Z wudaća: wutora, 17 apryla 2018

Dweju paduchow pčołkow je policija w Israelu wuslědźiła, po tym zo běchu pčołki jeju nadpadnyłoj. Wobsadce policajskeho awta běštej mužej napadnyłoj, kotrajž na kromje dróhi do so biještaj. ­Jako zastojnicy bliže přińdźechu, widźachu, zo běštaj mužej dospołnje rozkałanaj a zo wokoło so biještaj, zo byštaj njem­dre insekty wućěriłoj. W awće namakachu zastojnicy tři kołče. Jednoho z paduchow dowjezechu do chorownje, druheho na policajsku stražu.

Z nakładnym awtom na kolesowarskej šćežce zwrěšćił je šofer w schwabskim Donauwörthće. Do toho bě před mostom zastał, kotryž bě za jeho awto přeniski. Město toho, zo by so zawróćił a za druhim pućom pytał, spytaše wón móst na kolesowarskej šćežce wobjěć. Tam pak wosta 37lětny tčacy. Pomocnicy trjebachu tři hodźiny, zo bychu awto wućahnyli.

Dźensa hladaja hižo dźěći husto do swojeho smartphona. Kuzło čitanja w knihach pak so zhubiło njeje. Jedyn dopokaz za to je kóždolětne čitanske wubědźowanje ­Rěčneho centruma WITAJ. Pozbudźace ­lětsa běše, z kelko wšelakich dźěćacych knihow wobdźělnicy čitachu a kelko awtorow bě w tymle hodźinomaj słyšeć. Za čo to rěči? Jako před něšto lětami wospjet rěkaše, zo wubjeru sej čitacy wosebje knihi, kotrež powědaja wo wrobliku a jeho přećelach, tak je so spektrum mjeztym rozšěrił. Lětsa běchu 24 wobdźělnicy wujimki z dwanaće knihow přednjesli a z tym zasłyšachu přitomni jědnaće wšelakich awtorow. Wuhotowarjo wubědźowanja kóžde lěto zwěsća, zo je mjez spisowaćelemi jenož zrědka Jurij Brězan. Tuž je derje, zo maja serbscy wobdźělnicy přidatnje z jeho knihi „Rifko“ čitać. Snano by derje było, ­šulerjam darić tule knihu, zo bychu sej ­dalše kuzło wotkryli. Milenka Rječcyna

Straßbourg (dpa/SN). Francoski statny prezident Emmanuel Macron je so naležnje za wobšěrne reformy w Europskej uniji zasadźował. Hladajo na wólbne ­wuspěchi Europje napřećo skeptisce ­nastajenych mocow w Madźarskej a Italskej je tole dźeń a trěbniše, rjekny ­Macron dźensa w Europskim parlamenće w Straßbourgu. Mjeztym jewja so tež w Němskej kritiske hłosy. Macron chcył mjez druhim zastojnstwo europskeho ­financneho ministra zarjadować.

Wjetšina tež zapadnych politologow, žurnalistow a dalšich zajimcow, kiž so z Ruskej zaběraja, ma za to, zo steji wjetšina staćanow Ruskeje za Putinom. Ale, zo je jeho 77 procentow woliło, to je wuslědk „njedemokratiskich“ wólbow! Bywšeho ruskeho špiona z jědom spytać zamordować, kiž je so jónu w Sowjetskim zwjazku produkował – to móže jenož Putin być! Tak abo podobnje dźensa na zapadźe diskutuja a bjez dopokazow činja so kroki, kotrež wjedu k dale a zymnišej „zymnej wójnje“. Mje běchu přeprosyli, być „mjezynarodny wobkedźbowar wólbow“ a wo tym chcył skrótka rozprawjeć:

Wot Moskwy, hdźež jednu nóc přenocowachmoj – běchmoj dwajo, druhi bě něhdyši wjesnjanosta wulkogmejny Hatten pola Oldenburga a bě jako tajki sam mnohe wólby organizował – lećachmoj sobotu do wólbow hišće hodźinu do Nižneho Nowgoroda, města z 1,4 milionami wobydlerjow při rěce Wolga. Tam bě 19 stopnjow zymy a tójšto sněha. Sobotu wobhladachmy sej hišće tamniši kreml, kotryž je po rozměrje wjetši hač Moskowski, nima pak tak rjane twarjenja mjez murjemi a wěžemi. Tamniše su dospołnje dodźeržane.

