Z wudaća: srjeda, 17 februara 2021

Berlin (dpa/SN). Financny minister Olaf Scholz (SPD) je přilubił, zo Zwjazk financowanje planowanych darmotnych spěšnotestow na koronawirus w apotekach, testowych centrach a praksach přewo­zmje. Na zarjadowanju bayerskeje SPD wón rjekny, zo chcył strowotniskeho ministra Jensa Spahna (CDU) w naležnosći podpěrać. „To móžemy sej nětko tež hišće dowolić“, minister Scholz rjekny.

Jens Spahn bě připowědźił, zo měli wšitcy wobydlerjo wot 1. měrca składnosć dóstać, wot kubłaneho personala so na koronawirus testować dać. Planowane su spěšnotesty w testowanskich centrumach, lěkarskich praksach a apotekach. Wuslědk ma w běhu 15 mjeńšin předležeć. Tak mjenowane antigenowe testy pak njejsu tak spušćomne kaž testy PCR. Pozitiwne wuslědki dyrbja na kóždy pad w laborje přepruwować.

Berlin (dpa/SN). Hospodarske zwjazki žadaja sej po wčerawšich wuradźowanjach ze zwjazkowym ministrom za hospodarstwo Peterom Altmaierom (CDU) dalše korektury nastupajo pomoc w tuchwilnej koronakrizy. „Srědki drje masiwne straty pomjeńšeja, dołhodobnje pak je to wězo přemało, zo móhli předewzaća w kraju wuchować“, rjekny prezident Zwjazka němskeho turistiskeho hospodarstwa Michael Frenzel po wuradźowanju z Altmaierom. Zastupnicy zwjazka běchu sej přezjedni, zo móhli wobšěrne darmotne testy na koronawirus perspektiwa za bórzomne wotewrjenje być.

Turistiska branša sej žada, mjez rizikowymi kónčinami a regionami ze snadnej ličbu infekcijow jasnje rozeznawać. Pućowacym dyrbjeli wěste koridory wupokazać, po kotrychž móža so hibać. Tež winowatostna karantena za ludźi, kotřiž so z rizikowych kónčin nawróćeja, měli skónčnje wotstronić.

Zwjazk wikowarjow žada sej runostajenje wobchodow a hosćencow při wupłaćenju pomocnych srědkow.

Marek Krawc rozprawja z čěskeje stolicy za Serbske Nowiny

Praha. Situacija wokoło koronapandemije a škitnych naprawow bě minjene dny w Čěskej dale a njepřehladniša. Mjeńšinowe knježerstwo, wobstejace ze so­cialnych demokratow a strony ANO ministerskeho prezidenta Andreja Babiša, chcyše poprawom wosebite postajenja wirusa dla dale wjesć a bě pokazane ­na pomoc opozicije. Tola komunisća z KSČM kaž tež liberalno-demokratiske strony su wotpokazali, dotalne wuwzaćne rjadowanja dale akceptować, argumentujo, zo so podlěšenje nuzoweho stawa wustawje kraja spřećiwja. Tak je Babišowe předewzaće w čěskim sejmje zwrěšćiło. Minjeny kónc tydźenja knježeše mjez Čechami tuž wulka njewěstosć, kajke ma žiwjenje přichodne tydźenje wupadać.

Haj, takle sej je přejemy, naše narodne mjeńšiny – pisane, nostalgiske a tróšku eksotiske. Fotowa protyka mjeńšin 2021, kotruž je FUEN wudała, tyje z wobrazami narodnych drastow wšitkim klišejam, z kotrymiž wjetšina wot horjeka dele na po zdaću w starych časach tčacy wostatu mjeńšinu hlada. Tak móžeš ju přewzać, tak wobohaća mjeńšina moderny swět wjetšiny, njewohroža jednorěčnu normalnosć z cuzymi zynkami a ze žadanjemi za runoprawosću. A chutnje brać ju wězo tež njetrjebaš, hinak hač wot FUEN ­iniciěrowanu akciju Minority SafePack, kotrejež žadanja je Europska komisija wotpokazała. Wěmy, zo so typiske klišeje wo mjeńšinach lědma za to hodźa, mosty twarić a we wjetšinje zrozumjenje a tolerancu wuwabić. Nimam tuž mjeńšinowu protyku FUEN 2021 za runjewon spo­móžnu. Je pak započatk. Wšako zwjesela powěsć, zo ma w srjedźišću klětušeje fotoweje protyki načasne wuměłstwo-molerstwo stać. Cordula Ratajczakowa

