Što wo Serbach wědźa?
Ćežišćo junijskeho wudaća telewizijneho magacina Wuhladko tworja serbsko-čěske poćahi a prašeni, kak znata mjeńšina w Němskej pola južnych susodow je a štó drje je najwjetši podpěraćel Serbow w čěskim knježerstwje. Nimo toho wěnuja so z přinoškom „Potajnstwo Manfredoweho jězora“ drje „dosć krótkemu, ale dotal nimale zabytemu kapitlej stawiznow wudobywanja brunicy w Hornjej Łužicy“ a portretuja młodu serbsku skótnu lěkarku Annamariju Zahonowu.
Telewizija MDR pokaza Wuhladko jutře, sobotu, w 11.45 hodź. Wospjetowanje na samsnym sćelaku slěduje póndźelu, 5. junija, w 6.40 hodź. Telewizija RBB wusyła magacin sobotu, 10. junija, w 13.35 hodź. W mediatece ARD je aktualne Wuhladko wot jutřišeho cyłe lěto kóždy čas přistupne.
Njewšědna nócpod wjerškom meje
Jutry w Delnjej Łužicy
Aprylske wudaće telewizijneho magacina Łužyca je cyle na jutry wusměrjene, wotbłyšćowace předewšěm jutrowne jěchanje w Cerkwicy. Moderator Christian Matthée je jěcharki a jěcharjow, kotřiž tutu tradiciju tež w Delnjej Łužicy wuspěšnje wobchowaja, přewodźał.
Dalše ćežišćo budźe wójna w Ukrainje a jeje wuskutki: „W Choćebuskim Delnjoserbskim gymnaziju su młodźi ćěkancy woprawdźe wužadani. Njedyrbja so jenož w cuzym kraju nowo orientować, ale tež nowej rěči, mjenujcy serbsce a němsce nawuknyć“, kaž sćelak RBB zdźěla. W tym zwisku portretuja młodu Ukrainjanku a wobswětluja, kak nawoda kubłanišća dr. Matthias Guttke, kiž bě sam jako docent w Ukrainje skutkował, swoje tamniše nazhonjenja do wučby zapleće. Nimo toho wopominaja njeboh ludoweho wuměłca a brašku Helmuta Kurja.
Telewizija RBB wusyła Łužycu jutře, sobotu, w 13.35 hodź. Wospjetowanje na samsnym sćelaku slěduje srjedu, 19. apryla, w 3.15 hodź. Telewizija MDR pokaza magacin sobotu, 29. apryla, w 11.45 hodź. W mediatece RBB je wusyłanje wot jutřišeho přez cyłe lěto kóždy čas přistupne.
Jutry, krokawy a 2plus
Hłowne ćežišćo aprylskeho wusyłanja telewizijneho magacina Wuhladko su „přihoty na jutry w Serbach“. Nimo toho wěnuja so z kritiskej bilancu „15lětnemu wuwučowanju na serbskich zakładnych a wyšich šulach po koncepće 2plus“. Dalšej přinoškaj wobswětlujetej tele dny wotměwace so pućowanje krokawow a prašenje, „što móže jednotliwc za škit tutych amfibijow“ zdokonjeć kaž tež dźěło serbskeho lěkarja Mattija Bětnarja, kiž jako sportowy medicinar tuchwilu koparjow Dynama Drježdźany přewodźuje.
Telewizija MDR wusyła Wuhladko jutře, sobotu, w 11.45 hodź. Wospjetowanje na samsnym sćelaku slěduje 3. apryla w 6.40 hodź. Telewizija RRB pokaza magacin sobotu, 8. apryla, w 13 hodź. W mediatece MDR je Wuhladko wot jutřišeho cyłe lěto kóždy čas přistupne.
Na serbskich slědach
Z měrcowskim wudaćom telewizijneho magacina Łužyca chodźi moderator Christian Matthée w Friedlandźe pola Bezkowa po we wuchodnej Němskej jónkrótnych slědach. Tu su přez lětstotki Serbja, Židźa a Němcy měrliwje a ze wzajomnej tolerancu žiwi byli. Historikar dr. Alfred Roggan je nimale pozabytu stawiznu w lěta dołhim drobnym dźěle přeslědźił. Mjeztym zo su so serbske a židowske tradicije w Friedlandźe zhubili, pokazuje stawiznar, kak na druhich městnach předewšěm młodźi ludźo serbsku kulturu wotkrywaja, a to z „filmowej jězbu ze Žylowskeho zapusta k modernej subkulturje, kotraž so dźeń a lěpje spleće“.
Telewizja RBB wusyła Łužycu jutře, sobotu, w 13.40 hodź. Wospjetowanje na samsnym sćelaku slěduje srjedu, 22. měrca, w 3.05 hodź. Telewizija MDR pokaza magacin sobotu, 25. měrca, w 11.45 hodź. W mediatece RBB je wusyłanje wot jutřišeho přez cyłe lěto kóždy čas přistupne.
