Waršawa (dpa/SN). Pólska móže sej po posudku parlamenta wot Němskeje wotškódnjenje za zničenja w Druhej swětowej wójnje žadać. Wčera wozjewichu we Waršawje dokument sejma, w kotrymž rěka: „Je legitimne, zo ma Republika Pólska prawo na wotškódnjenje přez Zwjazkowu republiku Němsku. Twjerdźenje, zo su žadanja zańdźene, njeje woprawnjene.“ Wozjewjenje pólskeho knježerstwa z lěta 1953, zo so reparacijow wzda, je přećiwowustawne a bě so jenož ćišća Sowjetskeho zwjazka dla stało.
Minjene tydźenje su so pólscy politikarjo stajnje zaso za reparacije wuprajili. Němska je wotpokazuje. Pólski wonkowny minister Witold Waszczykowski wčera zdźěli, zo su nětko dalše posudki a analazy wo škodach w Pólskej trěbne.
Istanbul/Berlin (dpa/SN). Pućowanske warnowanje turkowskeho knježerstwa za Němsku krizu z Ankaru přiwótřa. Tež zwjazkowa kanclerka Angela Merkel (CDU) postupowanje raznje kritizuje. „Chcu cyle jasnje zwuraznić: Kóždy turkowski staćan smě k nam přińć“, kanclerka wuswětla. „Pola nas njebudźe žadyn žurnalist zajaty, tu žanych žurnalistow do přepytowanskeje jatby njetyknu, pola nas knježi swoboda měnjenjow a prawniskostatnosć. A na to smy hordźi.“
Turkowske wonkowne ministerstwo je sobotu pućowanske warnowanje za Němsku wuprajiło. Tak warnuje před móžnym njepřećelskim a rasistiskim wobchadźenjom a werbalnymi atakami w Němskej. Turkojo njeměli so na wólbnych zarjadowanjach wobdźělić abo demonstracijach wobdźělić, kotrež teroristiske organizacije wotměwaja a němske zarjady dopušćeja.
Berlin (dpa/SN/MiR). Hižo lěta zwěsćeja wěstotni eksperća wobstajne pospyty, runje we wobłuku kritiskeje infrastruktury kaž pola milinarnjow, přiběracu sabotažu. Hackerojo spytaja tuchwilu we wulkim stilu za to trěbne informacije zběrać. Mnohe lěta hižo wuskuša aktiwna skupina hackerow milinarnje w zapadnych krajach Europy, w USA kaž tež w Turkowskej, zo móhli je sabotować. Tole zwěsćeja eksperća na polu informaciskeje techniki. Hackeram dźe wo to, do kompjuteroweje techniki so zadobyć a informacije zběrać. Tole zdźěla firma za wěstotnu software Symantec. Hackerojo su so hižo do syće 20 ameriskich a šěsć turkowskich předewzaćow zadobyli. Dale słušachu k škodowanym dodawarjo milinowej branši w Šwicarskej. Tež milinarnje w Němskej, Nižozemskej a Belgiskej njewostachu wot wuskušowanja přelutowane. Wuspěšne nadběhi pak dotal zwěsćene njejsu.
Stróža (SN/bn). Zahajenski koncert Stróžanskich nazymskich wikow přirody pod hesłom „W změnje časow“ zahori minjeny pjatk něhdźe 80 wopytowarjow w swjedźenskim stanje při centrumje biosferoweho rezerwata, kotryž je zarjadowanje zhromadnje z towarstwom Radiška a z podpěru Załožby za serbski lud na iniciatiwu Liany Bertók wuhotował.
ZFC Meuselwitz
– Budissa Budyšin 0:1 (0:0)
Zestawa hosći: Ebersbach – Kunze, Patka, Hoßmang, Heppner, Schmidt, Weiß, Pfanne, Krawčik (67. Müller), Bönisch (82. Gehrmann), Milde (73. Barnickel)
Po tym zo je Budissa Budyšin w sezonje 2016/2017 wobě hrě přećiwo ZFC Meuselwitzej přěhrała, chcyše mustwo trenarja Torstena Gütschowa tónkróć znajmjeńša dypk. W zašłymaj hromaj běchu so Budyscy koparjo tójšto sebjewědomja nasrěbali a tuž před 491 přihladowarjemi porjadnje započachu. Po róžku Paula Mildy zhłójčkowa Franz Pfanne bul z krótkeje distancy na wrotarja, kiž pak bul wuběrnje wotwobara (3.). Hosćo hru dale postajachu a mějachu přez Johanna Weißa (15.) a Tonyja Schmidta (19.) dalšej dobrej składnosći. Domjacy namakachu so jenož ćežko do hry. Za nich nasta prěnja wulka móžnosć hakle po 30 mjeńšinach. Wólny kop Renéja Weinerta prasny do łaty Budyskich wrotow.
