Z wudaća: wutora, 20 měrca 2018

Nowe towarstwo za Bjerwałdski jězor a za cyłu Hamorsku gmejnu

Rudej (AK/SN). Po móžnosći prawje bórze ma w Hamorskej gmejnje přemysłowe a turistiske towarstwo nastać. Wone ma być syć, informaciske žórło a zastupjer zajimow napřećo politikarjam a zarjadam. Přistupić móhli jemu zjednoćenstwa, rjemjeslnicy, přemysłownicy a dalši, kotřiž so wo turizm staraja. To bě wuslědk njedawneho zetkanja turistiskeho stajneho blida w Rudeji. „Njeńdźe jenož wo Bjerwałdski jězor, ale wo cyłu gmejnu“, podšmórny referentka za komunikaciju a management Hamorskeje gmejny Romy Ganer. Towarstwo móhło marketingowe dźěło wukonjeć a turistiske poskitki zwjazować.

Budyšin. Kelko drjewa je w jednej knize? Z tymle prašenjom a dalšimi móža so młodźi zajimcy jutře, srjedu, wot 14 hodź. składnostnje Mjezynarodneho dnja lěsa w Budyskej dźěćacej a młodźinskej bibliotece zaběrać a so tam na ekspediciju k wuchadźišću knihi podać. Je to zhromadne zarjadowanje biblioteki a biosferoweho rezerwata.

Porěča wo „Krónje“

Budyšin. Hižo dlěši čas dźe w Budyšinje wo prašenje, hač měło město „Krónu“ kupić abo nic. Měšćanski zwjazk SPD ­organizuje tohodla zjawny diskusijny wječor, na kotrymž chcedźa pro a kontra wotwažować. Zarjadowanje budźe štwórtk, 22. měrca, we 18.30 hodź. na žurli Budyskeho Serbskeho domu. Zawodny přednošk změje měšćanosta za financy dr. Robert Böhmer. Zajimcy su wutrobnje přeprošeni.

Wulke Ždźary (AK/SN). Łazowska gmejnska wohnjowa wobora chce wužadanjam přichoda wotpowědować. To podšmórny nawoda Torsten Hansen minjeny pjatk na jeje lětnej hłownej zhromadźiznje we Wulkich Ždźarach. „Mamy wukonliwu woboru. Měli ju tež dale zachować“, praji Hansen w swojej rozprawje. Starosćiwje zhladowaše wón na woteběracu ličbu kameradow. Wot 265 w lěće 2014 bě jich loni jenož hišće 214. Runočasnje je ličba w starobnym a čestnym wotrjedźe wot 153 na 174 rozrostła. Poměrnje stabilne je wuwiće pola młodźiny. Nimo jědnaće woborow dorosćenych ma gmejna Łaz pjeć młodźinskich woborow w Bjedrichecach, Hermanecach, Koblicach, Šćeńcy a Běłym Chołmcu. Za po płoninje druhu najwjetšu gmejnu Sakskeje je to nahladne. „Demografiska změna zawostaja swoje slědy“, Hansen podšmórny. Mjenje wobornikow dyrbješe loni nimale dwójce telko zasadźenjow zmištrować kaž lěto do toho. Předewšěm w juniju (28 zasadźenjow) a w oktobru (29 zasadźenjow) su wobornikow často wołali, zo bychu po wichorach škody rumowali.

Najwuspěšniše holče wolejbulowe mustwo Serbskeho gymnazija Budyšin (SGB) je sej w krajnym finalu wubědźowanja „Młodźina trenuje za olympiju“ w starobnej skupinje II mjez šěsć startowacymi gymnazijemi wospjet bronzu wuwojowało. Je to hižo štwórta medalja w pjatym sakskim finalu.

Po dobyću bronzy w aprylu 2014, šestym městnje w měrcu 2015, slěbru w měrcu 2016 a bronzy w měrcu 2017 slědowaše za nje tydźenja dalša bronzowa medalja. Kajki to wospjetny grandiozny wuspěch wolejbulistkow 10. a 11. lětnika SGB. Tak je so kóžda přidatna kapka potu na pjatkownych popołdnišich treningowych jednotkach wudaniła.

Serbski gymnazij Budyšin – Gymnazij Brandis 2:0 (25:12, 25:20)

FSV Budissa Budyšin – BFC Dynamo 1:2 (0:0)

Zestawa domjacych: Ebersbach – Kunze, Patka, Hoßmang, Mack, Pfanne, Schmidt, Weiß (84. Gehrmann), Krawčik (74. Müller), Bönisch, Milde

W prěnjej koparskej hrě sezony 2017/2018 sydaše za Budissu Budyšin pola BFC Dynama plajta 0:5. Tajkemu debaklej chcyše wona doma zadźěwać. Započa tuž z trěbnej koncentraciju a měješe hižo sčasom dobru móžnosć. Pavel Patka zhłójčkowa bul po wólnym kopje Tonyja Schmidta snadnje nimo wrotow (6.). Dalšu šansu přez Kevina Bönischa škit hosći runje tak znješkódni (22.). We wurunanej partiji měješe BFC swoju prěnju dobru móžnosć přez Matthiasa Steinborna (29.). Krótko po tym pruwowaše samsny hrajer wrotarja Maika Ebersbacha z třělwu ze sydom metrow. Ebersbach pak wulkotnje reagowaše a wotwobara (34.). Bjez wrotow podaštej so cyłkaj do přestawki.

Minjeny pjatk wotmě so w Chróšćanskej sportowej hali turněr za koparjow, kotřiž su starši hač 32 lět. Zarjadowar a wuhotowar běchu Zeleno-běli z Hórkow. Po 25 lětach běše to prěni raz, zo přewjedźechu swój turněr w Chrósćicach. Mikławš ­Dyrlich, trenar zeleno-běłych a zdobom nawoda turněra, powita k tomu nimo hosćićelow a domjacych z Chrósćic mustwa z Pančic-Kukowa, Njebjelčic, Ralbic a Małeho Wosyka. W swojich słowach kritizowaše Dyrlich rozsud, zo njeběchu Hórčanam po štwórć lětstotku swěrneje kooperacije přizwolili wobnowjenu ćěłozwučowarnju we Worklecach wužiwać směć.

We wobwodnej klasy dyrbješe DJK Kulow-Hózk pola tabulkoweho susoda ST Horken-Ketlicy nastupić a doby tam 9:6. Mathias Barth, Křesćan Měškank a za Pětra Měškanka hrajacy Matijas Klimank (wšitcy z dwěmaj dypkomaj) běchu w prima formje. Jens-Peter Meier (1,5) a Michał Měškank (1) měještaj toho­runja swój podźěl na snadnym dobyću. Jeničce Křesćan Domaška (0,5) njeměješe swój najlěpši dźeń.

W prěnjej wokrjesnej klasy měještej druhe a třeće mustwo DJK Konjecy domjacu lěpšinu, njemóžeštej pak ju wužić. Druhe mustwo podleža SV Ullersdorfej II jasnje z 3:12. Jeničce dwójka Rudolf ­Wittig/Jurij Brězan a jednotliwcaj Rainer Roßmy a Dietmar Hrjehor móžachu dypkować. Třeće mustwo přěhra přećiwo druhemu tabulki TTC Kamjencej II ze 6:9. Młody Julian Hrjehor bě z dwěmaj dypkomaj najlěpši Konječanski blidotenist. Tamne dypki wudobychu sej Rafał Šěrak, Olaf Thiela, Daniel Zukunft a dwójka Frank Šołta/Zukunft.