Drježdźany (SN/MiR). Z přeprošenjom je sakski minister za kultus Christian Piwarz (CDU) spjelnił žadanje sakskich wučerskich dźěłarnistwow a zwjazkow. 21. junija chcedźa so zetkać. Wuslědk to boja dźěłarnistwa za kubłanje a wědomosć (GEW) a Sakskeho zwjazka wučerjow wo prawa sakskich wučerjow.
Wčera je na wšě 2 000 pedagogow w Drježdźanach na Carolinym naměsće za swoje naležnosće demonstrowało. Kultusowy minister Christian Piwarz napominaše k wěcownosći a k tomu, sej wobchować wid na realitu. Kaž wón zwěsći, wobsteja zdźěla wočakowanja, kotrež spjelnić njemóže. Při něhdźe 1,7 miliardow eurow wopřijacym pakeće za přichodne lěta je 420 milionow myslenych za přistajenych wučerjow. „Smy financny ramik stajili a na njón so dźeržimy“, rjekny minister. Wšitkim wotpowědować je podobnje kwadraturje kruha. Wažne je rozrisanje, kotrež po móžnosći mnohich wučerjow spokoja.
Budyšin. Wulce zahorjeni běchu přihladowarjo na lětnim dźěćacym swjedźenju dorostoweho studija Serbskeho ludoweho ansambla Łužičanka minjenu sobotu na kopatej žurli SLA. Mali wuměłcy zawjeselichu publikum z wulkej dokonjanosću w swojich serbskich kaž tež w běłoruskich rejach. Towarstwo Milawica bě hromadźe z Łužičanku hodźinski program krasneje folklory spřihotowało. A k zakónčenju zaklinča zhromadna pěseń „Njech přec wostanje słónco“.
Dźěći z kónčiny blisko běłorusko-ukrainskeje hranicy přebywaja tuchwilu na přeprošenje Budyskeje Černobylskeje iniciatiwy na tři tydźenje w měsće. Wot lěta 1990 witaja tu hóstne swójby skupinu dźěći z 1986 wot atomoweje katastrofy w Černobylu potrjecheneho regiona na wočerstwjenje.
Socialne kompetency su dźensa w mnohich powołanjach požadane. Rozumić, kak druhi čłowjek mysli a začuwa, z nim hromadźe dźěłać, konflikty měrliwje rozrisać, so socialnej situaciji wotpowědnje zadźeržeć su někotre ze zakładnych kompetencow, na kotrež tež w šuli dźiwaja. Tak mjenowany socialny dźeń, kotryž hižo někotre lěta po cyłej Němskej přewjeduja, ma tomu słužić, zo so šulerjo w tychle kmanosćach tež w praksy pospytaja.
Njeswačidło (JK/SN). Wolóženy a spokojny Njeswačanski wjesnjanosta Gerd Schuster (CDU) na spočatku posedźenja gmejnskich radźićelow zawčerawšim bě, zo je Budyski krajnoradny zarjad lětuši hospodarski plan gmejny schwalił. Tak móža nětko w Njeswačidle nadawki lěta krok po kroku zwoprawdźić. Zo to lochko njebudźe, pokaza so hižo we wobłuku naprašowanjow. Předsyda Towarstwa Přećelow kultury a domizny Dieter Petschel skedźbni na njedostatki w napohledźe Njeswačanskeje nawsy. Njeporjadne chódniki podłu mnohich wjesnych pućow kaž tež zdźěla skóncowane wotrězki dróhow njetyja nahladnosći wsy, kotraž so z derje hladanym parkom a hrodom prezentuje. Petschel gmejnsku radu namołwi, njedostatki w přichodnych planach na wědomje wzać a spytać wotstronić. Tak by so napohlad wsy krył z dobrym imageom, kotryž jej park a hród spožčatej. Dale prašeše so Petschel za stawom serbskeho napisa na radnicy. K tomu wjesnjanosta zdźěli, zo chcedźa hišće wočaknyć, doniž njejsu dóšli wšitke poskitki, kajki ma napis wupadać.