Z wudaća: srjeda, 18 julija 2018

Institut slawistiki Ruskeje akademije wě­domosćow w Moskwje wuda loni knihu „Minoritne a regionalne rěče a kultury Slawije“. Z wurazom Slawija je wšón słowjanski swět měnjeny. Nowa edicija wopřijima na 272 stronach hłownje přednoški na wědomostnej konferency w ruskej stolicy lěta 2014 wo temje „Łužiscy Serbja w minjenym a spočatk XXI. lětstotka: rěč, kultura, stawizny“. W předsłowje wustaja Sergej Skorwid, zo kniha „pokročuje z tradiciju štyrjoch analogiskich zběrkow, wudatych wot Insti­­tuta slawistiki w běhu połlětstotka“ (prěnja zběrka bě 1963 wušła). Awtorojo nětko pjateje knihi k ćežišću sorabistika su wědomostnicy z Ruskeje, Pólskeje, Čěskeje, Serbiskeje a w Němskej z Budy­šina, Lipska a Berlina.

Budyšin (SN). „Słownik dolnoserbskeje rěcy a jeje narěcow“ poskića Budyske Ludowe nakładnistwo w Budyšinje wotnětka tež jako paket z cyłkownej płaćiznu. Třizwjazkowa publikacija słuša k standardnym dźěłam slawistiki a wopřijima cyły delnjoserbski słowoskład wot jeho spočatkow hač do za­počatka 20. lětstotka. Nastało běše žiwjenske dźěło serb­skeho wědomostnika Arnošta Muki w lětach 1875 do 1910. Dotal poskićachu wob­šěrne dźěło jeničce za płaćiznu po jednotliwych zwjazkach. Z nowej płaćiznu móža zajimcy nimale połojcu zalutować. Wudaće je prěni přirunowacy słownik zapadosłowjanskich rěčow docyła.

Poskitki we wobchodach šulerjo a starši tuchwilu rozdźělnje přijimuja

Spodźiwne to počinanje. Za tři a poł tydźenja zahaji so nowe šulske lěto. A tola wabja mnohe wobchody hižo dlěje­, někotre samo hižo wot zaha­jenja lětnich prózdnin, wo kupcow. Poskićeja po płaćiznje husto jenož po zdaću přihódne wěcy šulskeje po­trjeby. Su to zešiwki, pjelnjaki, wołojniki, barbjenčki, fazeraki, pjerowki, seršćowcy, molowanske bloki a tak dale. W mnohich wukładnych wo­k­nach so pisani.

K prózdninskim poskitkam na Rěčičanskim Erlichtec dworje słuša warjenski kurs. Zawčerawšim zetkachu so tam dźěći, zo bychu­ pod nawodom Cariny Buhler mjez druhim běrnjace plincy pjekli. Wězo smědźachu mali kucharjo swoje wudźěłki tež sami­ zjěsć. Přichodny warjenski kurs wotměje so 30. julija. Zajimcy njech so prošu přizjewja. Foto: Joachim Rjela

Byrnjež prózdniny byli, knježeše na dwo­rje Worklečanskeje šule wčera popoł­dnju čiłe žiwjenje. Tójšto dźěći, ale tež jich starši a dalši wjesnjenjo su snano nic historiski, ale přiwšěm wažny podawk dožiwili.

Worklecy (SN/MWj). Wšitke ample za twar noweho horta we Worklecach po­kazuja wot wčerawšeho zelenu swěcu. Z rukow statneho sekretara w sakskim wobswětowym a ratarskim minister­stwje dr. Franka Pfeila přija wjesnjanosta Franc Brusk (CDU) přizwolenje za spěchowanske srědki we wobjimje 1,35 milionow eurow. To wotpowěduje 75 procentam cyłkowneje inwesticije nimale dweju milionow eurow. Za Worklečansku gmejnu zbywa 469 000 eurow swójskeho podźěla. Tón financuja ze 169 000 eurami z tak mjenowanych swójskich likwidnych srědkow a z kreditom 300 000 eurow, kaž Franc Brusk wčera rozłoži. Twarsku dowolnosć gmejna hižo ma.

