Z wudaća: póndźela, 18 junija 2018

Sakske knježerstwo k přimnjenju – takle snadź hodźało so to wopisać, štož je so minjeny pjatk we Wojerowskej Łužiskej hali wotměło. Ministerski prezident Michael Kretschmer bě wjacorych ministrow a statnych sekretarow sobu přiwjezł, zo bychu ludźom jako rozmołwny partner k dispoziciji byli a sej jich starosće a problemy naposkali. A tych mějachu wopytowarjo dosć a nadosć. Přiwšěm bě mi toho abo tamneho ministra žel: Njewěrju, zo běchu jim narěčane problemy dospołnje nowe. Na tamnym boku njemóžachu ­wjace činić hač přilubić, zo so w Drježdźanskim sejmje wo rozrisanje prócuja. Hač rozmołwy ministerskeho prezidenta Kretschmera raz płody njesu, dyrbimy wočaknyć. Derje je, zo wón tajke rozmołwne koła z druhdy za njeho bolostnymi wěrnosćemi scyła pěstuje. Jeho předchadnik w zastojnstwje Stanisław Tilich njebě tajkej formje direktneje komunikacije jara wotewrjeny. Marko Wjeńka

Němska wubranka muži je prěni raz po lěće 1982 zazběhowu hru na swětowych koparskich mišterstwach přěhrała. W Moskowskim stadionje Lušniki podleža zakitowar titula po słabym wukonje z 0:1 Mexiku. Hižo w 35. min. docpě Hirving Lozano rozsudne wrota. Sami Khedira bě bul hłuboko w přećiwniskej połojcy zhubił, Mexičenjo spěšnje konterowachu a Lozano wuhra Mesuta Özila, kiž bě jako škitar přežadany. Z něhdźe dźesać metrow zdalenosće Lozano Manuela Neuera přewiny. Wšitke prócowanja Němcow wo remis ničo njewunjesechu – tež lěpši poměr třělwow 25:12 na wrota a hrajne podźěle 61:39 procentow nic. ­Za Mexiko bě to historiske dobyće přećiwo amtěrowacemu swětowemu mištrej, za Němsku historiska poražka. Sobotu w hrě přećiwo Šwedskej liči za chowancow trenarja Jogija Löwa jenož dobyće.

SLA a chór Meja zhromadnje spěwohru „Smjertnica“ předstajiłoj

Smochćicy (CRM/SN). Poprawna prapremjera Jurja Pilkoweje lěta 1909 dokomponowaneje spěwohry „Smjertnica“ bě hakle 1965 w Němsko-Serbskim ludowym dźiwadle w Budyšinje.

Serbski ludowy ansambl zwoprawdźi składnostnje lětušich 160. narodnin Pilka zhromadnje z chórom Meja a ze spěwnymi solistami wčera, njedźelu, koncertnu wersiju předstajenja najwažnišeje twórby wuznamneho serbskeho hudźbnika zašłosće. Wón spisa ju na libreto Jana Radyserba-Wjele, mjenujo ju opereta. Při rjanym lěćnym wjedrje pod hołym njebjom na dworje Smochčanskeho Domu biskopa Bena wopokaza so spěwohra wčera zaso jako woprawdźita drohoćinka serbskeje hudźby. Hižo z teje přičiny bě wopyt předstajenja, wotměteho we wobłuku Smochčanskeho hudźbneho swjedźenja Via regia, wosebje poručeny. Bohužel bě wopyt skerje snadny. Zwoprawdźenje naročneho projekta pod nawodom chóroweho direktora SLA Andreasa Pabsta pak wopokaza so jako kreatiwne znowawotkryće, kotrež je porědko do­žiwić.

Jedyn z wjerškow serbskeho nabožneho žiwjenja we Wojerowskim regionje je kóžde lěto Serbski ewangelski domi­zniski dźeń. Wčera swjećachu jón z wjele hosćimi w Blunju.

Bluń (AK/SN). Serbski ewangelski domi­zniski dźeń we Wojerowskim regionje je kruta tradicija. „To je nam jasne wu­znaće k rěči, kulturje, domiznje a wěrje, štož měli swojim dźěćom dale sposrědkować“, podšmórny wjesnjanosta gmejny Halštrowska Hola Dietmar Koark wčera na 11. serbskim ewangelskim domizniskim dnju w Blunju. „Dajće nam wobchować, štož hišće mamy“, Koark wopytowarjow na­mołwi.

Wjacore sta ludźi su wčera klóšterski a swójbny swjedźeń w klóštrje Marijinej hwězdźe w Pančicach-Kukowje wopytali. Na jewišćomaj na klóšterskim dworje a w zelowej zahrodźe dožiwichu woni program ze spěwom a reju. Jedyn z wjerškow bě hudźbny ćah z Oberlichtenauwa. Nimo toho předstajichu so zarjadnišća a towarstwa, mjez druhim Towarstwo Cyrila a Metoda. Dale wabjachu přirodowe wiki k dundanju a woptawanju kulinariskich wosebitosćow. Kóždolětny swjedźeń steješe lětsa cyle w znamjenju dźesaćlětneho wobstaća Budyskeho wokrjesa w jeho dźensnišej formje. Foto: Feliks Haza

Rakecy (JK/SN). Financna rozprawa k prěnjemu połlětu kaž tež dobra bilanca zastaranskeje towaršnosće, kotrejž su ­Rakečanskim gmejnskim radźićelam na jich zašłym posedźenju předstajili, jasnje pokazujetej, zo gmejna dale derje ho­spodari.

