Budyšin (SN). Z měšćanskim swjedźenjom su Wojerecy 9. septembra jako wjeršk zarjadowanjow w běhu lěta na 750. róčnicu swojeho prěnjeho naspomnjenja spominali. W programje pak bě jich poměrnje mało serbskich poskitkow. Naje­bać to su w měsće serbske nałožki, tradicije a rěč hač do dźensnišeho žiwe. Tutej naležnosći wěnuje so mjez druhim Wuhladko, kotrež jutře, 6. oktobra, 11.45 hodź. telewizijny sćelak MDR wu­syła.­

Dalše temy Wuhladka su daloko znaty park błudźenkow we Wochozach, nowy serbski farar dr. Robert Malink w Ra­­ke­cach a klětuše wólby. Hnydom trójce su Serbja klětu namołwjeni wolić hić.

Budyšin (SN). Na spočatku koparskeje hry regionalneje ligi Biskopicy – Budissa Budyšin je wospjet k antiserbskim pa­rolam dóšło. 33lětny tak mjenowany nawoda Biskopičanskeho fanoweho bloka namołwješe swojich přiwisnikow, nadawać Budyskim přihladowarjam wjackróć ranjace wudmo „Sorbenschweine“. Po­licija podawk z kameru dokumentowaše a zwěsći personalije škaraka. Mjeztym so tež statny škit z podawkom zaběra. To je jedna z temow septemberskeho maga­cina Wuhladko, kotrež telewizijny sćelak MDR jutře, 1. septembra, w 11.45 hodź. wusyła. Nimo toho wěnuja so redakto­ro­jo festiwalej Nukstock, kotryž bě minjeny kónc tydźenja z dohromady 750 wopy­towarjemi znowa wulki wuspěch.

Něhdźe 70 000 ministrantow ze wšeho swěta přebywaše wot 30. julija do dźensnišeho w Romje. Tež serbscy ministranća běchu so minjenu njedźelu na puć do wěčneho města podali. Wjeršk bě wutorna awdienca z bamžom Franciskusom. Kamerateam Wuhladka je serbsku skupinu přewodźał a bě wězo tež při awdiency ze swjatym wótcom na městnje, tak chcedźa w jutřišim wusyłanju wo dožiwjenjach młodych křesćanow rozprawjeć.

Wěnować budu so serbscy telewizijnicy w sobotnym wudaću, kotrež započnje so w 11.45 hodź. na MDR, tež po­daw­kej před 50 lětami w Čěskej, kotryž je do ­stawiznow jako „Praske nalěćo“ zašoł. Wuhladko wobswětla podeńdźenja lěta 1968 wokoło Alexandera Dubčeka a jeho reformowych myslow kaž tež wokoło wojerskeho zasaha jednotkow statow Waršawskeho pakta w tehdyšej Čěskosłowakskej. Wospjetowanje budźe póndźelu, 6. awgusta, w 6.40 hodź. na MDR a sobotu, 11. awgusta, w 13.30 hodź. w telewiziji RBB. SN

Budyšin (SN). W julijskim wudaću Wuhladka wita moderatorka přihladowarjow z nižozemskeho Leeuwardena. Přičina skerje njezwučeneje městnosće wu­syłanja je „Serbski tydźeń“ w kulturnej stolicy Europy pola Frizow, kotryž wotměchu tam wot 24. junija do 1. julija. Što su serbscy zastupjerjo a z nimi zhro­madnje tež wopytowarjo dožiwili, zhonja zajimcy jutře w 11.45 hodź. w telewiziji MDR. Nimo toho chcedźa we Wuhladku dźěl hoberskeho spektruma zarjadowanjow kulturneje stolicy předstajić. Dalša tema je nimo powěsćow bičwolejbulo­wa tura Radija Satkula. Z přećelemi su Satkularjo hižo w pěsku při wysokim saku­ hrali a chcedźa přeradźić, što lětsa na nas čaka.