Z wudaća: póndźela, 12 apryla 2021

Měšćanscy radźićeljo so z wopłóčkowymi płaćiznami zaběrali

Kulow (AK/SN). Za štyri techniske při­prawy k rjedźenju wopłóčkow města Kulowa je tamniša měšćanska rada nowe popłatkowe sadźby schwaliła. Při mnóstwowych popłatkach dóńdźe k někotrym snadnym změnam, kotrež wuskutkuja zniženja, ale tež zwyšenja. To je facit nowych popłatkowych wustawkow. Wone nastachu na zakładźe kalkulacijow za mi­njeny čas, ale tež za přichodne lěta. Wobličili su je tak, zo wone wudawki kryja­. „Přewjele płaćene pjenjezy woby­dlerjam zaso wróćimy. Je-li něchtó přemało płaćił, to za přichodny kalkulaciski čas 2021 hač do 2023 wobkedźbujemy“, komornik Thomas Woelke rozłoži. Po jeho­ słowach su centralna wodočisćernja w Kulowje, Koćinska hatna rjedźernja kaž tež wotwodźowanje přez wjesnu kanalizaciju (tak mjenowane kanale wjesnjanostow) dobytk nadźěłali. Tón woby­dlerjam wróća. W centralnej wodočisćerni wučinja dobytk za wopłóčki 107 000 eurow, za dešćikowu wodu 27 000 eurow. Přiwšěm sej přichodnje za kubikny meter wopłóčkow 3,04 eurow žadaja, dwanaće centow wjace hač dotal.

Budyšin (CS/SN). Južna wobjězdka wo­koło Budyšina bě jedna z temow na zašłym posedźenju Budyskeje měšćanskeje rady. W hodźinje naprašowanja so woby­dler z Hornjeje Kiny słowa jimaše. Wón radźićelow prošeše, so za to zasadźeć, zo so­ dalši dźěl Budyskeje južneje wob­jězdki njetwari blisko města. Hewak by to wobydlerjow Hornjeje Kiny přejara poćežowało. To by tež tohodla wažne było, dokelž móhli tam přichodnje nowe bydlenske domy nastać a ličba wobydlerjow rozrosć. Hižo nětko je po słowach rěčnika strašne, zwjazkowu dróhu B 96 přeprěčić. Z nowej južnej wobjězdku by předewšěm ličba Lkw-jow přiběrała.

Pančicy-Kukow (SN/MWj). Po pojutrownych zymnych dnjach so nalěćo nětko najskerje tola doskónčnje předrěje. Wšudźe su na štomach a kerkach pupki widźeć, nalětnje kwětki rjenje kćěja a łuki prezentuja so z młódnej zelenju. Tež přirodowa a wučbna zahroda zeloweho a zežiwjenskeho centruma klóštra Ma­rijineje hwězdy w Pančicach-Kukowje poně­čim k žiwjenju wotuća. Tu a tam so sobudźěłaćerjo Křesćansko-socialneho kubłanskeho skutka hišće gratu přimaja. Woni poslednje slědy zymskeho časa wotstronja a něhdźe 6 000 kwadratnych metrow wulku zahrodu za wopytowarjow přihotuja. Tak maja zymski škit za ławki a informaciske tafle wotstronić a taflički za nowe rostliny popisać. Tež sadowcy su minjene dny hišće wu­rězali, kaž w nowinskej zdźělence rěka. Za dobrej tydźenjej, 25. apryla, wopy­towarjow wočakuja. Hač do toho změja hišće dosć dźěła, zo móhli swoju rjanu zahrodu prezentować.

Pěskecy (SN/MWj). Při tragiskim dźěłowym njezbožu na swojej priwatnej ležownosći je předwčerawšim rano w Pěskecach młody muž žiwjenje přisadźił. 32lětny bě runje při tym, zemju wokoło swojeho domu wurywać, jako so dźěl zakładneje murje sypny a na njeho padny. Přiwołany nuzowy lěkar znjezboženemu hižo pomhać njemóžeše. Přiwuzny muža spěšnje hišće na bok skoči a so na zbožo jeno snadnje zrani. Zasypaneho wućahnyć bě komplikowane a traješe hač do wječora, dokelž hrožeše strach, zo so dom sypnje. Hakle wokoło 18.30 hodź. so poradźi, z pomocu specialneje konstrukcije Techniskeho pomocneho skutka (THW) dom stabilizować, tak zo mó­žachu 32lětneho pod sypnjenej murju wućahnyć. Kaž policija dale rozprawja, su so wo jeho přiwuznych dušepastyrsce starali. Dróha w Pěskecach do směra na Róžant bě za čas zasadźenja dospołnje zawrjena. Nimo sobudźěłaćerjow THW z Budyšina, Kamjenca a Lipska běchu tež wokolne wohnjowe wobory a krizowy interwenciski team zasadźene.

Před 60 lětami je Jurij Gagarin jako prěni čłowjek zemju z kosmosa wuhladał

„Поехали!“ Z tymle wosudnym słowom poda so dźensa před 60 lětami Jurij Aleksejewič Gagarin jako prěni čłowjek do swětnišća. Tehdy 27lětny major powětrowych wobrónjenych mocow Sowjetskeho zwjazka je z pioněrskim skutkom miliony wobydlerjow na cyłym swěće zahorił a w swojej generaciji přeće za do toho časa hišće njeznatym powołanjom kosmonawta zbudźił. Štož ludźom wothladajo wot fachowcow wědome njebě: Wuspěch misije bě wšo druhe hač wěsty. Nošna raketa Wostok, dale wuwita warianta prěnjotnje wojerskeho typa R-7, kotraž bě 1957 satelit Sputnik I jako prěni­ kumštny objekt do orbita donjesła a tak pozdźišo „napřemoběh do swětnišća“ mjenowanu konkurencu ZSSR a USA na polu slědźenja a technologiskeho postupa wuskutkowała, wopokaza su runja swětnišćowej łódźi samsneho mjena jako chětro njespušćomna; wědomostnicy w kosmodromje Bajkonur běchu wuličili, zo je prawdźepodobnosć zešlachćenja lě­ta­ niša hač 50 procentow.

Vatikan (B/SN). W swojim tradicionalnym jutrownym poselstwje žadaše sej bamž Franciskus energisce bórzomne zakón­čenje wójnow na swěće a sprawne rozdźělenje šćěpiwow. Wosebje apelowaše wón, njezabyć na chudych a bědnych. Korony dla njepřednjese wón jutrowne poselstwo po zwučenym wašnju z wokna k Pětrowemu naměstu, ale přečita je po kemšach we Vatikanskej bazilice, hdźež wobdźěli so jenož něhdźe 200 ke­mše­rjow. „Zrowastanjenje Jězusa by móhło wosrjedź tutych napjatosćow budźić nowu nadźiju,“ rjekny bamž. 170 telewizijnych sćelakow wusyłaše bamžowske žohnowanje „Urbi et orbi“. Hižo w jutrownej nocy bě pontifeks pozbudźował: „Z Božej pomocu móže so z črjopjenca čłowječich stawiznow stać wuměłstwo.“

Lětsa do Francoskeje