Worklecy. Za jutře, wutoru, planowany přednošk pod hesłom „Kak dźěći za Boha zahorić?“ we Worklečanskim Don Boskowym domje dyrbi chorosće dla bohužel wupadnyć. Nowy termin budźe sčasom zdźěleny.
Wobydlerski forum
Budyšin. Měšćanske zarjadnistwo chce lětsa zaso wobydlerske forumy přewjesć. Wone maja so z bytostnym dźělom komunikacije mjez wobydlerjemi a zamołwitymi města stać. Prěni forum wotměje so jutře, wutoru, w 19 hodź. w Strowotnej studni, a to we wosadnym domje na Nagelowej 3.
Do susodneho kraja pohladnyć
Smjerdźaca (aha/SN). Dobry wothłós žněješe minjeny štwórtk dalekubłanske zarjadowanje za kubłarki z dźěćacych dnjowych přebywanišćow w nošerstwje Němskeho čerwjeneho křiža (DRK) a Dźěłaćerskeho dobroćelstwa (AWO), kotrež je Serbske kubłanske srjedźišćo LIPA přewjedło. Zaměr bě, přewažnje němskim kubłarkam posrědkować trěbne znajomosće kołowokoło serbskich temow.
Młoda serbska wučerka Michaela Gedikowa předstaji spočatnje serbske jutrowne nałožki, při čimž skedźbni na křižerske procesiony w katolskich Serbach a na wosebite jutrowne tradicije w Slepjanskej kónčinje. Dale wujasni wona stawizniski pozadk nałožka, zo móža so dźěći zeleny štwórtk na dar wot kmótrow a kmótow wjeselić. W praktiskim dźělu při debjenju jutrownych jejkow pokaza Michaela Gedikowa na edicije Ludoweho nakładnistwa Domowina wot Jěwy-Marje Čornakec, w kotrychž je jutrowna tematika rozjimana. Dale překwapi wona z nahladnej přehladku swójsce debjenych jejkow. Techniku wóskowanja a bosěrowanja bě sej wona hižo jako dźěćo wot swojeje wowki Hany Koklineje w Róžeńće přiswojiła.
Mjeztym 20. raz wotměja spočatk junija w Zhorjelcu „Swjedźeń wolejbula“. Woblubowany to wjeršk sezony, tež mjez serbskimi wolejbulistkami a wolejbulistami. Wšo dohromady 24 mustwow wojuje tam w třoch kategorijach wo dobyće. Jedna so wo turněry muži, žonow a wólnočasnych sportowcow Tež lětsa stej Viktoria Worklecy a ST Marijina hwězda zaso pódla. Za organizatora VfB Zhorjelc je to jubilej a zdobom kónčny dypk. Budźe to poslednje wubědźowanje tajkeho razu, dokelž towarstwo personelnych přičin dla po 25 lětach rozpušća. 30. junija so w towarstwje swěcy hasnu.
19. wokrjesne crossowe mišterstwa w Połčnicy so wotměli
Na 19. nalětnich crossowych mišterstwach wulkowokrjesa Budyšin, kotrež přewjeduja tradicionalnje stajnje w Połčničanskim hrodowym parku, je so nowe běhanske lěto zahajiło. Při poměrnje rjanym nalětnim wjedrje, ale na chětro ćežkej roztatej 800metrow dołhej kołočarje běchu wšitcy połnje wužadani. Štóž njeje so w předchadźacych zymskich měsacach w treningu na nowu sezonu chutnje dosć přihotował, měješe sej chětro ćežko.
Cyłkownje 205 běharkow a běharjow je w crossowym wurisanju cil docpěło. Aktiwni běchu prěnjorjadnje z wulkeho Budyskeho wokrjesa, ale tež z Drježdźan, Pirny a dalšich městnosćow wokoło sakskeje stolicy. Woni wubědźowachu so starobje wotpowědnje na distancach 0,8 km; 1,2 km; 1,8 km a 6,4 km. Wjetšina startowaše w starobnych klasach šulerjow a młodźiny. Šulerjej Budyskeje Serbskeje šule Jitka a jeje bratr Jarek Schade wubědźištaj sej w skupinje U10 dosć dobre zaměstnjenje: Jarek docpě druhe (2:57 min.) a Jitka 6. městno (3:20 min.). Šuler Willi Bjarsch z Budyšina bě třeći w skupinje U8 (3:27 min.).
Kopańca, regionalna liga muži
BFC Dynamo – Auerbach 2:1 (0:1)
Luckenwalde – FC Viktoria 2:3 (2:2)
Nordhausen – Chemija Lipsk wupad
Babelsberg 03 – Neugersdorf wupad
Fürstenwalde – Altglienicke wupad
Halberstadt – Meuselwitz wupad
Berlinski AK – Budissa Budyšin wupad
Hertha BSC II – Energija Choćebuz wupad
Lok Lipsk – Neustrelitz wupad
1. Energija Choćebuz 23 55:8 61
2. BFC Dynamo 21 52:23 43
3. Hertha BSC II 23 37:29 35
4. Nordhausen 20 29:13 34
5. Lok Lipsk 20 26:16 34
6. FC Viktoria 23 38:33 33
7. Berlinski AK 23 34:35 32
8. Babelsberg 03 21 30:23 30
9. Fürstenwalde 21 36:34 30
10. Meuselwitz 22 29:27 28
11. Halberstadt 20 33:33 26
12. Budissa Budyšin 21 18:26 25
13. Neugersdorf 21 28:38 24
14. Altglienicke 22 16:25 23
Mainz (B/SN). Biskop Mainzskeje diecezy Peter Kohlgraf je wěriwych z listom namołwjał, modlić so za kardinala Karla Lehmana. Strowotniski staw 81lětneho kardinala bě „kritiski“. Wot septembra 2017 je wón ze sćěhami infarkta a z kreju w mozach wojował. Jeho mocy so pospochi pozhubjachu, pisa Kohlgraf. Njedźelu, 11. měrca, je kardinal Lehmann na prawdu Božu wotešoł.
Namjet za Nobelowe myto
Soest (B/SN). Mjezynarodny komitej swětoweho modlenja žonow je namjetowany za měrowe Nobelowe myto. Ewangelska žónska pomoc we Westfalskej je 44 000 podpismow za nominaciju zběrała. Dalše informacije dotal njepředleža. Zaměr kampanje bě, zdobyć z njej podpěraćelow za natwar slědźerskeho instituta, kotryž so za měr na swěće zasadźa.
Přećiwo hidźe na Židow