Z wudaća: wutora, 19 junija 2018

Iniciatiwa CLEANTECH na fachowu konferencu přeprosyła

Čorna Pumpa (JoS/SN). Přichod Łužicy po wudobywanju brunicy žada sej wuske splećenje hospodarstwa z politiku a wědomosću. Runje tak su wutworjenje nowych rjećazow, zwoprawdźenje inowatiwnych projektnych idejow a eficientne wužiwanje wobstejacych resursow trěbne. Wo tym wuradźowachu njedawno wobdźělnicy fachoweje konferency CLEANTECH w Čornej Pumpje, kotrejež hesło bě, łužiske inowacije zwoprawdźić.

Na derje wopytanym zarjadowanju informowachu tohorunja wo aktualnym stawje spěchowanskich programow.

Nic wjace jastwa dla, ale jako bruny blak je Budyšin w Němskej znaty. To so mnohim wobydlerjam njespodoba – problem zamjelčeć abo samo z nim so wotnamakać pak njeje alternatiwa. Přederje po hesle „Führerprinzip“ organizowani agěruja prawicarjo, a statnym zarjadam stej často ruce wjazanej. Ćim wažniši je angažement ciwilneje towaršnosće. „Runje Bu­dyšin je prawe městno za tajki projekt“, rjekny wčera Lutz Hillmann na wotewrjenju Thespis-centruma, w kotrymž so nětko zhromadnje dźiwadźelejo integraciji wěnuja. Mjezsobne zeznawanje je prěni krok, ewentualny a husto iracionalny strach – hłowne to ćěriwo škarakow wotprawa – přewinyć. Móžeš sobudźěłaćerjam projekta jenož wjele wuspěcha přeć. Snano rěčimy potom zaso wo měsće, w kotrymž pišćele a tramwajki na swětowym niwowje nastawaja, kotrehož žonop po cyłym kraju rady jědźa a kotrež je kulturna stolica Serbow. Bosćan Nawka

Praha (dpa/SN). W čěskej stolicy dopominaja z nowymi wopomnjenskimi taflemi na čěskosłowakskich wojowarjow, kotřiž běchu 1942 na atentaće na wysokorjadneho zastupnika SS a nacistiskeho funkcionara Reinharda Heydricha wobdźě­leni. Do chódnika napřećo cyrkwi Cyrila a Metoda pušćene mosazowe platy su wčera w přitomnosći mnohich wodźacych politikarjow wotkryli. „Tući ludźo su za našu swobodu swoje žiwjenje woprowali, rjekny předsyda čěskeje socialdemokratiskeje strony ČSSD a wicepre­zident parlamenta Jan Hamáček po informacijach powěsćernje ČTK.

Słowak Jozef Gabčík a Čech Jan Kubiš běštaj 27. meje 1942 w Praze z ručnej granatu atentat na Heydricha skućiłoj, po tym zo bě mašinska třělba zaprajiła. Nacionalsocialistiski funkcionar dny po tym na sćěhi zranjenjow zemrě. Gabčík a Kubiš so zhromadnje ze swojimi so­buwojowarjemi w prawosławnej cyrkwi ­Cyrila a Metoda chowaštaj. Buchu pak přeradźeni a padnychu 18. junija 1942 po wjace hodźiny trajacej třěleńcy z SSowcami. Němcy so za atentat wjećachu a zničichu mjez druhim wjes Lidice.

W duelu přećiwnikow Němskeje w skupinje F je Šwedska Južnu Koreju z 1:0 přewinyła. Jeničke wrota třěli Andreas Granqvist w 65. min., přetworiwši jědnatku. Dwě mjeńšinje do toho bě Južnokorejčan Kim Min-Woo Viktora Claessona w šwedskej šěsnatce foulował. Sudnik Joel Aguilar je drje najprjedy raz dale hrać dał, měnjo, zo dźerženje za pokutny kop njedosaha. Někotre sekundy po tym pak dósta signal wot widejosudnika a na to korektnje na jědnatku rozsudźi. Za Šwedow běše to prěnje dobyće na swětowych koparskich mišterstwach (WM) wot lěta 2006. Tehdy běchu Paraguay tohorunja z 1:0 porazyli.

Tež Belgiska je wčera z 3:0 přećiwo Panamje wuspěšnje do WM startowała. Dries Mertens trjechi hnydom w 47. min. 1:0 po flance Kevina de Bruynea zwyši Romelu Lukaku z něhdźe pjeć metrow na 2:0 (69.) a šěsć mjeńšin pozdźišo postaji Lukaku kónčny wuslědk 3:0. Jenož jónu pokaza so wubranka Panamy strašnje před klětku Belgičanow, wrotar Thibaut Courtois pak třělwu Michaela Murillosa z krótkeje distancy (52.) wotwobara.

