Lětuše lěćne dźiwadło na Budyskim hrodźe je z wjacorych přičin kedźby hódne: Najwažniše je, zo so scyła wotměwa. Napohlad połnje wobsadźenych rynkow přihladowarjow po lońšej nanuzowanej přestawce mje pozbudźa. A zo njejsu rynki stólcow korony dla lětsa tak wuske kaž hewak, je za ludźi z dlěšimi nohami runjewon přijomne. Najwjetši zmylk pak, kiž móhł wopytowar lětsa worać, je, wotšaltować a na někajki klamawk čakać. Kriminalistiske pady Sherlocka Holmesa a dr. Watsona su tak komprimowane a razantne, zo móžeš spěšnje nitku zhubić. Za to će z hudźbu Beatlesow runjewon „wotškódnjeja“. Hudźbnicy w kostimach z tehdy­šeho časa a István Kobjela z někotrymi solemi su ći balsam za wucho a wóčko. Spěšnje měnjace so jewišćowe wobrazy su technisce perfektne, a běžaty pas w pozadku zmóžnja zajimawe efekty. Zastaranje w přestawce je tajke kaž w starych časach. Njech so lěto 2020 nihdy njewospjetuje! Marko Wjeńka

Budyšin. Niska koronaincidenca w Bu­dyskim wokrjesu zmóžnja Němsko-Serbskemu ludowemu dźiwadłu zarjadować přidatne městna za swoju inscenaciju Sherlock Holmes – paski Beatlesow. Na dworje Budyskeho hrodu smědźa pjeć dalšich rynkow za přihladowarjow za­rjadować a wotpowědne lisćiki předawać. Wot dźensnišeho maja tam tuž 135 přidatnych městnow. Dowolnosć płaći najprjedy hač do njedźele, 11. julija. Wostanje-li incidenca dale pod dźesać, budu městna potom po tydźenjach přewo­stajene. Přihladowarjo njetrjebaja na trawersach žadyn nahubnik wužiwać abo wotstawki dodźeržeć. Tež dopokaz, zo su šćěpjeni abo po koronje wustrowjeni, trěbny njeje.

Njedźelu, 7. julija 1946, krótko po připoł-dnju zetkachu so skupiny młodostnych z Radworja, Konjec-Šunowa a Pančic-Kukowa w Koslowje. Tam bu kónc apryla/spočatk meje 1945 w poslednich dnjach wójny wulki dźěl statokow zničeny abo sylnje wobškodźeny. Z dźěłowym zasadźenjom chcychu młodźi Serbja pomhać rozpadanki wotstronić. Na Kupkec ležownosći na róžku puća do směra na Ralbicy ­zaspěwachu dobrowólnicy z Delan najprjedy někotre serbske spěwy. Na to porěčeštaj krajny rada dr. Jan Cyž a nawoda młodźinskeho wotrjada Domowiny Jurij Brězan. Wobaj dźakowaštaj so za zwólniwosć k dźěłu. A hižo dachu so skupiny do dźěła: wotklepowachu cyhele, hromadźachu drjewo a wukonjachu wšelake dalše činitosće. Po Koslowje přewjedźechu tajke brigadowanja tež w Nowoslicach, Ralbicach, Róžeńće, Pěskecach, Zejicach a dalšich wsach. Mnohe dźěłowe-natwarne brigady nastachu. „Akciji Koslow“ přidružichu so dalše: „Wo naš wšědny chlěb“ abo wosebje „Twarimy Serbski dom“. Wo brigadowanju serbskeje młodźiny zestaja Jan Handrik dokumentaciju, za šule bu diaserija „Serbske natwarne brigady“ wudata. Mikławš Krawc

Kamjenc (BG/SN). Hižo wjele lět wjerći so w redakciji Łužiskeho almanacha wšitko wokoło wosobinow łužiskich stawi­znow. Z almanachom spominaja na zasłužbnych zastupjerjow tudyšeho kul­turneho žiwjenja. Wjace hač 20 tajkich knihow su mjeztym wudali, a to w nakładźe stajnje 1 600 eksemplarow. Naprašowanje za nimi je wulke. Spisowaćel Jurij Brězan so w nich runje tak jewi kaž rě­čespytnik prof. dr. Arnošt Muka.

We wobłuku prěnjeho hłowneho zetka­nja awtorskeho kružka Łužiskeho almanacha po nanuzowanej koronowej přestawce poda předsyda Norbert Schnabel minjeny štwórtk z krótkim přednoškom zarys skutkowanja koła kaž tež njeličomnych jemu přidźěłowacych chronistow. „Lěto wob lěto wotkrywamy nowe, zajimawe wosobiny. To so jenož radźi, dokelž so mnozy měšćenjo a wjesnjenjo regiona za kulturu wopominanja zasadźeja. Woni pisaja wo swojich dožiwjenjach a dopomnjenkach a nam tele spisy přewostajeja“, Schnabel podšmórny.