Serbšćina w syći?
Tematiske ćežišćo měrcowskeho wudaća telewizijneho magacina Wuhladko je „prezenca serbšćiny w interneće“. Z kritiskim přinoškom bilancuja „aktualny staw wuwića“ a prašeja so za „njewužitymi potencialemi“. Nimo toho portretuja skupinu młodych hudźbnikow, kotřiž z projektom „Popsorben“ mjeztym „online tysacy ludźi“ z mjezynarodnymi hitami „w jónkrótnym stilu“, tworjacym „móst mjez serbskej tradiciju a pop-kulturu“, zahori. Reportaža w Konjecach kaž tež w Šunowje a wožiwjenej tradiciji pjerjodrěća a wuhlad na klětuše wólby Sakskeho krajneho sejma wusyłanje skulojćeja.
Telewizija MDR pokaza Wuhladko jutře, sobotu, w 11.45 hodź. Wospjetowanje na samsnym sćelaku slěduje póndźelu, 6. měrca, w 6.40 hodź. Telewizija RBB wusyła Wuhladko sobotu, 11. měrca, w 13.35 hodź. W mediatece MDR je magacin wot jutřišeho cyłe lěto kóždy čas přistupny.
Gymnazialny zapust
Hłowny přinošk februarskeho wudaća telewizijneho magacina Łužyca wěnuje so 36. zapustej Delnjoserbskeho gymnazija Choćebuz. Nimo toho portretuja noweho nawodu mjenowaneho kubłanišća kaž tež młodu serbsku kachlestajerku a předstaja krótkofilm Anne-Kathrin Schöler-Rensch a Clemensa Schieska „Měr“. Z dalšim přinoškom gratuluja „spěwacemu poetej“ Berndej Pittkuningsej, kotryž bu loni z Mytom Miny Witkojc wuznamjenjeny.
Telewizja RBB wusyła Łužycu jutře, sobotu, w 13.40 hodź. Wospjetowanje na samsnym sćelaku slěduje srjedu, 22. februara, w 3.05 hodź. Telewizija MDR pokaza magacin sobotu, 25. februara, w 11.45 hodź. W mediatece RBB je wusyłanje wot jutřišeho cyłe lěto kóždy čas přistupne.
Klemperer we Łužicy
Poetiski dokument
„Fragmenty“ rěka połhodźinski dokumentarny film Romana Pernaka, z kotrymž zahaji telewizijny magacin Łužyca lětuši rjad swojich wusyłanjow. Pask „połny ćicheje poezije“ wobswětluje jězbu třoch muži, kotřiž běchu spočatk 1970tych lět ducy po swojej delnjołužiskej domiznje za serbskimi korjenjemi mjeztym přewažnje němsce rěčacych wjesnjanow pytali, štož z mikrofonom a zynkopaskom dokumentowachu. Pjeć lětdźesatkow pozdźišo je młody hudźbny etnolog tele nahrawanja wědomostnje wuhódnoćił a při tym mysl zrodźił, jewjace so stare, dźensa nimale zabyte ludowe spěwy znowa wožiwić. Roman Pernak je jeho z kameru přewodźał; wuslědk je dokumentarny film, kiž je zdobom časowy dokument.
Telewizija RBB wusyła Łužycu jutře, sobotu, w 13.40 hodź. Wospjetowanje na samsnym sćelaku slěduje srjedu, 25. januara, w 2.55 hodź. W mediatece RBB je magacin wot jutřišeho cyłe lěto kóždy čas přistupny.
Eklat, nawrót a jubilejej
Ćežišćo januarskeho wudaća telewizijneho magacina Wuhladko je prašenje, hač „směł předsyda Domowiny zdobom čłon politiskeje strony być“. Dalšej přinoškaj wěnujetej so restituciji dźěla wobstatka bywšeje biblioteki Maćicy Serbskeje a jubilejomaj Němsko-Serbskeho ludoweho dźiwadła: Prěnje powołanske serbske jewišćo bu před 75 lětami załožene, NSLDź bu 1963 wutworjene a wobsteji tuž mjeztym hižo 60 lět. Nimo toho portretuja młodeho spěwarja Lipšćanskeho Thomaneroweho chóra, za kotrehož je „hodowny čas wšo druhe hač měrny“.
Telewizija MDR wusyła Wuhladko jutře, sobotu, w 11.45 hodź. Wospjetowanje w samsnym sćelaku slěduje póndźelu, 9. januara, w 6.40 hodź. Telewizija RBB pokaza magacin sobotu, 14. januara, w 13.40 hodź. W mediatece MDR je aktualne Wuhladko wot jutřišeho cyłe lěto přistupne.
