Wětrnikaj, pasion ...
Wumóžuja módroćišć
„Chto wumóžyjo łužyski módrośišć?“ je titul filma, kotryž pokazaja w awgustowym wusyłanju telewizijneho magacina Łužyca. Pask Diany Šejcoweje wobswětluje tradicionalne rjemjesło módroćišća, kotremuž so mjeztym předewšěm w Delnjej Łužicy zaso wjacori akterojo wěnuja, po tym zo su so wotpowědne dźěłarnje w regionje nimale dospołnje pozhubili. Zaměr tychle entuziastow je, za zhotowjenje na přikład serbskeje drasty njeparujomnu tradiciju wožiwić, za čož so stareho gratu runje tak přimaja kaž najnowšich technologijow.
Telewizija RBB wusyła Łužycu jutře, sobotu, w 13.35 hodź. Wospjetowanje na samsnym sćelaku slěduje zajutřišim, njedźelu, w 7.30 hodź. Telewizija MDR pokaza magacin sobotu, 23. awgusta, w 12 hodź. W mediatece ARD je Łužyca wot jutřišeho cyłe lěto kóždy čas přistupna.
Woda, wowcy, dres a bus
Telewizijny magacin Wuhladko wěnuje so w awgusće hłownje drastowemu porjadej w šulach. Přičina je předwidźany dresowy kode, kajkiž je w nachilacych so lěćnych prózdninach mjez chowancami Serbskeho gymnazija Budyšin horcu diskusiju wuskutkował. Dalšej přinoškaj wobswětlujetej pochad pitneje wody w dwurěčnych regionach Budyskeho wokrjesa a pilotowy projekt samojězdźaceho busa při Bjerwałdskim jězoru. Nimo toho portretuja Gerata Šmita, kotrehož předstaja jako „drje poslednjeho powołanskeho wowčerja mjez Budyšinom, Kamjencom a Wojerecami“.
Telewizija MDR wusyła Wuhladko jutře, sobotu, w 12 hodź. Wospjetowanje na samsnym sćelaku slěduje póndźelu, 4. awgusta, w 6.50 hodź. Telewizija RBB pokaza magacin sobotu, 9. awgusta, w 13.35 hodź. W mediatece ARD je Wuhladko wot jutřišeho cyłe lěto kóždy čas přistupne.
Kak dale z kubłanjom?
Rěčne kubłanje je w juliju ćežišćo telewizijneho magacina Łužyca. Tak rěči moderator Christian Matthée z Heikom Kozelom wo napjatej situaciji nastupajo bilingualnu wučbu na Delnjoserbskim gymnaziju Choćebuz. Dale wobswětluje snadny zajim maturantow za studij sorabistiki, kotryž so na personalne połoženje na šulach Delnjeje Łužicy wuskutkuje. Slěborny jubilej Witaj-projektow pak je moderatorej z přikładom za tamniše pozitiwne wuwiće. Telewizija RBB wusyła Łužycu jutře, sobotu, w 13.35 hodź. Wospjetowanje na samsnym sćelaku slěduje zajutřišim, njedźelu, w 7.30 hodź. Telewizija MDR pokaza magacin sobotu, 26. julija, w 12 hodź. W mediatece ARD je wot jutřišeho cyłe lěto kóždy čas přistupny.
Na slědach Krabata
Telewizija MDR pokaza wutoru, 22. julija, w 21 hodź. we wobłuku rjadu „Der Osten – entdecke, wo du lebst“ reportažu „Krabat – auf den Spuren einer Legende“. Nimo jězby „do wutroby, wěry a identity serbskeho ludu“ wopřijima film dotal njewusyłane nahrawanja wuprajenjow Jurja Brězana a Otfrieda Preußlera. W mediatece ARD je přinošk hižo přistupny.
Festiwal, chorhoje a husy
Wjerški 15. mjezynarodneho folklorneho festiwala Łužica – Łužyca – Lausitz tworja w juliju žro telewizijneho magacina Wuhladko. Jako medijowy partner zarjadowanja bě sćelak MDR na jeiwšćach runje tak přitomny kaž za kulisami. Dalšej přinoškaj wěnujetej so wobzamknjenju Budyskeje měšćanskeje rady, wupowěšeć přichodnje chorhoje Němskeje a Hornjeje Łužicy, při čimž wšako so serbske barby ignoruja, a zazběhu kóždolětneje lěćneje bičwolejbuloweje turneje Radija Satkula. Nimo toho předstaja projekt Slepjanskeje serbskeje wyšeje šule, w kotrehož wobłuku so šulerjo w prózdninach wo cyłkownje 40 husacych młodźatkow staraja.
Telewizija MDR wusyła Wuhladko jutře, sobotu, w 12 hodź. Wospjetowanje na samsnym sćelaku slěduje póndźelu, 7. julija, w 6.50 hodź. Telewizija RBB pokaza magacin sobotu, 12. julija, w 13.35 hodź. W mediatece ARD je aktualne Wuhladko wot jutřišeho cyłe lěto kóždy čas přistupne.