Praha (ČŽ/K/SN). Lěta je Hibanje njespokojnych wobydlerjow ANO we woprašowanjach wolerjow z 30 do 35 procentami dominowało, z lońšeje nazymy bywaše poněčimne padanje jeho akceptancy wobkedźbować, nětko je wone samo wo prěnje městno přišło. Najnowše zwěsćowanje wotmysłow wolerjow přez agentuturu Kantar, přewjedźene kónc januara/spočatk februara, wujewja, zo by nowa koalicija Piraća/STAN wólby sejma dobyła, nažnjawši 29,5 procentow hłosow. Z tym wuslědkom by wona hibanje premiera Andrea Babiša wo tři procenty za sobu wostajiła, kotrež by „jeno“ hišće 26,5 procentow dóstało. Tež druha nowa koalicija z ODS, KDU-ČSL a TOP 09 je z 19,5 procentami ANO „na pjatach“. Do delnjeje komory parlamenta byštej hišće SPD z 10,5 procentami a KSČM z pjeć procentami zaćahnyłoj. ČSSD – nětčiši koaliciski partner ANO – by prěni raz wonka wostać dyrbjała, čućiwe „poniženje“ to za bohate na tradicije socialdemokratow. Wuspěch móhł opoziciji 8. a 9.

Jenož dwaj dnjej po swojich 94. narodninach zemrě 10. februara w Lipsku bydlacy sorabist a slawist profesor Hinc Šewc. Ze swojimi wědomostnymi wozjewjenjemi je lětdźesatki dołho postup w sorabistiskim rěčespyće sobu postajał.

Žorawje su lětsa najebać krute zmjerzki a wulki sněh w biosferowym rezerwaće Hornjołužiska hola a haty wostali. Móžno bě to mjez druhim namołwy sobudźěłaćerjow rezerwata ratarjam dla, worać swoju rolu hakle nalěto. Tak je něhdźe 500 žorawjow kaž tež nimale 1 000 dźiwich kołpjow, wjac hač 1 000 dźiwich husycow a zybowych ptakow na šćernišćach a njewobdźěłanych ­płoninach a polach dosć picy našło. Foto: Christina Schmidt

Wojerecy (SN/MiR). Mnohe družiny překasancow hroža wotemrěć. Jim pobrachuja přiběrajcy žiwjenske rumy. Za Wojerowski zwěrjenc je to přičina, so za jich škit zasadźeć. Za to wuwichu tam akciju „Škitarjo pčołkow, syjerjo nadźije“. Wotnětka dóstawaja darićeljo a podpěraćeljo zwěrjenca titku ze symješkami jako dźak. Je to specialna měšeńca, kotruž je nawoda coowa, entomologa Eugène Bruins, hromadu zestajał. Wona je wusměrjena na wosebitu potrjebu dźiwich pčołkow a tudyšich překasancow. Z akciju chce zwěrjenc přinošować k škitej insektowych družin w regionje. Symjo dosaha za płoninu hač do połštwórta kwadratneho metra. Wusyć hodźi so wone na zahrodźe doma abo w zwěrjencu na łuce mjetelčkow podłu płota při parkowanišću. Za to předwidźane městnosće su z taflemi woznamjenjene.

Sprjewine město trjeba zasydlenske přestrjenje inwestorow

Budyšin (SN/MiR). Strukturna změna Budyski region wužaduje. Tak zaběratej so město kaž tež jeho rada hižo dlěje z projektami přichoda. Měšćanske zarjadnistwo je so w běhu zašłych lět intensiwnje ze stejnišćemi za wuwiće nowych industrijnych a přemysłowych płonin zaběrało. Při tym widźa wobdźěleni po dlěšim wotwažowanju, zo měli přemysłowe a industrijne pasmo juh za tajke wužiwać.

Při Miłočanskim haće dyrbja štomy wěstotnych přičin dla podrězać. Wobydlerjo su tam wčera prěni zdónk a hałzy zrumowali. Foto: Marko Kowar