Runja zašłym lětam je serbski dźěćacy časopis Płomjo wčera popołdnju z někotrymi ze swojich čitarjow warjenski kurs w Budyskim hosćencu „Wjelbik“ přewjedł. Wosom holcow a hólcow z Radworja, Chrósćic, Worklec a druhdźe je ze šefkucharjom Tomašom Lukašom (2. wotprawa) za wječornych hosći słódny meni nawariło. Foto: SN/Maćij Bulank

Nuknica (SN/bn). Prěnje wot towarstwa barakka zarjadowane čitanje přiwabi minjenu sobotu něhdźe 30 zajimcow – někotři wonka stejo a přez wupójsnjenjej woknje připosłuchajo a hladajo – do Nukničanskeje baraki. Nimo stajnych wopytowarjow běchu tež wobliča widźeć, kotrež skerje zrědka w barace wuhladaš. Třo hosćo běchu z Waršawy přijěli.

Wosebitosć wječora njebě jenož, zo su předstajacy so kaž tež předstajane awtorki a awtorojo na někajkežkuli wašnje z klubom-towarstwom zwjazani, ale tež, zo njeměli jednotliwe přinoški dlěje hač sydom mjeńšin trać.

Tematiske wodźenja, kolesowanske tury z hórnikami a tójšto stawiznow

Bjezdowy (AK/SN). Z tematiskimi wodźenjemi, dnjemi wotewrjenych duri, kolesowanjemi z hórnikami a dohladami do stawiznow hórnistwa we Łužicy chcedźa organizatorojo wšitkim zajimowanym na dnjomaj łužiskeje jězoriny 28. a 29. apryla krajinu w změnje pokazować. „Chcemy dołhodobne wjeselo na dowol w regionje budźić a Łužisku jězorinu w jeje najwšelakorišich fasetach pokazać“, předstaji ­Kathrin Winkler program dnjow łužiskeje jězoriny. Wona je jednaćelka wot lěta 2012 wobstejaceho turistiskeho zwjazka łužiska jězorina. Centralne a krajne mjezy přesahujo zwjazk za wosebitej dnjej wabi. Zdobom wón mnohostronske iniciatiwy do cyłka wjaza. Z dohromady 10 000 lětakami wot Błótow hač do Žitawskich hór wabja. Zaměrowy zwjazk łužiska jězorina Sakskeje a zaměrowy zwjazk łužiska jězorina Braniborskeje koordinaciju a wabjenje kóždy z 5 000 eurami podpěrujetej.

Wosebje swjatočnu Božu słužbu dožiwichu zawčerawšim w Slepjanskej cyrkwi. 32 žonow a muži swjećeše tam swoju złotu konfirmaciju. Dźensa 64lětni ze Slepjanskeje wosady buchu tam w lěće 1968 konfirměrowani. Runje tak swjatočny kaž te­hdyši podawk bě 50lětny jubilej tohole dnja. Wšitcy jubilarojo mějachu złoty wěnčk přityknjeny. Božu słužbu swjećeše z nimi fararka Jadwiga Malinkowa. Lara Bertonec a Xenia Klarec, kotrejž běštej so kemšacu drastu woblekłoj, přepodaštej wopisma złotym konfirmandam. Złotu konfirmaciju swjeća w Slepom kóžde lěto, slěbornu a dejmantnu porno tomu jenož kóžde druhe lěto. Foto: Martina Arlt

Budyšin. 60 lět po swojej maturje na Budyskej Serbskej wyšej šuli su minjeny pjatk w sprjewinym měsće bywši sobušulerjo rjadowniske zetkanje přewjedli. Jako městnosć wupytachu sej hosćenc „Mniši dwór“ w starym měsće. Tam zetka so třinaće žonow a muži, kotřiž mjeztym we wšěch kónčinach Łužicy a tež zwonka njeje bydla. Mjeztym wšitcy w rentnarskej starobje, dopominachu so wobdźělnicy na swój šulski čas a wuměnichu so wo powołanskim žiwjenju.

Požohnuja motorske

Ralbicy. Popołdnjo z požohnowanjom motorskich wotměje so njedźelu, 22. apryla, w Ralbicach. Započatk budźe w 14 hodź. z nyšporom w cyrkwi. Přizamknje so zhromadny wulět.

Wopity z kolesom padnył

Lejno. Chětro hłuboko do piwoweje škleńcy hladał je zawčerawšim nawječor muž w Lejnje w gmejnje Halštrowska Hola. Při kružnym wobchadźe padny 53lětny ze swojim kolesom a so zrani, tak zo dyrbjachu jeho lěkarsce zastarać. Přiwołani policisća dwělowachu, hač móže muž dale jěć. Při kontroli naměrichu pola njeho 2,38 promilow alkohola w kreji.