Budyšin. Serbski institut přeprošuje štwórtk, 27. oktobra, w 19 hodź. do Bu­dyskeje Röhrscheidtoweje bašty na zjawny přednošk „Akademikarjo při pytanju za dźěłom. Žiwjenje ewangelskeho duchowneho dorosta we 18. lětstotku“. W swojim přednošku narěznje wědomostny sobudźěłaćer Serbskeho instituta Friedrich Pollack prašenje, kak dósta přerězny absolwent wysokeje šule we 18. lětstotku přiměrjene dźěło? Na přikładźe ewangelskeho duchowneho dorosta w serbskej Hornjej Łužicy přednošowar rozłoži, kotre­ powołanske móžnosće młodźi mužojo po nawróće z uniwersity mějachu a kak so tehdy dźěło po­srědkowaše. Přednošk budźe w němskej rěči.

Tworjenje ruskeho komponista Petra Iljiča Čajkowskeho mnozy tež z baletomaj „Łuskač“ a „Kołpjacy jězor“ zwjazuja. Z woběmaj su ruske baletne kompanije minjene lěta w nowembrje w Budyskim Němsko-Serbskim ludowym dźiwadle wustupowali. Lětsa přijědźe Ruski baletny festiwal Moskwa do sprjewineho města, zo bychu jeho rejwarjo a rejwarki 1. adwentnu njedźelu, 27. nowembra, popołdnju w třoch balet „Łuskač“ a wječor w 19.30 hodź. balet „Kołpjacy jězor“ předstajili. Kartki za 32 eurow, potuńšene za dźěći do šěsć lět, w dźiwadłowej pokładni NSLDź hižo předawaja. Foto: nowinske foto/Amber Hunt

Chrósćicy (SN). Serbski zapósłanc w Sakskim krajnym sejmje Hajko Kozel (Lěwica) přeprošuje pjatk, 28. oktobra, w 14 hodź. do foyera Serbskeje zakładneje šule „Jurij Chěžka“ w Chrósćicach, na zarjadowanje k spominanju na 15. róčnicu Chróšćanskeho zběžka pod hesłom „Spominać a dale myslić“. Tam chcedźa tež wo impulsach Chróšćan zběžka diskutować, kotrež skutkuja přez hranicy Sakskeje a šulskeje politiki. Spočatnje porěči Hajko Kozel wo šulskopolitiskich wužadanjach w Serbach. Kubłansko-politiska rěčnica Lěwicy Cornelia Falken analyzuje a wuhódnoći Chróšćanski zběžk jako wotmołwu ­Serbow na pospyt politiki, serbsku šulsku syć rozpušćić. Na to rozłoži předsyda Domowiny Dawid Statnik žadanja za nowelu sakskeho šulskeho zakonja nastupajo serbskeje šulskeje syće. A čěski zapósłanc Europskeho parlamenta Jaromír Kohlíček ­pokaza, kak móhło so problemej pobrachowacych serbskich wučerjow z pomocu ­Pólskeje a Čěskeje wotpomhać. ­Něhdźe wot 16 hodź. budźe połdra hodźiny chwile za wosobinske rozmołwy při kofeju a tykancu. Zajimcy su wutrobnje witani.

Rybarjo klóštra Marijina hwězda su wčera we Łazku hataj wotpušćili a lěto stare karpy wułójili. Wunošk w Hlinjanym a we Wulkim haće do směra na Šunow pak bě chětro přesłapjacy. Nalěto su tam rybarjo něhdźe 60 000 młodych karpow wusadźili. Wčera rěčachu wo stratach mjez 50 a 90 procentami. Při tym mjenowachu najwšelakoriše přičiny. Słaby wunošk dowjezechu do zymskich hatow. Wobaj Łazkowskej hataj wostanjetej w zymje 2016/2017 bjez wody a matej wumjerznyć. Foto: Jan Hrjehor