Z wudaća: štwórtk, 15 měrca 2018

Přerjadowanje nowotwarskeje kónčiny doskónčnje wotzamknjene

Rakecy (JK/SN). Z nowotwarskej bydlenskej štwórću a jeje wysokodomami w Rakecach su so tamnišia gmejnscy radźićeljo na swojim wčerawšim posedźenju ­zaběrali. Za tu štwórć mějachu woni zběh­nyć wosebity status spěchowanskeje kónčiny. Tam bě gmejna ze spěchowanskimi srědkami Zwjazka a krajow we wobłuku programa přetwar městow na wuchodźe před 15 lětami wjacore bydlenske domy spotorhać a wotpowědne naslědne ležownosće připrawić dała. Wčera poda zastupjer zamołwiteje Drježdźanskeje firmy STEG Dieter Lamm radźićelam a zajimowanym wobydlerjam kónčnu financnu rozprawu.

Budyšin (SN/bn). Prěnjej lětušej koncertaj Serbskeho ludoweho ansambla w rjedźe „Mišterske twórby chóroweje hudźby“ wuhotuja spěwarki a spěwarjo pod nawodom Andreasa Pabsta kónc tydźenja we Wětošowje a Budyšinje. Program wopřijima znowa serbske, němske a mjezynarodne kompozicije z dobow baroka, romantiki a moderny. Łužicu zastupujetej mjez druhim moteta „Strowa sy, Marija“ Feliksa Brojera a „Struga“ Jana Bulanka na tekst Kita Lorenca. Nimo toho zaklinča „Njebjesa rěča wo sławje Božej“, klučowa twórba zažneho baroka z pjera Heinricha Schütza, a dwójce „Swjaty, swjaty“ – raz jako wujimk „Němskeje mšě“ Franza Schuberta a raz jako sadźba Felixa Mendelssohna-Bartholdyja.

15.03.2018 – 21.03.2018 Budyski fil­mowy palast: Disney Junior Mitmachkino: nj 15:00 Peter Hase: nj 16:30 Fünf Freunde und das Tal der Dinosaurier: wšědnje 17:00 (nimo nj) | štw, pj, so a wu 14:45 | nj 12:30, 14:15 a 16:15 Tomb Raider w 3 D: wšědnje 14:30 (nimo pó a srj), 17:00 a 19:30 | pj a so 22:15 Midnight Sun – Alle für dich: srj 19:45 Die kleine Hexe: wšědnje 15:45 Die Biene Maja: wšědnje 14:00 (nimo pó a srj) | nj 12:15 Heilstätten: wšědnje 18:15 (nimo pó) a 20:15 (nimo pó) Red Sparrow: štw, so, nj a wu 19:45 | pj a so 22:15 Wendy 2 – Freundschaft für immer: štw, pj, so a wu 14:15 | nj 12:15 Hilfe, ich hab meine Eltern geschrumpft: wšědnje 16:15 (nimo nj a pó) | nj 12:15 Black Panther: pj a pó 19:45 Black Panther w 3 D: pj a so 22:30 Fifty Shades of Grey – Befreite Lust: wšědnje 20:15 | pj a so 22:30 Dieses bescheuerte Herz: pj a wu 18:00 Wunder: so, pó a srj 18:00

Kino-ekstra: Three Billboards Outside Ebbing, Missouri: pó 17:15 a 20:15 | štw a nj 18:00

Paduši w twarskim wozu byli

Smjerdźaca. Nócny měr na twarnišću w Smjerdźacej su njeznaći w nocy na wutoru wužili a so do twarskeho woza zadobyli. Z njeho pokradnychu elektriski grat w cyłkownej hódnoće 1 500 eurow. Wěcna škoda na twarskim wozu bě z dźesać eurami porno tomu snadna. Kriminalisća zawěsćichu slědy a nětko za skućićelemi pytaja.

Hraja dwójnu hłójčku

Salow. Skupina katolskeje krajneje młodźiny w Salowje wuhotuje jutře, pjatk, turněr dwójneje hłójčki. Wobdźělnicy zetkaja so w 19 hodź. w Salowskim kulturnym domje. Organizatorojo wje­sela so na bohate wobdźělenje.

Swoju lětušu hłownu zhromadźiznu zwjazachu čłonojo Njeswačanskeho Towarstwa přećelow domizny a kultury z widom na lětuši jubilej 750lětneho ­wobstaća Njeswačidła.

Njeswačidło (LR/SN). „Kulturne herbstwo našeje wsy hajić, zamołwitosć za nje přewzać a nowe spěchować, to je čerwjena nitka dźěła našeho towarstwa“, rjekny předsyda Njeswačanskeho Towarstwa přećelow domizny a kultury Dieter Petschel tele dny na jeho lětnej hłownej zhromadźiznje. Pozitiwna bě lońša bilanca. Wosebje zwjesela, zo su wjacori młodostni do towarstwa zastupili.

