Wólby a bičwolejbul
Telewizijny magacin Wuhladko wěnuje so w septembrje předewšěm „móžnym konsekwencam njedawnych wólbow do Sakskeho sejma a wuskutkam na Serbow“. Dalšej temje stej „renaturěrowanje Čornicy mjez Prěčecami a Haslowom“ a lětuša bičwolejbulowa turneja radija Satkula.
Telewizija MDR pokaza magacin jutře, sobotu, w 11.35. hodź. Wospjetowanje na samsnym sćelaku slěduje póndźelu, 9. septembra, w 6.45 hodź. Telewizija RBB wusyła Wuhladko sobotu, 14. septembra, w 13.35 hodź. W mediatece ARD je magacin wot jutřišeho cyłe lěto kóždy čas přistupne.
Raduš, Bórkowy, Dešno
Telewizijny magacin Łužyca wěnuje so w awgusće předewšěm přichodej Radušanskeho hrodźišća. Moderator Christian Mathée je so na městnje wo aktualnym stawje planowanja hladajo na předwidźanu předań přestrjenje wobhonił. Z dalšim přinoškom rozprawi wo přihotach na lětuše serbske powěsćowe čołmikowanje w Bórkowach. Wusyłanje skulojćitej portret Dešnjanskeho wjesnjanosty Freda Kaisera a nowy dźěl serije „Paula wari“, tónraz z „lětnim receptom ze serbskeje kuchnje“.
Telewizija RBB pokaza magacin jutře, sobotu, w 13.35 hodź. Wospjetowanje na samsnym sćelaku slěduje srjedu, 21. awgusta, w 2.55 hodź. Telewizija MDR wusyła Łužycu sobotu, 24. awgusta, w 11.45 hodź. W mediatece ARD je magacin wot jutřišeho cyłe lěto kóždy čas přistupny.
Prózdniny su nimo
Nachilacy so prózdninski čas twori hłowne ćežišćo wusyłanja telewizijneho magacina Wuhladko w awgusće. Wotpowědny přinošk wopřijima mjez druhim putnikowanje ministrantow do Roma, Mjezynarodny kurs za serbsku rěč a kulturu Serbskeho instituta kaž tež zjimanje ferialnych poskitkow za šulerki a šulerjow. Nimo toho wěnuja so wólbam w Sakskej a prašeja so, hač změja Serbja w nowym krajnym sejmje serbskich zapósłancow. Dalša tema je „Warnočanska generacija“, za kotrejež slědami je mustwo Wuhladka „zhromadnje ze šulerkami a šulerjemi Serbskeho gymnazija Budyšin we Varnsdorfje slědźiło, hdźež ma w kooperaciji z tamnišim gymnazijom nastać wučbna šćežka wo legendarnym času“.
Telewizijny sćelak MDR wusyła Wuhladko jutře, sobotu, w 11.45 hodź. Wospjetowanje na samsnym sćelaku slěduje póndźelu, 5. awgusta, w 6.45 hodź. Tež RBB pokaza magacin sobotu, 8. junija, w 13.35 hodź. W mediatece ARD je Wuhladko wot jutřišeho cyłe lěto přistupne.
Wopyt „mjez morjomaj“
Telewizijny magacin Łužyca wobswětluje w swojim julijskim wusyłanju Europeadu 2024. Mustwo wokoło moderatora Christiana Mathéeja je turněr koparkow a koparjow, kotryž je so njedawno w Schleswigsko-Holsteinskej a Danskej wuhrał, přewodźali. Předewšěm su wubranki a fanow „tamnych mjeńšin ze serbskeje perspektiwy“ wobkedźbowało. Wosebje w fokusu steji we wobłuku wubědźowanja wuhotowany Dźeń kultury, na kotrymž „wužichu wšitke koparske cyłki, jich přiwisnicy a organizatorojo składnosć, so mjez sobu wuměnić“. Nimo toho wobhonichu so telewiznicy wo kubłanskich a kulturnych institucijach hosćićelskeho regiona „mjez morjomaj“ z třomi minoritami (Frizojo, Danojo kaž tež Sintojo a Romojo). Wotpowědne impresije a někotryžkuli „nastork snano tež za Łužicu“ přinošk skulojća.
Telewizija RBB wusyła magacin jutře, sobotu, w 13.35 hodź. a srjedu, 24. julija, w 2.55 hodź. Telewizija MDR pokaza Łužycu sobotu, 27. julija, w 11.45 hodź. W mediatece ARD je magacin wot jutřišeho cyłe lěto kóždy čas přistupny.
Fasety Europeady
Za „Serbow drje sobu najwažniši a najwjetši sportowy podawk“ je z ćežišćom julijskeho wusyłanja telewizijneho magacina Wuhladko. Měsacy dołho so fanojo, hrajerki a hrajerjo na turněr přihotowachu – na Europeadu, koparske europske mišterstwo narodnych mjeńšin. Tónkróć dojědźechu sej Serbja na sewjer Němskeje.
Tola Europeada je wjace hač jenož sportowy wjeršk. Je to zetkanje rěčow a kulturow z cyłeje Europy. Tule nastawaja nowe přećelstwa a prezentuja so mjeńšiny. Nimo toho skići Europeada mjeńšinam móžnosć so mjez sobu zeznawać, přirunać a lěpje dorozumić. Byrnjež na hrajnišću za Serbow tak derje njeběžało – na kromje hrajnišća njeběše chutneje konkurency. Wjace hač 500 fanow bě z Łužicy do němsko-danskeho hraničneho regiona přijěło. Woni pohonjowachu swojej mustwje a postarachu so tež tónkróć wo wulkotnu naladu a atmosferu. Samo fanowy klub z Čěskeje poda so na daloki puć, zo by sej serbskich hrajerjow wobhladał a je podpěrał.
