Z wudaća: štwórtk, 15 měrca 2018

Sokoł Ralbicy/Hórki – ST Budyšin 5:3 (1:2)

Zestawa domjacych: Ch. Gloxyn – Bjeńš, Zynda, Šewc, Lulak (46. Materna), Šołta, D. Gloxyn, Janca (65. Bejma), Rawš, Domaška, Kurjat

Přećiwo poslednjemu tabulki dyrbjachu sej koparjo Sokoła/Ralbicy tři dypki wubědźić, hewak bychu so hišće raz ze zestupnym bojom rozestajeć měli. Połnje motiwowani tuž na twjerdym hrajnišću započachu. Po štyrjoch mjeńšinach pak ležeše bul hižo w klětce Chrystofa Gloxyna. Wólny kop z 30 metrow docpě před wrotami přećiwniskeho nadběhowarja, kiž trjechi. Hnydom na to měješe Tomaš Rawš dwě móžnosći k wurunanju. Jónu pak zwrěšći na wro­tarju, tamny króć dźěše jeho třělwa snadnje pódla wrotow. Domjacy ćišć poněčim zesylnichu, a Budyšenjo jenož hišće na kontery łakachu. Jedyn tajki wužichu po poł hodźinje k 0:2. Na zbožo docpě Gabriel Kurjat hnydom na to prěnje wrota za Sokoł. Dirk Šołta nahra Pětra Domašku, tón posłuži sobu běžaceho Kurjata, kiž do dołheho kuta přetwori.