„Supergute Tage oder Die sonderbare Welt des Christopher Boone“ rěka inscenacija Budyskeho Němsko-Serbskeho ludoweho dźiwa­dła, kotraž ma dźensa premjeru. 15lětny Christopher nańdźe susodźic psa mortweho a stajnje so zdobom podhladny. Spěšnje so wujasni, zo je njewinowaty. Policija pak přestanje slědźić, a Christopher započina sam winika pytać. To njeje lochko, dokelž je wón aspergerski awtist a dóstawa mjez ludźimi paniku. W režiji Stefana Wolframa agěruja na jewišću mjez druhim Marvin George, Tomaš­ Cyž a Pauline Leitner (wotlěwa). Dalše předstajenje budźe jutře w 19.30 hodź. Foto: Mirosław Nowotny

Wustajeńca „mal mahl“ wuměłca z mjenom dekern w Korzymskej galeriji Flox traje hišće hač do 19. měrca. Pokazuja tam mólby, skulptury a objekty ze zašłych nimale dwaceći lět. Foto: SN/Maćij Bulank

Serbske Pazlicy. Serbskopazličanske karnewalowe towarstwo bliži so wjerškej swojeje 47. sezony. Tohodla přeprošuje wone pod hesłom „Ničo njewostanje kaž je“ zhromadnje z princowskim porom Danielom II. a Bernadetu I. na wjacore zarjadowanja do Njebjelčanskeje „Bjesady“. Na sobotomaj, 18. a 25. februara wotmějetej so tam stajnje w 19.30 hodź. kapičkowej wječoraj. Dale wuhotuja 19. februara w 15 hodź. póstnicy za seniorow, štwórtk, 23. februara, w 19.30 hodź. žónske póstnicy, sobotu, 25. februara, w 14 hodź. dźěćace póstnicy a 27. februara w 19.30 hodź. woswjeća róžowu póndźelu. Zastupne lisćiki dóstanu zajimcy pola Hübenthalec (tel. 03578/ 303 505) wšědnje wot 17 hodź. a při wječornej kasy.

Cyganska reja słuša do wjerškow lětu­šeho jubilejneho ptačokwasneho programa Serbskeho ludoweho ansambla „Dejmantne a hinaše ptački“. Na nju móža so hižo wopytowarjo zarjadowanja dźensa wječor w Radworju, jutře w Slepom a njedźelu w Kulowje wjeselić. Jako hosća witaja po delnjołužiskej premjerje nětko tež w Hornjej Łužicy, Měrćina Weclicha. Foto: SN/M. Bulank