Kretschmer tež Delany wopyta
Konjecy. Sakski ministerski prezident Michael Kretschmer (CDU) wopyta pjatk Budyski wokrjes. Mjez druhim wočakuja jeho popołdnju tež w Konjecach. Tam chce so Kretschmer pola wowčerja Měrćina Justa wo plahowanju wowcow wobhonić a wjelči management kaž tež škitne naprawy narěčeć. Wječor je we Wojerecach dalše rozmołwne koło pod hesłom „Sakske rozmołwy“.
Naslědnistwo w firmje rjadować
Lipsk. Akciske dny sakskeho hospodarkeho ministerstwa su dźensa w Lipsku zahajili. Z nimi maja so firmy podpěrać, kotrež steja před změnu mějićela staroby dla. Institut za srjedźostawske slědźenje w Bonnje je w februaru wuslědk přepytowanja předstajił, po kotrymž je wot toho hač do lěta 2022 w Sakskej nimale 6 200 předewzaćow potrjechenych.
Partnerske styki pohłubšili
Ludowe nakładnistwo Domowina je sobotu na dźeń wotewrjenych duri přeprosyło. Ćežišćo bě 60. róčnica załoženja LND 1958. Samsny wječor wobdźěli so na Dołhej nocy kultury w Budyšinje.
Budyšin (SN/MiR). 18 šulerjow 3. a 4. lětnika měješe w nocy wot pjatka na sobotu wosebite dožiwjenje w Budyšinje. Němsko-Serbske ludowe dźiwadło a Rěčny centrum WITAJ stej mjeztym 12. króć na čitansku nóc do Dźiwadła na hrodźe přeprosyłoj. Wabić za projekt je lědma trěbne. Rěčny centrum WITAJ posrědkuje kóžde lěto flajer šulskim nawodam, wučerjo šulerjow informuja a starši swoje dźěći přizjewja. Městna su požadane, tak zo maja čakansku lisćinu.
Dźěći ze wšitkich serbskich zakładnych šulow, z Worklec, Ralbic, Radworja, Pančic-Kukowa, Chrósćic a Budyšina běchu so za čitansku nóc přizjewili, kotraž lubješe wosebite dožiwjenja. Pjatk nawječor so we wobłuku z hrami mjez sobu zeznachu a připrawichu sej button ze swojim mjenom. Po wječeri wuslědźichu cyłe dźiwadło, wot pincy hač pod łubju, wobhladachu sej klankowy fundus, probowe rumnosće kaž tež wulke a małe jewišćo. Po tym dožiwichu probu kónčneho wobraza lětušeho lětnjeho dźiwadła „Olsenowa cwólba wotzběhnje“. Na to pak čitachu kóždy a kóžda wurězki ze serbskeje knihi wšitkim tamnym wobdźělnikam projekta.
Wóslink (SN/mwe). „Dźěćom a swójbam, kotrež chcedźa, zo so na Ewangelskej srjedźnej šuli Wóslink serbšćina podawa, je to žiwa domizna. Přiběrace naprašowanje pokazuje, zo smy na prawym puću a zo je zajimcam wažne, serbšćinu wuknyć móc. Wšako słuša wona k jich žiwjenju a wobswětej, a tomu měło tak wostać“, předsyda Wóslinčanskeho šulskeho towarstwa Henry Nitzsche podšmórnje.
Berlin/Stuttgart (dpa/SN). W padźe wumjetowanja, zo je koncern Daimler wotpłunowe hódnoty awtow manipulował, bě šef předewzaća Dieter Zetsche dźensa druhi raz do zwjazkoweho wobchadneho ministerstwa přeprošeny. Daimler je po měnjenju zwjazkoweho zarjada za jězdźidła manipulowane programy do transportera typa Mercedes Vito zatwarił. Dwaj tydźenjej měješe Zetsche chwile konkretne ličby wuslědźić. Dźensa dyrbješe wón wuslědki předstajić.
Mnohe prašenja wotewrjene
Mainz (dpa/SN). Surowa smjerć 14lětneje Susanny zaběra přepytowarjow tež po přesłyšowanju podhladneho mordarja. Po šěsć hodźinach 20lětny Irakčan Ali B. wčera přizna, zo bě 14lětnu morił, prěješe pak, zo bě ju wumocował. Tak su mnohe prašenja hišće wotewrjene. Po zdźělence policije je motiw njeskutka dale njejasny. Po wuwjedźenjach Irakčana je holca padnyła a so w mjezwoču zraniła. Dokelž so boješe, zo wona policiju woła, je ju morił. Skućićel sedźi nětko w jastwje w Frankfurće nad Mohanom.
Chcedźa truty zasadźić
Wobhladniwaj wnučkaj staj w porynsko-pfalcskim Kirchheimbolandenje zasadźenje policije zawinowałoj. Dokelž nochcyštaj w nocy na sobotu wowku wubudźić, zalězeštaj wonaj w pózdnich hodźinach přez wrota statoka. Wowka woměrje dale spaše, kedźbliwa susodka pak měješe młodeju muži za paduchow. Policija na to statok „z wulkej jednotku“ wobstupi. Hakle na to so wukopa, zo běšta pozdatnaj paduchaj wnučkaj, kotrajž běštaj dom bjez kluča wopušćiłoj.
Nopawa jako slepy pasažěr je šoferku awta w Duisburgu tak nastróžiła, zo ta do před njej jěduceho awta zrazy. Při tym so wobaj šoferaj snadnje zraništaj. 53lětna žona bě z awtom po puću, jako ju naraz prawa ruka zabola. Žona nochcyše swojimaj wočomaj wěrić, jako nopawu pódla sebje wuhlada. Nichtó njewě, kak bě ta do awta přišła.
Berlin (dpa/SN). Zwjazkowa kanclerka Angela Merkel (CDU) je prezidentej USA Donaldej Trumpej po toho eklaće w zwisku z wjerškowym zetkanjom G 7 z raznej reakciju na jeho swojowólnosće hrozyła. „Njedamy so stajnje zaso zjebać. Potom tež jednamy“, rjekny wona wčera wječor w telewiziji ARD. Kanclerka reagowaše tak na nowe chłostanske cła USA na wukrajny wocl a aluminij. Dyrbjał-li Trump tež němskim awtam chłostanske cła napołožić, připowědźi Merkel razne europske přećiwne naprawy.
Trump postara so wčera wo dotal njesłyšany eklat, jako bě zhromadnje wobzamknjenu deklaraciju wjerška G 7 z informaciju na internetnym portalu Twitter swojowólnje wupowědźił. „To wostrózbja a zdobom deprimuje“, rjekny Merkel. Zwjazkowe knježerstwo najebać to na deklaraciji wobstawa.