Runja zašłym lětam su sej čitarjo Serbskich Nowin tež wokoło minjenych hód chwile brali a našu hodownu křižowku wuhódali. Tójšto dopisow a mailkow z prawej wotmołwu „Měr cyłemu swětej“ smy do redakcije dóstali. Fortuna dyrbješe tuž rozsudźić, štó připowědźene myta dóstanje. Nad prezentom ze wšelakimi słódnymi kapkami z klóštra Marijina hwězda w Pančicach-Kukowje smědźa so Lucija Endersowa z Radworja, swójba Lorencec z Njebjelčic a Marka Pólkowa z Budyšina wjeselić. Prezenty je klóšterski wobchod jako přećelnu podpěru přewostajił. Wšitkim, kotřiž tónraz mjez dobyćerjemi njeběchu, móžemy poručić, jutry zaso křižowku wuhódać.

Tradicionalny hodowny koncert

Chrósćicy. Swój tradicionalny hodowny koncert we wobłuku hudźbneho nyšpora wuhotuje Chróšćanski cyrkwinski chór zajutřišim, njedźelu, w 14 hodź. w tamnišej farskej swjatnicy. Spěwarkam a spěwarjam poboku budźetej dujerska skupina kaž tež němska šola. Dokelž cyrkej tuchwilu wobnowjeja, měli sej zajimcy swójske sydadła sobu přinjesć.

Předstaja komediju

Sulšecy. Lajska dźiwadłowa skupina Konjecy-Šunow prezentuje zajutřišim, njedźelu, swoju aktualnu inscenaciju „Mužojo nimaja so lochko“ w Sulšečanskim kulturnym domje. Předstajenje z opcionalnym simultanym přełožkom započnje so w 16 hodź. W samsnym času budu hrajerki a hrajerjo z komediju tydźeń pozdźišo z hosćom w Njebjelčicach.

Kulinariski kurs

Lubnjow. Choćebuska Šula za delnjoserbsku rěč a kulturu wuhotuje wutoru, 10. januara, wot 15 do 17 hodź. kurs „Serbsce warić, pjec a zawarjeć“ w Lubnjowskim kulturnym centrumje Gleis 3. Popłatk za wobdźělenje wučinja na dorosćenu wosobu 5 eurow. Zajimcy njech přizjewja so z mailku na .

njedźelu hornjoserbsce

11:00 Łužica tutón tydźeń

11:20 Tematiske wusyłanje: „Rjanosć sej kupić?“

12:00 Nabožne wusyłanje

(Krystof Rummel)

po tym  zbožopřeća

delnjoserbsce

12:30  Aktualny magacin mjez druhim z přinoškom za dźěći „Holčka a hadźacy kral“, přehladom powěsćow a pokiwami

13:00 Tematiske wusyłanje: Lětna bilanca – Serbja 2022 (1.)

13:40 Nabožne wusyłanje

(Cyril Pjech)

po tym zbožopřeća

Ćežišćo januarskeho wudaća telewizijneho magacina Wuhladko je prašenje, hač „směł předsyda Domowiny zdobom čłon politiskeje strony być“. Dalšej přinoškaj wěnujetej so restituciji dźěla wobstatka bywšeje biblioteki Maćicy Serbskeje a jubilejomaj Němsko-Serbskeho ludoweho dźiwadła: Prěnje powołanske serbske jewišćo bu před 75 lětami załožene, NSLDź bu 1963 wutworjene a wobsteji tuž mjeztym hižo 60 lět. Nimo toho portretuja młodeho spěwarja Lipšćanskeho Thomaneroweho chóra, za kotrehož je „hodowny čas wšo druhe hač měrny“.

Telewizija MDR wusyła Wuhladko jutře, sobotu, w 11.45 hodź. Wospjetowanje w samsnym sćelaku slěduje póndźelu, 9. januara, w 6.40 hodź. Telewizija RBB pokaza magacin sobotu, 14. januara, w 13.40 hodź. W mediatece MDR je aktualne Wuhladko wot jutřišeho cyłe lěto přistupne.