Z wudaća: wutora, 19 septembera 2017

Praha (dpa/SN). Němsko-čěske kulturne nalěćo hišće raz podlěša. Po 450 zarjadowanjach su tež w nazymje mjezy přesahowace akcije planowane. Tole zdźěli wčera nawoda Goethoweho instituta w Praze Berthold Franke. Tak ma w nowembru a decembru kulturny ćah mjez Prahu a Drježdźanami jězdźić a metropoli zwjazać. Wosebity wóz Eurocity-ćaha je potom jako mobilne dźiwadłowe stejnišćo za němskich a čěskich wuměłcow předwidźany. Mjez druhim wustupi tam lyrikar Durs Grünbein. Za lubowarjow hudźby planuja 29. oktobra koncert z dirigentom Alexanderom Liebreichom w Praskim Rudolfinumje. W čěskej Narodnej galeriji je widejowa instalacija „manifesto“ předwidźana. Zakład kulturneho nalěća bě podpisanje němsko-čěskeho dojednanja před 20 lětami.

Interkulturne tydźenje w Budyskim wokrjesu z počesćenjemi zahajene

Wojerecy (AK/SN). „Čestnohamtsce angažowani wukonjeja za integraciju ćěkancow hódnotne njeparujomne dźěło.“ Tole podšmórny krajny rada Michael Harig­ (CDU) na zahajenju 8. interkulturnych tydźenjow Budyskeho wokrjesa minjeny pjatk we Wojerecach, hdźež so 14 z cyłkownje 33 zarjadowanjow tydźenjow pod hesłom „Wjelorakosć zwjazuje“ wotměwa. „Integracija njeradźi so w zastojnskich stwičkach, ale w swobodnym času, hustodosć kónc tydźenja“, dźakowaše so Harig čestnohamtskim pomocnikam, lokalnym koor­di­natoram a dobrowólnikam na žurli wobydlerskeho centruma. Zhromadnje ze sakskej statnej ministerku za socialne,­ škit přetrjebarjow, runostajenje a integraciju Petru Köpping (SPD) počesći wón angažowane wobydlerske zwjazki a iniciatiwy. „Wjelorakosć wuskutkuje tež problemy a konflikty. Na­pjatosće a diskusije pak dyrbimy wu­dźeržeć“, wabješe Harig za kulturu wotewrjenosće a akceptancy.

Pokład w nuznikach zaběra tuchwilu statne rěčnistwo w šwicarskim Genfje. Pjenjezy w hódnoće wjacorych dźesaćtysac eurow su na nuznikach města našli. Pozadki toho njejsu dotal znate. Samo toaleta banki bě z titami bankowkow zatykana. Tež w třoch hosćencach mějachu hosćo wjele pjenjez w nuznikach dla ćeže wodu ćahnyć. Statne rěčnistwo pyta nětko za skućićelemi njewšědneje wotstronjowanskeje akcije.

Podarmo na listy čakali su ludźo w durinskim Arnstadće. Wulke mnóstwa póšty z listowych kašćikow su so prawdźepodobnje zhubili. Zašły štwórtk pak lepichu zastojnicy skónčnje 48lětneho, kak je ju z kašćikow wjaceswójbneho domu wudźił. Jako jeho bydlenje přepytachu, nańdźechu tam njeličomne listy z cyłeho města. Póštu wšak ludźo přiwšěm najprjedy raz dóstać njemóža, dokelž je ju policija sćazała.

Internetnu platformu Bautzen.de tuchwilu předźěłuja. To je dobra składnosć, nowu předewzaćelsku platformu Bautzen.info na nju přiwjazać, měni cityjowa­ managerka Gunhild Mimuß.

Budyšin (SN/CS). Hižo połdra lěta Gunhild Mimuß na mjenowanej ideji dźěła. Nětko je projekt tak daloko wuzrawjeny, zo móžachu jón zajimowanym přede­wzaćelam w Budyskej Ludowej bance předstajić. Něhdźe 70 wikowarjow a přemysłownikow bě přišło, zo by so informowało a wo projekće diskutowało. Wažne je, kaž Gunhild Mimuß potwjerdźi, zo so internetna prezentacija na přećach kupcow orientuje. Runočasnje maja wikowarjo z toho profitować, zo móža so wulkemu kruhej kupcow prezentować. Michael Walter z předewzaća azobit a Jens Pietsch z firmy 24 PM předstajištaj techniske detaile.­ Z jeničkim klikom móža wužiwarjo swoje temy wolić, kaž dožiwjenja a tury, nakupowanje, hosćency kaž tež přenocowanja. Cilowa skupina su dnjowi hosćo a dowolnicy. Pozadkowy wobraz ma so po počasach měnjeć.

Po wjacorych měsacach prócowanja je so nětko tola poradźiło, staru parnu lokomotiwu před Budyskim dwórnišćom na nowe městno přewjezć. 140 tonow ćežki techniski pomnik z lěta 1943 su wčera z kranomaj na specialne wozy stajili a po Tzschirnerowej nimo dźěłoweho zarjada a přez železniski móst hač na dróhu Při pakowanišćach južnje dwórnišća dowjezli. Hłownu zasłužbu na tym ma Budyski měšćanski radźićel Heinrich Schleppers (CDU). Foto: SN/Maćij Bulank

K zakónčenju sezony duchowneje hudźby wuhotuje katolski tachantski chór pod nawodom cyrkwinskeho hudźbneho direktora Friedemanna Böhmy stajnje koncert, pak pod wosebitej tematiku pak z wobšěrnym ora­torijom. Minjenu njedźelu rěkaše wose­bity poskitk „Magnifikat“.