Wyši měšćanosta Běłeje Wody rozsudej radźićelow znapřećiwił

Běła Woda (CK/SN). K wurjadnemu posedźenju zetka so jutře, štwórtk, Běło­wodźanska měšćanska rada. W juniju bě wjetšina jeje čłonow hospodarski plan 2018 wobzamknyła. Přećiwo tomu pak je wyši měšćanosta Torsten Pötzsch (Klartext) na komunalnym dohladowanskim zarjedźe Zhorjelskeho wokrjesa weto zapołožił. Njerozrisane dypki su přistajenski stop w měšćanskim zarjadnistwje, lisći­na šmórnjenych inwesticijow a přenjesenje dobytka komunalnych firmow na město.

Radwor (SN/MkWj). Radźićeljo Radworskeje gmejny su wčera wječor wuhibki za twar noweho domicila gmejnskeho twarskeho zawoda połožili, přepodawši nadawki twarskim zawodam, kotrež bě­chu­ so na zjawnym wupisanju wobdźělili. Nastać ma nowa hala za nimale 250 000 eurow při wohnjowej woborje. Wjesnjanosta Wincenc Baberška (CDU) wopodstatni přidatne wudawki z njeznjes­liwymi wuměnjenjemi za dźěłaćerjow mjez druhim w sanitarnym wobłuku. Wón pak zdobom na to skedźbni, zo njebychu sej přidatne wudawki dowolić móhli, njeby-­li swobodny stat kóždej gmejnje 70 000 eurow přidatnje přewostajił.

Kulow (AK/SN). Po tym zo běštaj w Kulowskim policajskim běrowje dwaj zastojnikaj na wuměnk šłoj, su tam z třomi połnymi městnami zaso dospołnje wobsadźeni.

Jedne z třoch městnow ma Kristin Hänsel, wobydlerska policistka za Kulow a Wóslink. Po wuchodźenju šule wu­­knješe wona na Drježdźanskej policajskej šu­li­. Najprjedy je w Drježdźanach ko­parske hry, koncerty a demonstracije sobu zawěsćiła. Pozdźišo skutkowaše we wšědnej policajskej słužbje we Wojerecach. „Wobchadne njezboža a zadobywanja wob­dźěłać, rozestajenja mjez suso­dami wujednać a přeńdźenja chłostać běchu moje nadawki“, powěda 43lětna policajska hłowna mišterka. Lěpšina bě, zo měješe stajnje kolegu poboku, z kotrymž móžeše so wothłosować.

Kamjenc. Po wuchodoněmskich rockowych legendach swjatki sobotu na Kamjenskej Pastwinej horje dožiwja tam sobotu, 28. julija, dalši koncertny wjeršk lěta. Tón dźeń hudźa tam wot 19 hodź. hnydom tři znate kapały zašłych lět, mjenujcy Nazareth, Creedence Clearwater Revived (CCR) a Omega. Zastupne lisćiki dóstanu zajimcy w znatych předpře­dawanišćach abo internetnje pod www.eventim.de.

Cyła wjes swjeći

Sulšecy. Z natočenjom piwa a wubědźowanjom wohnjowych wobornikow nad 40 lětami započnje so zajutřišim, pjatk, lětuši wjesny swjedźeń w delnich Sulšecach. Wječor pokazaja filmy z wjesneje „čapornje“. Sobotu wot 13 hodź. steji wubě­dźowanje w třělenju jědnatkow na programje a wot 21 hodź. tak mjenowany „WiesnBeats“. Wjeršk budźe njedźelu w 16 hodź. swjedźenski program „Sulšecy news“. Wjesna rada, wohnjowa wobora a młodźina wšitkich přeprošeja.

Spinadła zaprajili

Worcyn. Wodźer traktora je so zawčerawšim při wobchadnym njezbožu pola Worcyna ćežko zranił. Na wuskim puću dyrbješe wón borzdźić. Po wšěm zdaću pak spinadła dweju připowěšakow za­prajichu, tak zo wozaj do napřećo při­jěduceho Lkw-ja zrazyštej. Nakładowany rěpik so na jězdnju wusypa.