W lěće 1961 běchu towarstwo załožili. Wot wšeho spočatka su na hrodźe najwšelakoriše hudźbne ćělesa koncertowali. Hišće dźensa wuhotuja lětnje tři hrodowe koncerty. Lětsa w meji wočakuja Trio Tsching z Berlina. Druhi koncert wotměje so w rjedźe Łužiskeho hudźbneho lěća w juliju z Trijom Meiningen. Třeći koncert je kaž hižo 22 lět zwjazany ze swjedźenjom swětła w parku. Po pjeć lětach wustupi zaso skupina Harmonists z Drježdźan. Wona wuhotuje koncert ­we wobłuku 750. jubileja Njeswačidła, kotryž swjeći wjes kónc awgusta.

Dźens za tydźeń počesća serbske institucije zhromadnje z hosćimi a partnerami wusahowaceho łužiskeho spisowaćela Kita Lorenca z wosebitymaj ­zarjadowanjomaj. Basnik, kiž je loni w septembru na prawdu Božu wotešoł, by spočatk měsaca wosomdźesaćiny swjećił.

Wědomostny sympozij

22. nalětnika popołdnju wuhotuje Serbski institut zhromadnje ze slawistiskim institutom Techniskeje uniwersity Drježdźany sympozij „Kito Lorenc mjez poeziju a literaturowědu“ w Budyskim Serbskim muzeju. Prof. Walter Schmitz předstaji spisowaćela a rozjima prašenje, hač bě Lorenc „basnik małeho ludu?“. Dr. Ewout van der Knaap wěnuje so w swojim přednošku „Neulust“ dźěłu na rěči w němskich basnjach Lorenca. Přizamknje so referat prof. Christiana Prunitscha, kiž so pod hesłom „Podomk“ ze serbskorěčnej lyriku awtora zaběra. Dr. Franc Šěn chce so k Lorencej jako „znajerjej serbskeje literatury“ wuprajić.

Spomnjenka k 50. posmjertninam Michała Nawki (22.11.1885 ­ w Ra­dworju – 16.03.1968 w Budyšinje)

W našich dnjach najžiwiši skutk Michała Nawki drje su wot njeho kěrluše, wosebje te, zwjazowace Serbow-putnikow do Róžanta abo tych, kotřiž modla so spěwajo k patronam swojeje wosady. Myslu sej, zo ma prěnje městno kěrluš „Miłosćiwa, zhladuj na nas“. Chróšćanska cyrkej rži, hdyž spěwaja w njej patronatny kěrluš swjatymaj Symanej a Judźe Tadejej „Martrar swoju krej rozla w Persiskej“ kaž tež „Bosćano, wojako“. Hnujacy je jutrońčku w Radworju předposledni kěrluš křižerskeho nyšpora, hdyž zanošuja na konju Kralownje swjateho róžowca „Knježna swjata, maći Boža“. We Wotrowje česća sej jako patrona wosady „swj. Bena, chorhojnika Mišnjanskeho biskopstwa“. Słowa a melodije Michała Nawki su w ertach tysacow Serbow.

W Spěwarskich za ewangelskich Serbow zapřijatej stej wot Michała Nawki ponowjenej a přebasnjenej tekstaj kěr­lušow. Google maps znaje jenički přikład w zjawnym rumje: Wjesny puć w Radworju je po mnohostronskim narodnym prócowarju, wučerju, rěčespytniku, basniku a hudźbniku Michale Nawce pomjenowany.

Kopańca, wokrjesna wyša liga

Bukecy – Rakečanske ST 1:5 (1:3)

Kulow – Wojerowski FC 0:1 (0:0)

Hnašecy-Dobruša – Kinspork/Łužnica 

wupad

Hory – Póst Germania Budyšin 2:4 (1:2)

Ramnow – Großröhrsdorf 0:3 (0:0)

Großnaundorf – Kumwałd 1:1 (0:0)

ST Wjelećin – ST Radwor 1:4 (0:3)

Sokoł Ralbicy/Hórki – Budyšin 5:3 (1:2)

1. SC Großröhrsdorf 19 44:6 49

2. Wojerowski FC 18 36:21 39

3. Rakečanske ST 18 47:25 36

4. Módro-běli Kulow 19 42:19 31

5. Motor Kumwałd 19 35:28 29

6. Póst Germania Budyšin 19 44:32 27

7. SG Großnaundorf 19 36:31 27

8. Sokoł Ralbicy/Hórki 19 28:31 27

9. LSV Hory 18 42:40 25

10. Drohotka Ramnow 17 33:36 24

11. ST Radwor 18 39:39 21

12. ST Hnašecy-Dobruša 18 30:39 21

13. ST Kinspork/Łužnica 18 32:45 19

14. ST Wjelećin 17 32:49 18

15. Zeleno-běli Bukecy 19 26:57 17

16. ST Budyšin 19 18:66 7

čoło tabulki wokrjesneje ligi, stafla II

1. Natwar Němske Pazlicy 18 59:15 44

2. ST Marijina hwězda 19 50:21 38

3. ST Lubuš 18 41:29 35