Tak maja lětsa dosć pjenjez za hospodarjenje, wobkrući wotrjadnica financneho zarjada gmejny Franziska Pfeiffer, zo móža trěbne wudawki derje zwjesć. Tež zastaranska towaršnosć je loni porjadnje hospodariła a pokazuje w bilancy pod smužku dobytk dobrych 100 000 eurow. Při tym su minjene lěto samo 233 000 eurow do wobšěrneho ponowjenja bungalowow w lěsnej kupjeli Niža Wjes inwestowali. Wulki podźěl na wuspěšnym wuwiću komunalneho předewzaća měješe jeho dotalna jednaćelka Christine Hultsch. Wona pak 1. julija zastojnstwo złoži a so na wuměnk poda. Wjesnja­nosta Swen Nowotny (CDU) počesći ju z čestnym nopaškom Rakečanskeje gmejny a dźakowaše so jej za spomóžne dźěło na dobro gmejny.

Pomoc na městnje njebyła

Łuty. Zo je sobotu wječor 69lětna žona we Łutach policiju wo pomoc wołała, drje sej wona prawje přemysliła njebě. Rentnarka informowaše, zo cuze jězdźi­dło na jeje priwatnym parkowanskim městnje steji. Na městnje policisća skónčnje zwěsćichu, zo žona prawje nima, dokelž jedna so wo zjawne městno. W tym wokomiku wšak šoferka hižo cyle strózba njebě. Pola njeje naměrichu mjenujcy 1,54 promilow alkohola w kreji, tak dyrbješe swoje pa­pjery najprjedy raz wotedać.

ST Marijina hwězda

– HZ Łaz/Běły Chołmc 2:2 (1:1)

Zestawa domjacych: O. Schmidt – Wróbl, T. Škoda, Jurš, Lipič, Winkler (67. Rab), Kuring, O. Hawš, P. Schmidt (46. R. Hawš), Eldor (46. A. Škoda), Pakoßnick

K poslednjej domjacej hrě sezony 2017/2018 pohosćichu koparjo ST Ma­rijineje hwězdy mustwo Hrajneho zjednoćenstwa Łaz/Běły Chołmc. Po wulkim boju dźěleštej so cyłkaj ze sprawnym 2:2. Kaž hižo tydźenja měješe trenar Erwin Kleinmann wšitkich hrajerjow k dispoziciji. Po dewizy „never change a winning team“ započachu kaž při dobyću w Rychbachu.

W prěnich dwaceći mjeńšinach wotměwaše so hra mjez šěsnatkomaj. Wo­sebje w srjedźnym polu nastachu chětro bojowniske duele. Pančičenjo pospytachu so z dołhimi třělwami, štož wjedźeše k 1:0. Po kopje Matijasa Wróbla njeběštaj sej posledni muž a wrotar hosći pře­zjednaj. Bul skoči před lěwu nohu Jako­ba Pakoßnicka, a hižo domjacy nawjedowachu (23.). Nětko mějachu woni wjace hrajnych podźělow a šansow. Bul pak so do wrotow njenamaka (25., 30., 34.). 1:1 (41.) bě dar hosćićela.

Serbska koparska wubranka žonow hotuje so na turněr w Šwicarskej, kotryž budźe spočatk julija pola narod­neje mjeńšiny Retoroma­now. W Ralbicach zwučowachu serbske koparki mjez druhim přiwzaće bulow, dwójne přihrawki we wuskich rumach a třělenje na wrota. Jörg Stephan

Awtorka dźensa

Halena Jancyna

Volleyball Nations League je nowosć na polu wolejbula w lěće 2018. W nowym formaće hraje 16 mustwow dohromady šěsć tydźenjow dołho wo titul. Předkoło traje 35 dnjow, finalne sydom. Najprjedy hraje kóždy přećiwo kóž­demu, w šestym a zdobom poslednim tydźenju postaji šěsć najlěpšich mustwow dobyćerja.

Pola žonow hraja lětsa narodne mustwa z Němskeje, Brazilskeje, Chiny, Italskeje, Japanskeje, Nižozemskeje, Ruskeje, Serbiskeje, Južneje Koreje, Thailandskeje, Turkowskeje a USA. To su tak mjenowane coreteamy, kotrež tworja jadro. Nimo nich wobsteji polo wobdźělnikow hišće z challengerteamow, kotrež mjenowane wubranki wužaduja. To su Argentinska, Belgiska, Dominikanska republika a Pólska. Pola muži je zestawa trochu hinaša: Argen­tinska, Brazilska, China, Francoska, Iran, Italska, Japanska, Pólska, Ruska, Serbi­ska a USA su coreteamy, Awstralska, Bołharska, Kanada a Južna Koreja challengerteamy. Tučasnje je tak, zo hrajetej w Stuttgarće a Ludwigsburgu žónske a mu­­ske narod­ne wolejbulowe mustwo w nations league.