Sokoł Ralbicy/Hórki
– Módro-běli Kulow 1:1 (1:0)
Zestawa domjacych: Mjetaš-Wowčer – Schultz, Statnik, Zynda, Brězan, Brückner, Strelow, Obst (50. Žur), Šwejda, Čórlich, Jakubaš
Zestawa hosći: Scholze – Rose, Wels, Pelz, Schursch, Hörauf (48. Rettig), Bulank, Nowak, Müller (35. Sauer), Merting, Mark
Třeći raz su koparjo stareju gardow z Kulowa a Ralbic lětsa mocy měrili. Połfinale w pokalnym kole běchu Ralbičenjo doma snadnje 0:1 přěhrali, a w Kulowje w dypkowej hrě dźěleštej so cyłkaj njerozsudnje 0:0. Do duela w Ralbicach stejachu Kulowčenjo hromadźe z Natwarom Wojerecy na čole a Sokoljo na štwórtym městnje tabulki.
ST Radwor
– ST Wjelećin 6:3 (3:2)
Zestawa domjacych: Kral – Henka, Šěrak, Omran, Hančik, Bejmak, Nuk, Zimmermann, Winar, Schulze, Kurjat (66. Mark)
Přihladowarjo dožiwichu rjanu a wuspěšnu domjacu koparsku hru Radworskeho ST. Hižo w 6. min. pak wjedźeše konter hosći k nawjedowanju. Ronny Kebschull přeběža zadnje mustwo domjacych a swobodnje stejo zymnokrejnje přetwori. Chowancy trenarja Pětra Bejmaka so njepodachu a ofensiwnje nadběhowachu. Tři mjeńšiny pozdźišo wuži Měrćin Kurjat zmylk hóstneho wrotarja a wuruna. Daniel Nuk postara so w 20. min. po niskej přihrawce Křesćana Bejmaka wo 2:1. Dalše móžnosće pak hosćićeljo zdźěla lochkomyslnje wuwostajichu. Naspomnić ma so dwójna šansa Paula Zimmermanna po wólnym kopje, kotruž Wjelećanski wrotar wulkotnje wotwobara. Wo 3:1 (31.) so znowa Kurjat postara. Wuběrne přidźěło a wóčko Toma Schulzy rodźenemu Sernjančanej při tym pomhaštej. Krótko do połčasa Kebschull skrótši. Meter před klětku Bena Krala wón nadběh z wrotami zakónči.
Sakski koparski zwjazk (SFV) je zašły štwórtk pokalnu partiju SJ Chrósćicy – FSV Zwickau wulosował. Jedna so wo hru w třećim kole wo krajny pokal. Za přiwisnikow a hrajerjow serbskeho cyłka je to jónkrótna a tak wosebita partija, za zamołwitych towarstwa wulka zamołwitosć. Nimo sportoweho aspekta je profesionelna organizacija nuznje trěbna. Kaž jednaćel towarstwa Tadej Cyž praji, mějachu tež hižo na europeadźe 2012 wjace hač tysac přihladowarjow a wosebity koncept, kotryž nětko zaso nałoža.
Regionalna koparska liga
Hertha BSC II – Altglienicke 0:2 (0:1)
BFC Dynamo – Neustrelitz 4:1 (1:0)
Lok Lipsk – FC Viktoria 0:1 (0:1)
Berlinski AK – Neugersdorf 5:2 (2:1)
Halberstadt – Energija Choćebuz 0:5 (0:3)
Meuselwitz – Budissa Budyšin 0:1 (0:0)
Auerbach – Chemija Lipsk 3:0 (2:0)
Fürstenwalde – Luckenwalde 5:3 (3:1)
1. Energija Choćebuz 6 22 : 1 18
2. BFC Dynamo 6 15 : 6 13
3. FC Viktoria 6 13 : 9 11
4. Fürstenwalde 6 13 : 10 10
5. Lok Lipsk 6 7 : 4 10
6. Altglienicke 6 6 : 4 10
7. Budissa Budyšin 6 4 : 6 10
8. Nordhausen 6 5 : 2 9
9. Babelsberg 03 6 5 : 4 9
10. Neugersdorf 6 13 : 13 8
11. Berlinski AK 6 12 : 12 8
12. Halberstadt 6 8 : 11 8
13. Meuselwitz 6 8 : 9 7
14. Auerbach 6 6 : 8 6
15. Hertha BSC II 6 6 : 12 6
16. Chemija Lipsk 6 2 : 12 3
17. Neustrelitz 6 5 : 17 3
18. Luckenwalde 6 9 : 19 1