Budyšin (CRM/SN). „Cyła wosobina Marije so w tymle chwalospěwje wotbłyšćuje. Wón je takrjec wobraz maćerje Božeje“, rozłoži tachantski farar, prelat Wito Sćapan, poćahowacy so na słowa Benedikta XVI. z lěta 2005. „Magnifikat“ spěwaja tež katolscy Serbja nimale na kóždym nyšporje. Chwalospěw Marije pak komponuja wuměłcy hižo přez lětstotki tohorunja do wšelakich formow. Tak sćěhowaše tež sobu najpopularniši cyrkwinski komponist našich dnjow w Jendźelskej John Rutter (nar. 1945) dołhu tradiciju, słowa chwalby Boha wuměłsce z hudźbu zwjazać. Při tym da so inspirować wot „wjesołych marijanskich swjedźenjow we łaćonskoameriskich kulturach“. Wosebitosć tohole stila začuwachu připosłucharjo tež nětko w Budyšinje.

W Sernjanach chcedźa klětu po jutrach twarić započeć

Róžant (JK/SN). Na zašłym posedźenju gmejnskeje rady Ralbicy-Róžant předstajištaj nawodnica financneho zarjada zarjadniskeho zwjazka Při Klóšterskej wodźe Franciska Čapikowa a wjesnjanosta Hubertus Ryćer (CDU) hišće raz najwažniše dypki lětušeho hospodarskeho plana kaž tež srjedźodobne planowanje gmejny a zarjadniskeho zwjazka. Ćežišćo gmejnskich inwesticijow budźe po dołhim času přihotow wot klětušich jutrow twarska ležownosć w Sernjanach, hdźež maja wjacore jednoswójbne domy nastać.

Wotrow (SN/MWj). Katarina Weclichowa je we Wotrowje jedna z tych žonow, kotrež so na dobro wsy angažuja a za to swój čas wopruja, njehladajo dźaka. Za to so jej tele dny na wosebite wašnje dźakowachu a ju tak wulce překwapichu.

„Smy wo akciji rozhłosoweho sćelaka Hitradio RTL hromadźe z předewzaćom Sachsenmilch zhonili. Z njej wuzběhuja čestnohamtski angažement jednotliwcow“, powěda Wotrowski wjesny předstejićer Měrko Pohonč. Dokelž so Katarina Weclichowa na mnohostronske wašnje we wsy angažuje, běchu ju za akciju namjetowali. Napisachu sćelakej, zo wona adwentne paslenje runje tak sobu při­hotuje kaž nabožny prózdninski tydźeń a póstnicy na starej šuli. Wosebje na wutrobje pak leži jej hrajkanišćo, kotrež běchu w klóštrje Marijinej hwězdźe wot­twarili a do Wotrowa přiwjezli. Wot wšitkich jednotliwych drjewjanych dźělow měješe so stara barba wotškrabać. Na to mějachu so dźěle znowa wobarbić. To wšo je Katarina Weclichowa sobu organizowała.

Smjerdźaca. Rěčny centrum WITAJ poskića zaso wječorne kursy čěšćiny z maćernorěčnym čěšćinarjom. Stajnje póndźelu wot 17 do 18.30 hodź. wotměje so kurs w Smjerdźečanskej LIPJE. W Budyskim Serbskim domje wočakuje wučer Jan Breindl stajnje wutoru wot 16.30 do 18 hodź. pokročenych a wot 18.30 hč do 20 hodź. započatkarjow. Přizjewjenja přijima RCW pod telefonowym čisłom 03591/ 550 400 abo emailnje pod adresu .

Radźićeljo so schadźuja

Pančicy-Kukow. Přichodne posedźenje gmejnskeje rady Pančicy-Kukow wotměje so štwórtk, 21. septembra, w 19 hodź. w awli Šule Ćišinskeho. We wobłuku twarskich naležnosćow zaběraja so radźićeljo z próstwu wo wužiwanje bywšeho twarjenja pěstowarnje jako hort. Dale póńdźe wo škit brjoha we Wotrowje a wo wobstaranje materiala a mašinow za ponowjenje dróhi na Kimbarku. Zjawne wozjewjenje tohole posedźenja gmejnskich radźićelow je prěni raz z nowym woponom gmejny wuhotowane. Wone je nětko oficialnje schwalene.

Z awtom wrota přełamali

Zdźěr. Na rabiatne wašnje su njeznaći minjeny kónc tydźenja w Zdźěri transporter typa VW Crafter pokradnyli. Najprjedy běchu so do tamnišeje wodarnje zadobyli a sej klučik awta přiswojili. Z transporterom w hódnoće 54 000 eurow­ přełamachu na to wrota areala a so zhubichu. Za awtom z čisłom BZ-KW 5000 nětko mjezynarodnje pytaja.