko přiwótřenych naprawow ma přichodnje ličba koronapacientow w regionalnych chorownjach płaćić. Dotal měrjachu so naprawy po ličbje infekcijow, kotrež pak njejsu přiběracu ličbu šćěpjenych ludźi nastupajo hižo wuprajiwe.
Nowe koronaindikatory maja zwjazkowe kraje same wobzamknyć a dyrbja tež same rozsudźić, wot kotreje kritiskeje inicidencneje hódnoty su krućiše wobmjezowanja we wšědnym žiwjenju trěbne. Při tym maja ličbu pacientow w chorownjach, ličbu swobodnych łožow na intensiwnych stacijach, ličbu šćěpjenych a ličbu infekcijow wobkedźbować. Dotal su w zakonju wo škiće před infekcijemi jednotne hódnoty podate a měrja so po sydomdnjowskej incidency.
EU měła zhromadnje postupować
Drježdźany/Kamjenica (dpa/SN). Sakska ministerka za europske naležnosće Katja Meier (Zeleni) chce so w krizowych situacijach, kaž w Afghanistanje, za sylniše zhromadne postupowanje Europskeje unije zasadźeć. Na konferency ministrow za europske naležnosće (EMK) jutře a zajutřišim w Kamjenicy měło wo spěšnišu pomoc sobudźěłaćerjam EU hić. W rezoluciji dźe wo to, pomocnikam zapućowanski wizum do EU wustajić. „Předewšěm měło so to w nuzowych situacijach stać, stej-li wulkej strach abo nuza “, podšmórnje Meier, kotraž je po turnusu wot 1. julija předsydstwo EMK přewzała.
Pozadk rezolucije je njedawna situacija w Afghanistanje, jako bě ćežko sobudźěłaćerjow EU problemow dokumentow dla spěšnje „z kraja dóstać“. „Trjebamy europske rozrisanje, zo bychmy spěšnišo reagować móhli“, ministerka Meier potwjerdźa. Wona ma zhromadnu europsku politiku ćěkancow nastupajo za jara wažnu. Wšitke kraje EU měli swojej winowatosći integracije wotpowědować. Wšako tež pjenjezy z jednoho hornca dóstawaja.
Katolscy lajkojo: Wolić hić!
Diskusija wo zwjazku lěwicarskich stron dale traje
Berlin (dpa/SN). Prěni króć scyła rady diecezow a katolikow biskopstwow Berlin, Drježdźany-Mišno, Erfurt, Zhorjelc a Magdeburg ludźi zhromadnje namołwjeja, so na wólbach zwjazkoweho sejma 26. septembra wobdźělić. We wobłuku wabjenskeje akcije stajeja katolscy lajkojo 30 křesćankow a křesćanow z cyle wosobinskimi přičinami k wotedaću hłosa do srjedźišća, kaž arcybiskopski ordinariat wčera w Berlinje zdźěli. Z prašenjom „A čehodla dźeće wy k wólbam?“ chcedźa po informacijach ordinariata po móžnosći wjele ludźi pohnuć, zo wolić du.
To a tamne (07.09.21)
Tobołu ze 40 000 eurami w busu zabyła je žona w juhofrancoskim Nîmesu. Dźakowano přikładnemu zadźerženju sobudźěłaćerjow wozydłownistwa móže sej wona tošu z pjenjezami nětko pola policije wotewzać. Šofer bě zabytu tošu w depoće wotedał, bjez toho zo by wulce do njeje hladał. Sobudźěłaćerjo jón wočinichu, zo bychu wobsedźerja zwěsćili. Při tym namakachu pjenjezy a dokumenty, kotrež wobswědčeja, zo su pjenjezy legalne.
Dwanaće pokradnjenych katalyzatorow je policija při kontroli na awtodróze A 4 pola Wilsdruffa w awće namakała. Zastojnikam bě awto spodźiwneho jězbneho stila dla napadnyło. Pola 40lětneho wodźerja reagowaše drogowy test pozitiwnje. Při kontroli awta namakachu zastojnicy katalyzatory a grat za kradnjenje. Zwotkel nastroje pochadźeja a kak wulka škoda je, chcedźa nětko wuslědźić.
Pomhać žonam w Afghanistanje
Vatikan (B/SN). Jezidiska nošerka Nobeloweho měroweho myta Nadia Murad je na priwatnej awdiency z bamžom Franciskusom wo tym rěčała, kak móhła katolska cyrkej podpěrać wosebje žony, etnisko-nabožnu ludowu skupinu jezidow a dalše narodne mjeńšiny w Afghanistanje. Bamž jej pomoc přilubi. 28lětnu wojowarku wo čłowjeske prawa bě teroristiska milica Islamski stat (IS) w lěće 2014 zawlekła. Na dramatiske wašnje wona terorej do Němskeje wućekny. Wot toho časa wojuje Murad jako wosebita posołka přećiwo wikowanju z ludźimi a wo to, złóstnistwa IS pochłostać. Lěta 2018 spožčichu jej a kongoleskemu lěkarjej Denisej Mukwegej Nobelowe měrowe myto. Wobeju počesćichu za wurjadny bój přećiwo seksualnej namocy w času wójnow a wojerskich konfliktow.
Ličba ateistow dale přiběra
