Z wudaća: pjatk, 08 januara 2021

Dale wjele natyknjenjow

Budyšin. We wokrjesu Budyšin su wčera 300 dalšich koronainfekcijow zwěsćili, šěsć pacientow w starobje 79 do 94 lět je zemrěło. Aktualnje je 2 741 natyknjenych (+233), mjez nimi 163 (+25) w chorowni. Indicenca na 100 000 wobydlerjow wučinja tu 433,3. W Zhorjelskim wokrjesu registrowachu samsny dźeń 231 natyknjenjow, wosom smjertnych padow a indicencu 390,54.

Zetkanje FDP lětsa hinaše

Budyšin. Tradicionalne zetkanje FDP na Třoch kralow w Budyšinje budźe lětsa koronakrizy dla hinaše hač hewak. Dokelž nochcedźa zarjadowanje wupadnyć dać, wotměja lětuše 15. hornjołužiske zetkanje na Třoch kralow zajutřišim, njedźelu, wot 10 do 11.30 hodź. na facebookowej stronje sakskeje FDP, kaž Budyski wokrjesny zwjazk strony informuje.

Južna Čěska swójsce postupuje

Gerd a Angela Thomas z Wjazońcy staj krasne zymske wjedro wužiłoj a po arealu Sokolnika ­sněhakowałoj. Njeběštaj pak ­jeničkaj tele dny w zymskim lěsu po puću. Gmejna Wjazońca je loipy za sněhakowanje po dołhej čarje spřihotowała a Karla ­Bergerowu hasu jako přijězd na parkowanišćo za pućowarjow přikładnje zrumowała. Wjeselo na ­sněhakach tuž ničo njeprěkuje, chibazo započnje tać. Foto: Carmen Schumann

Axel Arlt

Wurjadne wobstejnosće žadaja sej wurjadne postupowanje. To su sej zawěsće w Budyskim wokrjesnym zwjazku Zwjazka 90/Zelenych myslili, nominujo loni 8. oktobra swojeho direktneho kandidata za wólby zwjazkoweho sejma we wólbnym wokrjesu 156.

Porno tomu maja so druhe strony ćežko. Prěnjotne terminy w nowembrje dyrbjachu korony dla do noweho lěta přesunyć, w nadźiji, zo jim pandemija planowanje njeskazy. Budyski wokrjesny zwjazk CDU pak je swój termin druhi raz přestorčił, runje tak Lěwica. Wobě stronje stej ze zwučenym wobdźělnistwom zarjadowanjow před štyrjomi lětami planowałoj, nětko hygienowy koncept zdźěłałoj a wšitko tak spřihotowałoj, zo by wěstotny wotstawk mjez přitomnymi zaručeny był. Přez nóc je aktualne wuwiće to wšitko do prašenja stajiło. Wupada tak, zo njeje kraj na wólby w času korony přihotowany.

Wažne je sej zwisk mjez wučerjemi, šulerjemi a staršimi wobchować

Budyšin (SN/MiR). Šulerjo maja dale doma wuknyć. Srjedu je sakske ministerstwo za kultus wozjewiło, zo wostanu šule hač do 6. februara zawrjene a zymske prózdniny budu krótše. Za to maja so jutrowne wo něšto dnjow podlěšić. Jeničce za wuknjacych wotchadnych rjadownjow zmóžnja prezencnu wučbu hižo wot 18. januara. Starši su tuž dale wužadani, dokelž maja swojim dźěćom při spjelnjenju nadawkow poboku być, kotrež jim wučerjo sćelu.

Towarstwo Witajće do Budyšina je loni po swójskim podaću dosć derje na dobro migrantow a „za integraciju, kulturnu wuměnu a wotewrjenu towaršnosć“ skutkowało. Hač móže lětsa runje tak wuspěšnje dźěłać, pak tuchwilu jasne njeje.

Budyšin (SN/bn). „Dźakujemy so wšěm, kotřiž su nas loni financielnje, materielnje a ideelnje podpěrali. Lěto 2020 bě wobćežny čas z tójšto wužadanjemi a njewočakowanymi wuwićemi. Při­wšěm je so nam poradźiło, integraciju ćěkancow we wokrjesu Budyšin pohonjeć“, rěja w zdźělence předsydstwa.

K loni wuspěšnje wukonjanym nadawkam towarstwa Witajće do Budyšina słuša na přikład serwis tak mjenowanych rěčnych srědnikow. Z nim podpěruja migrantow při tym, „jich naležnosće a zajimy zrozumliwje zwuraznić, mjez druhim w zwisku ze zarjadami, w šulskim wobłuku abo pola lěkarja“.

Choćebuz/Budyšin (SN/at). Grodkowski zapósłanc zwjazkoweho sejma dr. Klaus-Peter Schulze (CDU) so wjeseli: Zjězd křesćanskich demokratow wokrjesneho zwjazka Sprjewja-Nysa a měšćanskeho zwjazka Choćebuz je minjenu wutoru Markusa Niggemanna za direktneho kandidata a móžneho naslědnika Schulzy we wólbnym wokrjesu 64 wuzwolił. Prěni termin loni w nowembrje bu přestorčeny. 50 wobdźělnikow je płaćiwy hygienowy koncept dodźeržało. To wotpowěduje aktualnemu třećemu postajenju korony dla w Braniborskej.

