Drježdźany (dpa/SN). Po třoch lětach je Drježdźansko-Mišnjanske biskopstwo najwjetši dźěl swojeje strukturneje reformy wotzamknyło. „W septembrje chcemy hišće nowu wosadu w Zwickauwje załožić. Potom zwostanje jenož hišće serbska kónčina, wo kotrejž njejsmy dotal hišće rozsudźili“, rjekny tudyši biskop Heinrich Timmerevers powěsćerni dpa w Drježdźanach. Najebać to chcedźa přestrukturowanje wosadow hač do kónca septembra zmištrować.
Berlin (dpa/SN). Prěni króć po třoch měsacach je Roberta Kochowy institut wjace hač tysac natyknjenych z koronawirusom registrował. Strowotniske zarjadnistwa w Němskej su po informacijach instituta cyłkownje 1 045 padow w běhu dnja přizjewili. Hranicu tysac nowych padow běchu naposledk 7. meje překročili. Na to bě ličba woteběrała, wot julija pak zaso přiběrała. Wjeršk běchu spočatk apryla ze 6 000 infekcijemi docpěli.
Starosće fachowcam načinja, zo njewudyrja infekcije na wěstych městnach, kaž w rězarni Tönnies, ale zo so znowa po wšěm kraju rozpřestrěwaja.
Hłowna přičina přiběracych ličbow je we wočomaj prezidenta Roberta Kochoweho instituta Lothara Wielera přiběraca zwjeršnosć ludźi při dodźerženju škitnych naprawow přećiwo wirusej.
Nětko chcedźa dokładnje wobkedźbować, kak so započatk šule w někotrych zwjazkowych krajach na ličby infekcijow wuskutkuje. Dźensa je so w Hamburgu za 240 000 šulerjow zaso wučba započała.
Beirut (dpa/SN). Po zahubnym rozbuchnjenju amonijoweho nitrata w Beiruće z wjace hač 130 mortwymi a 5 000 zranjenymi pytaja tam dale za woporami a předewšěm za přičinami katastrofy. Přepytowanska komisija ma knježerstwu w běhu pjeć dnjow rozprawu předpołožić. Wjacorych zamołwitych přistawa su do domjaceho aresta tyknyli. Po dotalnych dopóznaćach je 2 750 tonow strašneje maćizny rozbuchnyło, kotraž bě bjez wěstotnych naprawow hižo wjacore lěta w jednej z halow přistawa składowana.
Katastrofa je mjezynarodnu žołmu pomocy zbudźiła. Hišće wčera wječor nastaji so skupina specialistow Němskeho čerwjeneho křiža z wosebje wukubłanymi psami na puć do libanonskeje stolicy. Tež Čěska pósła pomocny team wohnjoweje wobory, kotryž je na wuchowanje zasypanych specializowany. Woni maja tohorunja psy sobu. W běhu dnja wočakowachu w Beiruće pomocne mustwa z wjacorych krajow.
Zrudźaca powěsć je minjene dny Serbow docpěła: Psychologa, spisowaćel, wysokošulski docent a připóznaty politikar Čěskeje prof. dr. Jindřich Kabát je 14. julija w starobje 67 lět w Praze zemrěł.
Jindřich Kabát je hižo jako młodostny Serbow zeznał, jako běše ze swojim gymnazialnym wučerjom prof. Jiříjom Mudru a dalšimi šulerjemi z kolesom we Łužicy po puću. Jako student psychologije a pozdźišo zaběraše so ze stawiznami, kulturu a wosebje z literaturu našeho ludu a přełožowaše basnje, kotrež wozjewjachu w časopisu přećelow Serbow. Tež někotre jeho basnje so tam w serbskim přełožku jewjachu. Čitał je Kabát knihi Jurja Brězana, Kita Lorenca a Benedikta Dyrlicha.
Njeboćički je mjez druhim jako psychologa w Praskej Akademiji muziskeho wuměłstwa a w tamnišim Narodnym dźiwadle skutkował. Přednošował pak je tež na Fachowej wysokej šuli žurnalistiki a na Teologiskej fakulće Karloweje university w čěskej stolicy.
