Hłowu mjedwjedźa su cłownicy w Saksko-Anhaltskej w pakeće z Ruskeje namakali. Njewšědna posyłka pochadźeše wot muža, kiž chcyše swojeho w Halberstad­će bydlaceho bratra k hodam wobdarić. Jako chcyše tón paket na cłownym zarjedźe wotewzać, namakachu w nim preparowanu hłowu mjedwjedźa. Dokelž su mjedwjedźe kruće škitane, cłownicy posyłku sćazachu a informowachu Zwjazkowy zarjad za přirodoškit.

Do lódzymneje wody skočić chcedźa zymscy płuwarjo „Berlinskich ćulenjow“ srjedź januara. Tradicionalne zymske płuwanje w jězoru w Hohenschönhausenje ma so 12. januara wotměć. Na mjeztym 34. lodowe póstnicy wočakuja němskich kaž tež mjezynarodnych wobdźělnikow, kotřiž chcedźa so w kostimach do wody podać. Hesło zarjadowanja ma tónkróć „swětnišćo“ rěkać.

Budyšin/Berlin (SN/JaW). Łužiski zapósłanc AfD w Němskim zwjazkowym sejmje Karsten Hilse njeje swoje připo­wě­dźenje z wólbneho foruma Serbskich Nowin 7. septembra w Budyšinje, zwěsćić trěbnosć zakonja wo změnje mjena za přisłušnikow narodneje mjeńšiny (Minderheiten-Namensänderungsgesetz), dotal zwoprawdźił. To wuchadźa z pisomneho naprašowanja našeho wječornika. „W rozmołwach ze Serbami, kotrychž wo­sobinsce znaju, wusłyšach njezrozumjenje za to, dokelž njeby ani jenički z nich wažnosć na to kładł. By-li pak naprašowanje wujewiło, zo sej wjetšina serbskeho ludu změnu přeje, bych so za to zasadźał. To tuchwilu wotwidźeć njeje.“

Tež nastupajo spěchowanje narodnych mjeńšin njeje Hilse dotal ničo nastorčił. Wón našemu wječornikej jeničce po­twjer­dźi, zo su Serbja „wobstatk našeho naroda jako kulturna jednota a maja samsne prawa a winowatosće kaž kóždy druhi němski staćan“. Wón pak by so kóždejžkuli naprawje, kotraž „to wobmjezuje, spřećiwjał. Tajke pak njejsu spóznajomne.“

Berlin (dpa/SN). Na Berlinskim Breitscheidowym naměsće su dźensa dopoł­dnja wopory a přiwuznych islamistiskeho teroroweho nadpada 19. decembra 2016 na tamniše hodowne wiki wopominali. Tak je Berlinski wyši měšćanosta Michael Müller (SPD) na naměsće při wopomnišću wěnc połožił. Wječor planuja nutrnosć w bliskej Wopominanskej cyrkwi. W 20.02 hodź. – we wokomiku nadpada – ma zwón dwanaće króć bić, wopominajo smjertne wopory.

EU chce chaosej zadźěwać

Brüssel (dpa/SN). Komisija EU zdźěłuje nuzowy plan, kotryž chce nałožować, dyrbjało-li k brexitej bjez wotpowědneho zrěčenja mjez Brüsselom a Londonom dóńć. Zo bychu dospołnemu chaosej zadźěwali, chcedźa dotalne rjadowanja na wjacorych polach wobchować. To płaći za lětarstwo runje tak kaž za financne wiki a wizumowe směrnicy. Wulka Britaniska chce Europsku uniju 29. měrca 2019 wopušćić. Zrěčenje wo wustupje předwidźi, zo so hač do lěta 2020 ničo njezměni. Te pak njeje podpisane.

Fachowcow z wukraja wabić

Brüssel (dpa/SN). Awstriska ministerka za wobswět Elisabeth Köstinger je kritiku awtotwarcow hladajo na nowe klimowe směrnicy EU za nowe jězdźidła wotpokazała. Za lěto 2030 planowane drastiske pomjeńšenje wustorka wuhlikoweho dioksida pola dieselowych awtow je drje „naročne, ale móžne“, rjekny politikarka w Brüsselu. Awstriska je tuchwilu předsydka Europskeje unije a bě jednanja wo nowych směrnicach nastupajo hraničnu hódnotu CO2 nawjedowała.

Zastupnicy čłonskich statow unije, Europski­ parlament a komisija EU běchu so póndźelu wječor na to dojednali, zo měł wustork wuhlikoweho dioksida nowych jězdźidłow hač do lěta 2030 wo 37,5 procentow woteběrać. Awtowa industrija ma to za njepřiměrjene a njerealistiske. Köstinger znapřećiwja, zo je hišće jědnaće lět chwile a zo je awtowa industrija hižo tójšto docpěła. „Z mjezyzaměrom 15 procentow redukcije hač do 2025 je dosć chwile trěbne změny zwoprawdźić. Nimo toho njebychmy telko diskusijow měli, bychu-li awtotwarcy w zašłosći swoje přilubjenja dodźerželi.“