Poprawom chcychu strony we wólbnym wokrjesu 156, to je nimo někotrych komunow w zapadnym dźělu cyły Budyski wokrjes, wot jutřišeho swojich direktnych kandidatow nominować. CDU bě sobotu do Wojerowskeje Łužiskeje hale přeprosyła, něhdźe 200 wobdźělnikow bě wotpohladanych, jednaćel wokrjesny zwjazka Budyšin CDU Filip Wjerš zdźěli. Hačrunjež zwjazkowy wólbny zakoń terminowy slěd w přihotach na wólby zwjazkoweho sejma 26. septembra rjaduje, bě wukřik mjez čłonami a wosebje w zjawnosći wulki. Předwčerawšim bu nominowanski zjězd znowa přestorčeny (SN informowachu).

Berlin (dpa/SN). Sněh a zalodźene dróhi su dźensa rano we wjacorych zwjazkowych krajach njezboža a zaraćene dróhi zawinili. W sewjerorynsko-westfalskim Bonnje stej so wosobowej awće z jězdnje sunyłoj. W Sauerlandskej dyrbjachu wjacorym nakładnym awtam pomhać, kotrež běchu na nahłych dróhach tčacy wostali. W Badensko-Württembergskej je bus po nahłej skłoninje dele zjěł. Po informacijach policije so nichtó njezrani.

Wočakuja serum za šćěpjenje

Berlin (dpa/SN). W zwjazkowych krajach wočakowachu dźensa posyłku seruma předewzaća Biontech přećiwo koronawirusej, cyłkownje 668 000 dozow. Serum chcychu direktnje do 27 centralnych składow krajow dowjezć. Najwjetši dźěl dóstanje na wobydlerjow najbohatši kraj Sewjerorynsko-Westfalska ze 141 375 dozami, najmjenje Bremen ze 4 875. Sakska ministerka za strowotnistwo Petra Köpping (SPD) sej žada, při rozdźělenju šćěpiwa na to dźiwać, hdźe je wosebje wjele starych ludźi.

SPD wo pandemiji wuradźowała

21. sibirski festiwal sněhowych skulpturow na dalokim wuchodźe Ruskeje je zahajeny. Dohromady pjatnaće mustwow sněhowych rězbarjow měješe štyri dny chwile, wuměłske twórby w parku města Pjerwomajski z prasowanych, tři metry wysokich sněhowych blokow wurězać. Krute zmjerzki so wo to staraja, zo wostanu swojo­razne skulptury zajimcam prawje dołho přistupne. Foto: dpa/Kiril Kuchmar

Washington (dpa/SN). Hladajo na masiwnu kritiku prócuje so wotwoleny prezident USA Donald Trump po nadběhowanju Kapitola přez swojich přiwisnikow nastatu škodu wobmjezować. W nowym widejowym poselstwje wón namócnosće zasudźa. „Kaž wšitcy Američenjo sym namócnosćow, anarchije a chaosa dla rozhorjeny. Nětko je čas hojenja a wujednanja“, Trump rjekny a zdobom připowědźi, zo chcył zastojnstwo nowemu prezidentej Joewej Bidenej 20. januara porjadnje přepodać.

Krótko do wozjewjenja poselstwa běchu sej wodźacy demokraća kongresa wot republikana Trumpa naškaranych namócnosćow dla žadali jeho hnydom wotsadźić. Předsydka Domu reprezentantow Nancy Pelosi a najwyši demokrat w Senaće Chuck Schumer namołwištaj amtě­rowaceho wiceprezidenta Mikea Pencea a čłonow knježerstwa, Trumpa na zakładźe artikla 25 wustawy USA ze zastojnstwa wotstronić. Mjenowany artikl dowola prezidenta pušćić, njeje-li wón kmany, „prawa a winowatosće zastojnstwa wukonjeć“. Tajku deklaraciju dyrbjeli wiceprezident a ministrojo zdźěłać.

Hišće za čas telefonata nana do porodneje kliniki je so w bydlenju w Mnichowje dźěćko narodźiło. Muž bě při telefonje rjekł, zo je jeho žona we 38. tydźenju samodruha a zo su so hrona započeli. W tym wokomiku bě w pozadku hižo wukřik dźěsća słyšeć. Hnydom poda so nuzowy lěkar k bydlenju swójby, hdźež nańdźe mać a strowe hólčatko.

Mylnje nuzowe čisło wolił je paduch w jendźelskim měsće Stoke-on-Trent a je tak policiju alarmował. „Smy drje runje najnjezbožownišeju paduchow swěta zajeli“, pisa policija hrabinstwa Stafford­shire. Mužej w starobje 49 a 42 lět běštaj so w Stoke-on-Trenće do domu zadobyłoj. Jako so jedyn z njeju na konopej sydny, zazwoni toho mobilny telefon awtomatisce nuzowe čisło policije. Ta móžeše jeju činjenju připosłuchać, doniž njepřijědźe a wobeju njezaja.