Hišće hač do kónca julija dyrbja šoferojo nastupajo Budyski Móst měra wjace sćerpnosće měć hač hewak. Hłubokotwarskich dźěłow dla je tón połojčnje zawrjeny. W prěnim tydźenju awgusta pak budźe asfaltowanja dla dospołnje zawrjeny. Šoferojo ­dyrbja potom po zapadnej tangenće jězdźić. Foto: SN/Maćij Bulank

Budyšin (CS/SN). Na swoje poprawne městno so Budyski „Běh z wutrobu“ zaso wróći. Po tym zo dyrbjachu zarjadowanje loni twarskich dźěłow w Schillerowych zelenišćach dla na Młynsku łuku přepołožić, startuja běharjo 21. septembra zaso před Němsko-Serbskim ludowym dźiwadłom. Wobdźělić budu so wšitke gymnazije stareho Budyskeho wokrjesa, potajkim Schillerowy, Melanchthonowy a Serbski gymnazij z Budyšina, Wjelećanski Kantowy a Biskopičanski Goethowy gymnazij kaž tež powołanskošulski centrum za hospodarstwo a techniku (BSZ). „Běh z wutrobu“ wotměwa so wot lěta 2005. Wot toho časa nazběrachu 230 000 eurow za towarstwa, kotrež so z dźěćacej a młodźinskej pomocu zaběraja.

Worklečanska gmejna prócuje so nětko wo spěchowanske srědki

Worklecy (JK/SN). Na swojim poslednim posedźenju do lětnjeje přestawki njetrjebachu so Worklečanscy gmejnscy radźićeljo tele dny přejara napinać. Skerje mějachu wjeselo a spokojnosć na swojim boku, jako jim wjesnjanosta Franc Brusk (CDU) zdźěli, zo je z Budyšina dóšła twarska dowolnosć za narunanski nowotwar šulskeho horta z cyłkownje 120 městnami. Dołho běchu so prócowali wo móžnosć, rozrisać starosće horta dla. Nětko maja drje dowolnosć twarić a městno na šulskej ležownosći tohorunja maja, faluja pak pjenjezy. Spěchowanski hornc wokrjesa njeje tak derje pjelnjeny, zo by za Worklečanske zaměry dosahało. Tuž rěka, próstwy wo spěchowanje zapodać tam, hdźež su wuhlady na přizwolenje najlěpše. Přiwšěm je Worklečanam nětko něšto lóšo wokoło wutroby. Wšako maja za nowe šulske lěto we woběmaj šulomaj tójšto přizjewjenjow a móža na zakładnej kaž tež na wyšej šuli dwučarowu wučbu podawać.

Při kupanju na swój wačok kedźbować

Bórk. Wospjet dyrbi so policija z padustwom při Šibojskim jězoru zaběrać. 47lětna žona je sej tam zawčerawšim popołdnju dojěła, zo by so kupała, a je swoju tobołu na přibrjoze wotpołožiła. Jako so wona z wody wróći, bě toboła fuk a z njej drasta a 550 eurow drohi časnik. Swědk bě muža wobkedźbował, kiž so z kolesom do směra na Wojerecy zminy. Dokładniše informacije k njemu pak bohužel žane njepředleža.

Malešecy (CS/SN). Swoju njespokojnosć ze stawom wuwića wsow po zjednoćenju gmejnow zwurazni bywši Hućinski wjesnjanosta Andreas Skomudek na zašłym posedźenju Malešanskeje gmejnskeje rady. Po jeho słowach su mnozy wobydlerjo Hućiny a Połpicy přesłapjeni, što je so tam dotal stało. Winowatostne nadawki drje gmejna spjelnja, wjele wjace pak nic. Njezrozumliwe jemu je, zo sobudźěłaćerkam w pěstowarnjach rozdźělnu mzdu płaća. Šěsć lět po gmejnskej fuziji dyrbjało so wjace idejow zapřijeć, sej Andreas Skomudek žadaše. Tomu Malešanski wjesnjanosta Matthias Seidel (CDU) znapřećiwi, zo drje su dochody přiběrali, wudawki pak tohorunja. Gmejna lutuje hdźežkuli móžno. Tak su hižo rjedźenje a wobličenje mzdy z gmejnskeho zarjadnistwa wuspinkowali. Tuchwilu maja jenož hišće štyrjoch połnje přistajenych, wšitcy tamni podźělnje dźěłaja. Swobodny stat Sakska je připowědźił, podźěl ­kraja při financowanju pěstowarnjow podwojić. Dotal pak wottam žane konkretne sumy njepředleža.

Mjeztym dźesać lět wobsteji wjacegeneraciski dom na Hasy Alberta Schweitzera ­we Wojerecach. Wjace hač 20 najwšelakorišich projektow tam sobudźěłaćerki wokoło nawodnicy Anke Schubert za dźěći, młodostnych a swójby organizuja. K jubilejej bě tele dny tež Cornelia Schnippa w serbskej dźěłanskej drasće ze swojimi alpakami přišła. Josie a Juli (wotprawa) napjeće připosłuchaštej, jako Ptačečanka jimaj ­wo serbskich tradicijach we Wojerecach a wokolinje powědaše. Foto: Silke Richter