Baje, dorost a jubilej
Telewizijny magacin Łužyca wěnuje so w juniju hłownje předstajenju „Wukšadnjony pókład“, lětušej inscenaciji w rjedźe Błótowskich powěsćowych nocow. Nimo toho pokazaja přinoškaj „50. jubilej Mósćańskego swajźbaŕskego pśeśěga“ a „25. dny serbskeho dźěćaceho dźiwadła w Budyšinje“. We wobłuku rubriki „Paula wari“ předstaja dalši serbski recept.
Telewizija RBB pokaza Łužycu jutře, sobotu, w 13.35 hodź. Wospjetowanje na samsnym sćelaku slěduje zajutřišim w 7.30 hodź. Telewizija MDR wusyła magacin přichodnu sobotu, 28. junija, w 12 hodź. W mediatece ARD je Łužyca wot jutřišeho cyłe lěto kóždy čas přistupna.
Rěčne hnězdo w fokusu
Telewizijny magacin Wuhladko wěnuje so w juniju hłownje projektej Domoj, kotryž ma wobdźělnikam zmóžnić, w dźewjeć měsacach serbšćinu nawuknyć. Dalšej přinoškaj wobswětlujetej kónc šamotownje we Wětrowje a přihoty na 15. mjezynarodny folklorny festiwal Łužica – Łužyca– Lausitz“. Nimo toho portretuja młodu Serbowku, Annabell Wandeltec, kotraž je sej jako samostatna pohrjebniska fachowča „powołanski són spjelniła“.
Telewizija MDR pokaza Wuhladko jutře, sobotu, w 12 hodź. Wospjetowanje na samsnym sćelaku slěduje póndźelu, 16. junija, w 6.50 hodź. Telewizija RBB wusyła magacin sobotu, 14. junija, w 13.30 hodź. W mediatece ARD je Wuhladko wot jutřišeho cyłe lěto kóždy čas přistupne.
„Dolina smjerće“
Dźensa wabi idyliski doł podłu Klóšterskeje wody do wuchodźowanja, před 80 lětami běše wony blak hela na zemi – Lipjo před wrotami klóštra Marijina hwězda w Pančicach-Kukowje. 27. apryla 1945 sta so wuski kotoł ze smjertnymi paslemi a za sta pólskich wojakow z poslednjej staciju – z „Dolinu smjerće“. Z pomocu hišće žiwych časowych swědkow a historikarjow z Pólskeje a Němskeje poda so mejske wudaće telewizijneho magacina Wuhladko na historiske slědy jednoho z najkrawnišich bitwišćow Druheje swětoweje wójny. „W mojim žiwjenju njeje so mi ničo tak hłuboko zašćěpiło, kaž tute poslednje dny w aprylu 1945. Běchu tak surowe, zo so mi dźensa hišće wo tym dźije.“ Tak rysuje 90lětny Jurij Nuk wone dny. „Sym tole z wosom lětami wšitko sobu dožiwił, ze swojim dźědom a wowku. Wojacy SS přijědźechu a wšo zatřělichu, štož bě hišće žiwe“, dopomina so Beno Młynk z Hórkow. „Mój nan je 1945 tu w 2. pólskej armeji wojował. Z jeho regimenta je wot 1 700 wojakow jenož něhdźe 300 přežiwiło“, powěda potomnik pólskeho wojaka Jerzy Warszawski.
Delnjołužiske jutry
„Jatšy we Łužycy“ rěka reportaža, z kotrejž telewizijny magacin Łužyca w aprylu stare, zdźěla nimale pozabyte a poněčim znowa wožiwjene nałožki kołowokoło jutrow w Delnjej Łužicy wotbłyšćuje. Jutry su „symbol kontinuity a změny za hłuboku zwjazanosć Serbow ze swojimi stawiznami kaž tež mocy zhromadnosće, kotraž nosy rituale do žiweho přichoda“. Wosebje w fokusu steja „młodźi ludźo, kotřiž sej starodawne wašnja přiswojeja a tak tradiciju a modernu zjednoćeja“.
Telewizija RBB wusyła Łužycu jutře, sobotu, w 13.25 hodź. Wospjetowanje na samsnym sćelaku slěduje zajutřišim, njedźelu, w 7.30 hodź. Telewizija MDR pokaza magacin jutře, sobotu, w 12 hodź. W mediatece ARD je Łužyca wot jutřišeho cyłe lěto kóždy čas přistupna.
Rozrost a portrety
Ćežišćo telewizijneho magacina Wuhladko w aprylu je powjetšacy so serbski sydlenski rum. Wotpowědny přinošk wobswětluje přičiny a předstaja wsy, kotrež chcedźa so na sewjeru wokrjesa Budyšin tomule rumej přizamknyć. Dale portretuja znateho serbskeho rězbarja Mikławša Dyrlicha a skerje njeznateho resp. pozabyteho wusahowaceho serbskeho wědomostnika Alwina Mitaša. Nimo toho předstaja najmłódšu gmejnu w Sakskej Ralbicy-Róžant.
Telewizija MDR wusyła Wuhladko jutře, sobotu, w 12 hodź. Wospjetowanje na samsnym sćelaku slěduje póndźelu, 7. apryla, w 6.50 hodź. Telewizija RBB pokaza magacin sobotu, 12. apryla, w 13.35 hodź. W mediatece ARD je aktualne Wuhladko wot jutřišeho cyłe lěto přistupne.
