Při słodarni, při smolerni a na dworje Kamjenskeho Muzeja zapadneje ...
pjatk, 09. decembera 2016
spisane wot: Měrćin Weclich
Při słodarni, při smolerni a na dworje Kamjenskeho Muzeja zapadneje Łužicy wita wopytowarjow jutře wot 14 do 23 hodź. a njedźelu wot 13 do 20 hodź. wosebity flair. Za adwentny spectaculum přeměni so ležownosć na bajkojtu kulisu. Na srjedźowěkowskim hermanku změje Kevin Schneider swójsku budku, w kotrejž předawa mjez druhim horce wino a słódny punš. Foto: Linda Garten
Wosebity programna adwentnym koncerće
pjatk, 09. decembera 2016
spisane wot: Serbske Nowiny
Budyšin. Chór 1. serbskeje kulturneje brigady přeprošuje wšitkich lubowarjow hudźby na swój tradicionalny, tola wurjadny adwentny koncert jutře za tydźeń, 17. decembra, w 17 hodź. do Budyskeje Michałskeje cyrkwje.
W lěće 1996 přewza cyrkwinski hudźbny direktor Friedemann Böhme chór na Serbskim gymnaziju. Po 20 lětach nasta přeće, woblubowany adwentny koncert z wosebitym programom wuhotować. Tak zaklinči Čěska hodowna mša wuznamneho komponista Jakuba Jana Ryby (1765–1815), kotruž naši susodźa wosebje rady spěwaja. Byrnjež mša po liturgiskej formje natwarjena była, wotbłyšćuja swobodnje zbasnjene teksty a ludowa hudźba hłuboku zwjazanosć Ryby z ludom. Z chórom brigady zaspěwaja solisća-studenća Akademije muziskich wuměłstwow z Prahi Tereza Hořejšová, Petra Vondrová, Ahmad Hedar a Jan Líkař. Hudźi orchester Serbskeho ludoweho ansambla a na pišćelach hraje Gina Hentsch. Cyłkowny wuměłski nawod ma Friedemann Böhme. Zastup je darmotny, wo pjenježny dar so prosy.
„Što šubut wě?“ rěka dźěćacy musical, kotryž předstaji ...
pjatk, 02. decembera 2016
spisane wot: Marian Wjeńka
„Što šubut wě?“ rěka dźěćacy musical, kotryž předstaji Serbski ludowy ansambl jako překwapjenku k swj. Mikławšej wutoru, 6. decembra, w 17 hodź. na žurli SLA. W hrě šubut druhim ptačkam pomha, w zymnym lěsu přežiwić. Foto: Matthias Hultsch
Kak so derje škitać?
srjeda, 30. nowembera 2016
spisane wot: Serbske Nowiny
Budyšin (SN). Pod hesłom „Kak kriminelna je Sakska? Poručenja k škitej přećiwo zadobywarjam“ wotměje so póndźelu, 5. decembra, we 18 hodź. přichodne čitanje w tuchwilnym semestrje Budyskeje powołanskeje akademije na Lubijskej dróze. Referent wječora je kriminalny hłowny komisar Rolf Kasper ze Zhorjelskeje policajskeje direkcije. Wón porěči wo móžnosćach moderneje zawěs- ćenskeje techniki, kotraž móže wulkemu dźělej pospytanych zadobyćow do bydlenjow zadźěwać. Přizjewjenja za čitanje njejsu trěbne, zastup je darmotny.
Adwentny koncert SLA
wutora, 29. nowembera 2016
spisane wot: Marian Wjeńka
Budyšin. Chór, orchester a solisća Serbskeho ludoweho ansambla skića swojim připosłucharjam móžnosć, hektiskemu dohodownemu časej wućeknyć. Po zwučenym wašnju wopřijima adwentny koncert lětsa tež zaso mjezynarodne twórby a zaklinči hnydom dwójce w adwenće na žurli SLA w Budyšinje. Šarmantna moderatorka Kristina Nerad powjedźe po programje a překwapi tež z tej abo tamnej hodownej stawizničku. Premjera zaklinči štwórtk, 1. decembra, w 19.30 hodź. na žurli SLA. Dalše předstajenje tam budźe 18. decembra w 16 hodź.
Jutře wječor změje kruch „Wir sind keine Barbaren“ premjeru w ...
pjatk, 25. nowembera 2016
spisane wot: Dr. Cordula Ratajczakowa
Jutře wječor změje kruch „Wir sind keine Barbaren“ premjeru w Budyskim NSLDź. Za mandźelstwowu komediju Philippa Löhle, kotraž so ze strachami srjedźneje woršty před ćěkancami rozestaja, je režiser a wyši hrajny nawoda NSLDź Stefan Wolfram wobydlerski chór ze 17 ludźimi zestajił. Foto: Mirosław Nowotny
Wobrazy a hudźba
štwórtk, 24. nowembera 2016
spisane wot: Marian Wjeńka
Berlin. Finisaža wustajeńcy „Fern und nah“, w kotrejž su mjez druhim wobrazy Budyšanki Ulriki Mětškoweje widźeć, je jutře, pjatk, w 20 hodź. w Berlinskej galeriji F92 na Fehrbellinskej 92. Při tej składnosći wotměje so tam komorny koncert z twórbami Jura Mětška, kotrež zanjese orchester Berlinskeje Komiskeje opery.
Rozšěrjena přehladka „Wotmolowane – Mit Licht gemalt“ je ...
pjatk, 18. nowembera 2016
spisane wot: Jürgen Matschie
Rozšěrjena přehladka „Wotmolowane – Mit Licht gemalt“ je nětko w Serbskim muzeju přistupna. Nimo fotow priwatnych požčowarjow je galerija fararjow Klětnjanskeje ewangelskeje cyrkwje widźeć. Rjad wuwědomja, kak je so ateljejowe fotografowanje w běhu lětdźsatkow přeměniło. Na wulkej wobrazowce hodźi so w priwatnych fotowych albumach na přikład Łušćanskec swójby z Njebječic wokoło 1910, młodowučerja Jurja Kubaša-Worklečana abo wo poswjećenju Zejlerjoweho pomnika we Łazu listować. Widźeć je dale dźěl diasoweje serije wo žiwjenju w klóštrje Marijinej hwědźe w 1920tych lětach. Foto: Jürgen Maćij
Reje w bróžni
štwórtk, 17. nowembera 2016
spisane wot: Marian Wjeńka
Ralbicy. Ralbičanski młodźinski klub přeprošuje na kermušne reje, a to jutře, pjatk, wot 21 hodź. do Ralbičanskeje bróžnje. Reje wotměja so lětsa prěni raz pjatk a nic kaž hewak sobotu. Při tačelach budźe DJ Guido stać, zastup płaći tři eura. Bróžeń budźe wutepjena.
Wjac hač 400 škleńcow z priwatneje zběrki Anger w Berlinje a ...
pjatk, 11. nowembera 2016
spisane wot: Axel Arlt
Wjac hač 400 škleńcow z priwatneje zběrki Anger w Berlinje a Kohlschmidt w Choćebuzu je wot wčerawšeho pod hesłom „Design wšědneje potrjeby – škleńca z Njedźichowa“ na Mužakowskim nowym hrodźe widźeć. Přihotowali su pokazku sobudźěłaćerjo hrodu wokoło Reneja Nitschki. Wona je hač do kónca decembra přistupna. Foto: Joachim Rehle