Mytowanje a swjedźeń
Telewizijny magacin Łužyca wěnuje so w swojim junijskim wudaću mjez druhim 78. ewangelskemu serbskemu cyrkwinskemu dnjej w Slepom a spožčenju Myta Miny Witkojc Madlenje Norbergerowej. Nimo toho pokročuja z „Pišćelowej jězbu po Delnjej Łužicy“.
Telewizija RBB wusyła Łužycu jutře, sobotu, w 14. hodź. Wospjetowanje na samsnym sćelaku slěduje srjedu, 19. junija, w 2.30 hodź. Telewizija MDR pokaza magacin sobotu, 22. junija, w 11.45 hodź. W mediatece ARD je Łužyca wot jutřišeho cyłe lěto kóždy čas přistupna.
Wusyłaja tónraz zašo
Za něšto tydźenjow je tak daloko, zahwizda so Europeada – europske koparske mišterstwo narodnych mjeńšin. Turněr wotměje so kónc junija w Schleswigsko-Holsteinskej a Danskej, a Serbja su sej tónkróć tójšto předewzali. Po 3. městnje zašły króć w Korutanskej chcedźa tónraz do finala přińć – kader za to steji. Dźěćacy reporter Mato je muske mustwo a tež žónsku wubranku na přihotowanskich hrach wopytał a so za cilemi prašał.
Dalšej přinoškaj wobswětlujetej zahoritosć cyłkownje 20 šulerjow Worklečanskeje wyšeje šule za motocross kaž tež žiwjenje na bio-dworje, hdźež sej pachołaj samo zwažitaj, na kruwje jěchać.
Telewizija MDR wusyła Wuhladko jutře, sobotu, hižo w 11 hodź. Wospjetowanje na samsnym sćelaku slěduje póndźelu, 3. junija w 6.45 hodź. Telewizija RBB pokaza magacin sobotu, 8. junija w 13.35 hodź. W mediatece ARD je Wuhladko wot jutřišeho cyłe lěto kóždy čas přistupne.
Premjera a přirodoškit
Telewizijny magacin Wuhladko wěnuje so w meji mjez druhim Budyskej premjerje filma „Bei uns heißt sie Hanka – Pla nas gronje jej Hanka – Pola nas rěka wona Hanka“. Dalše ćežišćo je po wšěm zdaću prawicarsko-ekstremistiski nadpad na serbskich młodostnych na lětušich jutrownych rejach w Šunowje. Nimo toho wobswětluja „wobšěrny přirodoškitny projekt zwjazkoweho wobswětoweho ministerstwa za mnohotnosć družin we Łužicy“ na přikładźe Łučinskeho hata. Wokolny areal njedaloko Radworja je „z wotstawkom najwjetša a najdróša projektowa kónčina“ mjenowaneje naprawy.
Telewizija MDR wusyła Wuhladko jutře, sobotu, w 11.45 hodź. Wospjetowanje na samsnym sćelaku slěduje póndźelu, 6. meje, w 6.45 hodź. Telewizija RBB pokaza magacin sobotu, 11. meje, w 13.35 hodź. W mediatece ARD je Wuhladko wot jutřišeho cyłe lěto kóždy čas přistupne.
Slepjanšćina a premjera
Hłowna tema aprylskeho telewizijneho magacina Łužyca je Slepjanska serbšćina. Moderator Christian Matthèe wobswětluje z rěčnej motiwatorku Domowiny Julianu Kaulfürstowej a rěčespytnikom Hyncom Rychtarjom, kak hodźał so „přewšo wohroženy idiom, kotryž jenož hišće horstka maćeršćinarjow w starobje nad 75 lětami wobknježi, snano hišće wuchować“. W tym zwisku portretuje Matthèe tež Šustrojc dwór w Slepom „jako historisku městnosć wu- a wobchowanja rěče“.
Z dalšim přinoškom wěnuja so „składnostnje zahajenja sezony“ prašenju, hač „eksistuje zboka turistiskeho zwičnjenja wokolnje Lěd hišće awtentiske serbske žiwjenje podłu Błótowskich groblow“. Nimo toho wopřijima wusyłanje reportažu wo prapremjerje inscenacije „Smjerś po štuckach“, kotruž bě Němsko-Serbske ludowe dźiwadło njedawno w Hochozy wuhotowało a kotruž tele dny ducy po Delnjej Łužicy předstaja.
Jutry a dwójce serbšćina
Hłownej přinoškaj aprylskeho telewizijneho magacina Wuhladko wěnujetej so jutram. Nimo powšitkowneje bilancy wobswětluja „mnohich pilnych pomocnikow a podpěraćelow w pozadku, bjez kotrychž nałožk jutrowneho jěchanja drje dawno hižo njeeksistował“.
Dalša tema je rěčna situacija na łužiskich šulach. Po „wobkedźbowanjach někotrych šulerjow“ so wosebje w přestawkach serbska rěč w Serbskim gymnaziju Budyšin dźeń a bóle pozhubi – fenomen to, kajkiž tež na druhich serbskich kubłanišćach zwěsća.“ Z wjacorymi naprašowanjemi pytachu telewiznicy za wotmołwami, „na čim to zaleži a što móžeš na tym změnić“.
Pod hesłom „Wojowar za rěč“ portretuja Jana Barta, jednoho z „mało Serbow, kotryž bu ze Zwjazkowym zasłužbnym křižom, najwyšim wuznamjenjenjom Němskeje, počesćeny“ a kiž je jako „wunamakar Witaj-projekta nimale třećinu swojeho žiwjenja na dwurěčnym kubłanju w pěstowarnjach Łužicy sobu skutkował“.