Praha (dpa/SN). Čěski ministerski prezident Andrej Babiš je namjetował, k wožiwjenju hospodarstwa dochodowy dawk na 15 procentow znižić. Ludźo bychu potom widźeli, „zo nimaja přičiny so přichoda bojeć“. To praji załožer populistiskeho hibanja ANO w interneće. Předsyda socialdemokratiskeho koaliciskeho partnera ČSSD Jan Hamáček ma namjet za njerealistiski. Straty dochodow bychu wjetše byli hač wšón etat nutřkowneho ministerstwa, kotrež wón sam nawjeduje, Hamáček kritizuje.
Čěska nałožuje za wobličenje dochodoweho dawka tak mjenowany „superbrutto“. W nim přiliča k bruttomzdźě hišće podźěl dźěłodawarja za socialne zawěsćenje. Efektiwna sadźba wučinja tak tuchwilu něhdźe 20 procentow.
Opozicionelnych demokratow ze strony ODS ideja knježerstwoweho šefa tohorunja zadźiwa. Wotpowědny namjet strony leži hižo dwě lěće njewobdźěłany w parlamenće, rjekny předsyda ODS Petr Fiala nowinarjam. Wukon čěskeho hospodarstwa bě w druhim kwartalu koronakrizy dla porno minjenemu lětu wo 10,7 procentow woteběrał.
Nimo wulkich nadregionalnych serbskich towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja, wo nich pak přewjele njezhoniš. W swojej lětnjej seriji lětsa tajke aktiwne cyłki předstajamy, dźensa Hórčanske wjesne towarstwo Při skale (10).
Lětsa w februaru bě tomu pjeć lět, zo su Hórčanske wjesne towarstwo Při skale jako powšitkownowužitne a zjawnoprawniske zjednoćenstwo załožili. Hačrunjež maja w Hórkach aktiwnu wohnjowu woboru a derje dźěłacy młodźinski klub, bě wjacorym Hórčanam wažne měć cyłk, kotryž so wo hajenje serbskich nałožkow kaž tež wo nałožowanje serbšćiny rěče stara. Wjace hač dwaceći entuziastow bě na załoženskej zhromadźiznje pódla, a tam wuzwolichu Marlis Młynkowu za předsydku. Jeje zastupjerka je Antonija Šołćina, Katharina Jurkowa ma financne naležnosće na starosći.
Jebakaj po puću byłoj
Wojerecy. Njeznaty porik je předwčerawšim we Wojerecach wjacorych wobchodnikow zjebał. Tak chcyštaj muž a žona we wobchodźe na Złokomorowskej někajku maličkosć z wulkej bankowku zapłaćić. Jako chcyše předawarka pjenjezy měnjeć, ju porik do rozmołwy zapleće. Pozdźišo předawarka pytny, zo w kasy pjenjezy pobrachuja. Podobne sta so we wobchodźe při Staroměšćanskim torhošću a w bliskim hosćencu.
Kulow (AK/SN). Měšćanska wohnjowa wobora w Kulowje trjeba dołhodobnje nowu gratownju z kubłanskej rumnosću, předrasćernju a sanitarnym wobłukom. Z naležnosću zaběrachu so nětko čłonojo měšćanskeje rady, jako sej tuchwilne wuměnjenja wobornikow na městnje wobhladachu.
Dźensniša gratownja nasta w lětomaj 1972/1973. „Po politiskim přewróće natwarichu kameradojo w swójskej režiji kuchnju, duše a nuzniki. Nimo toho zawěsćichu nuzowe zastaranje z milinu. Tehdyši wutwar bě trěbny, zo smy scyła dale skutkować móhli“, rozłoži wohnjowoborny nawoda Thomas Werner. W běhu časa dyrbjachu samo špundowanje w jězdźidłowej hali pohłubšić. Jenož tak so pomocne a hašenske jězdźidło (HLF) po wysokosći do hale hodźeše. K wuhotowanju wobornikow słušeja dale tankowe jězdźidło TLF 4000, komandowe awto a transportne jězdźidło. Kulowskej woborje přisłuša dźensa 40 aktiwnych kameradow, 20 žonow, 17 čestnych čłonow kaž tež 30 dźěći a młodostnych.